काठमाडौं - अब विदेश जाने वा त्यताबाट आउने आफन्तको बिदाइ/स्वागतमा तीन जना मात्रै सहभागी हुन पाइने भएको छ । नेपाल नागरिक उड्डयन प्राधिकरणले एक सूचना जारी गरी आफन्तको बिदाइमा विमानस्थल जाँदा तीनजनाभन्दा बढी नजान आग्रह गरेको हो ।
विमानस्थलमा आन्तरिक तथा अन्तर्राष्ट्रिय वायुसेवाका उडानको संख्या बढ्दो क्रममा रहेकाले हवाई यात्रुको संख्यामा पनि वृद्धि भइरहेको र बिदाइका लागि आउँदा भीड बढ्ने प्राधिकरणको भनाइ छ ।
“कतिपय अवस्थामा एकजना यात्रुका लागि दशौँ आफन्तजन स्वागत तथा बिदाइका लागि विमानस्थलमा आउने गरेकाले यस त्रिभुवन अन्तर्राष्ट्रिय विमानस्थलको हाताभित्रको सीमित स्थानका कारण अत्यधिक भिडभाड हुने गरेको छ,” जारी सूचनामा भनिएको छ ।
यस्तै, अत्यधिक भिडभाडलाई निरुत्साहित गर्न आवश्यक देखिएकाले एकजना यात्रुका लागि बढीमा तीनजना मात्र आफन्तजनले स्वागत तथा बिदाइ गर्न प्राधिकरणले भनेको छ । “अत्यधिक भिडभाड नियन्त्रणमा सहयोग गरिदिन हुन सम्बन्धित सबै महानुभावलाई त्रिभुवन अन्तर्राष्ट्रिय विमानस्थल नागरिक उड्डयन कार्यालय हार्दिक अपिल गर्दछ,” सूचनामा उल्लखे छ ।
