काठमाडाैं - आदिवासी समुदायको छाता संगठन नेपाल आदिवासी जनजाति महासंघ (नेफिन) को अध्यक्षमा निमा लामा ह्योल्मो निर्वाचित भएको छ । शनिबार सम्पन्न मतदानको मत गणना आइतबार विहान गरिएको मतगणनाको परिणामअनुसार ह्योल्मो अध्यक्षमा ३९ मत प्राप्त गरी निर्वाचित भएका हुन् ।
ह्योल्मोको प्रतिस्पर्धी जीवनकुमार राईले ११ मत प्राप्त गरी पराजित भएका छन् । ५६ मत रहेको महासंघको निर्वाचनमा ५१ मत खसेको थियो । महासंघका निवर्तमान महासचिव दिवस राईका अनुसार २१ सदस्यीय नयाँ कार्य समितिको वरिष्ठ उपाध्यक्षमा डिलबहादुर गुरुङ निर्विरोध निर्वाचित भएका छन् ।
त्यस्तै, ७ जना उपाध्यक्षहरुमा क्रमशः अमृतबहादुर सुनुवारले ३७ मत, आङ पासाङ शेर्पाले ४० मत, चन्द्रलाल राजभण्डारीले ३५ मत, रामकुमारसिंह दनुवारले ४२ मत ल्याएर निर्वाचित भए । तीन जना उपाध्यक्ष चिनीमाया माझी, मनमाया छन्त्याल र जुनिता राई (शान्ति देवान) निर्विरोध निर्वाचित भए ।
सोहीअनुसार महासचिवमा मिल सारु मगरले २९ मत ल्याएर निर्वाचित भए । उनको प्रतिस्पर्धी प्रेम येक्तेनले २० मत ल्याएर पराजित भए । त्यस्तै, , उपमहासचिवमा गणेश कुमार निर्विरोध निर्वाचित भए । सोहीअनुसार ८ जना सचिवमा क्रमशः महेन्द्र दुरा २४ मत, सन्तबहादुर चेपाङ २९ मत, शिवचन्द्र मण्डल २५ मत, शैलेन्द्रकुमार ताजपुरिया २४ मत, चकचकी राजवंशी ४१ मत, छेवाङ बुम्छोक गुरुङ २९ मत, जसवी मण्डल २२ मत, बीना मम्बा तामाङ २६ मत ल्याएर निर्वाचित भए ।
त्यस्तै, कोषाध्यक्षमा मिङमा कामी शेर्पाले २९ मत ल्याएर निर्वाचित भइन् भने उनकी प्रतिस्पर्धी खेमराज भुजेल १८ मत प्राप्त गरी पराजित भए । सहकोषाध्यक्षमा भने प्रभातकुमार चौधरी निर्विरोध निर्वाचित भएका छन् ।
महासंघको ११ औं महाधिवेशन चैत ५ र ६ तय गरिएको भए पनि लम्बिएर निर्वाचनको परिणाम आउन दुई दिन ढिलोगरी ८ गते विहान कुर्नु परेको निवर्तमान महासचिव राईले बताए । महासंघमा आवद्ध ५६ जातीय संस्थाका प्रतिनिधिहरुबाट एक जातीय संस्थाबाट १ जना मतदाता रहने विधानमा व्यवस्था छ । निर्वाचनमा ५ जना मतदाता अनुपस्थित रहेका थिए ।
