पार्टीको बृहत्तर एकताका लागि सिनियर नेताहरुसँग संवाद सुरु गरेको छु ।
गगन थापा
सभापति
काठमाडौं- नेपाली कांग्रेसको पूर्वसंस्थापन समूहमा नयाँ दल गठनको माग जोडतोडले उठेको छ । निवर्तमान उपसभापति पूर्णबहादुर खड्काको अगुवाइमा धुम्बाराहीस्थित होटल स्मार्टमा बसेको बैठकमा सहभागी नेताहरुले नयाँ दल गठन गरी अघि बढ्न माग गरेका हुन् ।
विशेष महाधिवेशन अवैधानिक भन्दै आएका पूर्वसभापति शेरबहादुर देउवापक्षका नेताहरु गुरु बराल, शिवप्रसाद हुमागाई, कुन्दनराज काफ्ले र सुदूरपश्चिम प्रदेशका प्रदेश सभापति वीरबहादुर बलायरले अलग पार्टी गठन गरेर जानुपर्ने धारणा राखेका हुन् । विशेष महाधिवेशनमा गगन थापा नेतृत्वको एकपक्षीय कार्यसमिति रहेकोले पार्टीभित्र सम्मानजनक अवस्था नपाउने भन्दै उनीहरुले अलग्गै पार्टी बनाउनुपर्ने धारणा राखेका हुन् ।
उहाँ (सभापति)ले जसरी बोलाउनुहुन्छ त्यसरी हामी जान्छौं । सानेपाको भित्तामा गएर कराएर निवेदन दिन हामी जाँदैनौं ।
कुन्दनराज काफ्ले
पूर्वकेन्द्रीय सदस्य
अलग्गै पार्टी बनाउनुपर्छ भन्ने धारणाबारे पूर्वकेन्द्रीय सदस्य काफ्लेले घुमाउरो पारामा पार्टी सभापति थापाको व्यवहारमा भर पर्ने बताए । यद्यपि आफूहरु सानेपाको भित्तामा गएर नकराउने काफ्लेले बताए । ‘उहाँ (सभापति थापा)ले जसरी बोलाउनुहुन्छ त्यसरी हामी जान्छौं । सानेपाको भित्तामा गएर कराएर निवेदन दिन हामी जाँदैनौं,’ काफ्लेले भने ।
भदौ २३ र २४ गते भएको जेन-जी विद्रोहसँगै कांग्रेसमा युवाहरुको विद्रोहले गत पुसमा विशेष महाधिवेशन भयो । उक्त महाधिवेशनबाट माघ १ गते थापाको नेतृत्वमा नयाँ कार्यसमिति चयन गरिएको थियो । देउवापक्षले भने उक्त महाधिवेशन अवैधानिक भएको भन्दै विरोध जारी राख्यो । निर्वाचन आयोगले माघ २ गते थापा नेतृत्वको कार्यसमितिलाई नै आधिकारिकता दिएपछि देउवा समूह माघ ६ गते अन्तरिम आदेश माग्दै सर्वोच्च अदालत पुगेको थियो ।
उहाँ (सभापति)ले जसरी बोलाउनुहुन्छ त्यसरी हामी जान्छौं । सानेपाको भित्तामा गएर कराएर निवेदन दिन हामी जाँदैनौं ।
कुन्दनराज काफ्ले
पूर्वकेन्द्रीय सदस्य
सर्वोच्चले उक्त रिटमा अन्तरिम आदेश नदिएपछि देउवा समूह थापाकै हस्ताक्षरमा फागुन २१ गते निर्वाचनमा होमियो । चुनावमा भने कांग्रेसले नराम्ररी पराजय भोग्नुप¥यो । शुक्रबार सर्वोच्चले आयोगको निर्णयलाई सदर गर्दै देउवापक्षको रिट खारेज ग¥यो । योसँगै देउवापक्ष अबको रणनीति बनाउन जुटेको हो ।
यो बीचमा केही नेताले भने गोप्य छलफल गरी हिन्दूवादी दल बनाउने तयारी थालिसकेका छन् । यो मोर्चामा शशांक कोइरालादेखि बालकृष्ण खाणसम्म रहेको कांग्रेस नेताहरु नै बताउँछन् । नेपाली कांग्रेसले लिइरहेको लोकतान्त्रिक धार राष्ट्रिय स्वतन्त्र पार्टीले लिइसकेको अवस्थामा अहिले हिन्दूवादी र राजावादी विचारधारा बोक्ने नेतृत्व कमजोर भइरहेको आकलन ती नेताहरुको रहेको छ । यसको अगुवाइ नेता शंकर भण्डारीले गरिरहेका छन् । ‘कांग्रेसको एजेण्डा सबै रास्वपाले बोकिसक्यो । अब देशमा प्रतिपक्षी दल बन्न हिन्दूवादी एजेण्डा नै बोक्नुपर्ने देखिएको छ । यो विषय कांग्रेसको महासमिति बैठकमा पेस भइसकेको कुरा हो,’ देउवापक्षका एक नेताले भने ।
यद्यपि अहिले नै निर्णय नै लिनुभन्दा देशभर छलफल गरेरमात्र यसको निष्कर्ष निकालिने कांग्रेस नेताहरुले बताएका छन् । अदालतको फैसला चित्त नबुझेको उल्लेख गर्दै आफूहरु देशभर छलफलमा जान लागेको कांग्रेस नेता मिनबहादुर विश्वकर्माले बताए । ‘हामी चरणबद्धरुपमा प्रदेशस्तरको, जिल्लास्तरको बैठक बसेर बृहत् राष्ट्रिय भेला आयोजना गर्ने छौं । हामीलाई अदालतको फैसला चित्त बुझेको छैन,’ विश्वकर्माले आइतबारको बैठकपछि भने ।
अर्को पक्षले पहल ग¥यो भनेमात्र एकताको वातावरण बन्ने विश्वकर्माको भनाइ छ । अन्यथा पार्टी विभाजनतर्फ जानसक्ने चेतावनीसमेत उनले दिए । ‘महाधिवेशनको दुई कार्यतालिका छ । समायोजन गरेर एउटै बनाउने स्थिति बन्यो भने एकता भएको मानिन्छ । होइन भने दुईवटा महाधिवेशन हुन्छ । पार्टी विभाजनतर्फ जान्छ । त्यो नहोस् भनेर सम्बन्धित पक्षलाई एकताको पहल गर्न आह्वान गरेका छौं,’ विश्वकर्माले चेतावनी दिए । देउवापक्षले वैशाखको अन्तिममा महाधिवेशन तोकेको छ ।
