काठमाडौं - शान्तिको सन्देश विश्वभर फैलाउने उद्देश्यसहित पाँच दिनसम्म साइकल यात्रा हुने भएकाे छ । “दुर डे लुम्बिनी–शान्तिका लागि साइकल यात्रा (Tour de Lumbini – Pedal for Peace, TDL-P4P) २०२६” आगामी वैशाख १५ देखि १९ गते (अप्रिल २८ देखि मे २, २०२६) सम्म आयोजना हुने भएको हाे।
पाँच दिनसम्म सञ्चालन हुने यो साइकल यात्रा काठमाडौंदेखि लुम्बिनी सम्म पुग्नेछ। आयोजकका अनुसार, यात्रामा देश तथा विदेशका साइकल यात्री, युवा, कर्पोरेट क्षेत्रका प्रतिनिधि तथा सञ्चारकर्मीहरूको सक्रिय सहभागिता रहनेछ। शान्ति, सहअस्तित्व र सामाजिक ऐक्यवद्धताको सन्देश फैलाउने लक्ष्यसहित कार्यक्रम सञ्चालन गरिन लागेको हो।
दश वर्षे सशस्त्र द्वन्द्वपछि संक्रमणकालीन अवस्थाबाट गुज्रिएको नेपालले शान्ति र पुनर्निर्माणको मार्ग अवलम्बन गरिरहेको सन्दर्भमा सन् २०१२ देखि सुरु गरिएको यो अभियान निरन्तर रूपमा सञ्चालन हुँदै आएको छ। सामाजिक उद्यमी तथा मेघ आले को अवधारणामा सुरु भएको अभियान प्रारम्भिक चरणमा विश्व साइकल यात्री पुष्कर शाह को नेतृत्वमा सञ्चालन भएको थियो।
गौतम बुद्ध को पवित्र जन्मस्थल लुम्बिनीबाट विश्वभर शान्तिको सन्देश प्रवाह गर्ने लक्ष्य राखिएको यस अभियानले नेपाललाई “शान्ति क्षेत्र” का रूपमा अन्तर्राष्ट्रिय स्तरमा स्थापित गर्ने दीर्घकालीन उद्देश्य लिएको छ। आयोजकहरूका अनुसार, नेपाल जस्ता राष्ट्रले भारत र चीनजस्ता दुई ठूला अर्थतन्त्रबीच शान्तिको सेतु बन्न सक्ने सम्भावना बोकेको छ।
यस वर्षको संस्करण विशेषगरी ‘Gen Z’ युवाहरूको सक्रिय सहभागितामा केन्द्रित हुनेछ। डिजिटल युगमा युवाहरूको ऊर्जा र सक्रियतालाई शारीरिक सहनशीलता तथा सामाजिक उत्तरदायित्वसँग जोड्दै दिगो, पारदर्शी र शान्तिपूर्ण समाज निर्माणका लागि सशक्त सन्देश दिने लक्ष्य लिइएको छ।
हालको विश्व परिवेशमा रूस-युक्रेन युद्ध लगायत अन्तर्राष्ट्रिय तनावका कारण बढ्दो अस्थिरताबीच यस्ता जनस्तरका शान्ति अभियानहरूको महत्त्व झन् बढेको आयोजकहरूले बताएका छन्। यात्राको विभिन्न चरणमा स्थानीय समुदायहरूको समेत सक्रिय सहभागिता रहने जनाइएको छ।
भविष्यमा शान्तिका क्षेत्रमा योगदान पुर्याउने व्यक्तिहरूलाई “लुम्बिनी शान्ति पुरस्कार” प्रदान गर्ने योजना समेत यस अभियानले अघि सारेको छ। आयोजकले अभियानमा सहयोग तथा सहभागिता जनाउने सम्पूर्ण साझेदार, सहभागी र सरोकारवालाहरूलाई धन्यवाद व्यक्त गरेका छन्।
“Tour de Lumbini – Pedal for Peace (TDL-P4P)” एक सामाजिक अभियान हो, जसले साइकल यात्रामार्फत शान्ति, सहअस्तित्व र विश्वव्यापी ऐक्यवद्धताको सन्देश प्रवाह गर्दै आएको छ। सन् २०१२ देखि निरन्तर सञ्चालन हुँदै आएको यस अभियानले लुम्बिनीलाई विश्व शान्ति संवादको केन्द्रका रूपमा प्रवर्द्धन गर्ने लक्ष्य राखेको छ।
