काठमाडौं- देशभर लोकप्रिय मतमा अगाडि राष्ट्रिय स्वतन्त्र पार्टी(रास्वपा ) भए पनि कर्णालीमा दोस्रो स्थानमा देखिएको छ। प्रदेशगत मत परिणाम सबै प्रदेशमा बलियो देखिएको रास्वपा कर्णाली प्रदेशमा दोस्रो स्थानमा सीमित हुन सक्ने देखिएको हाे ।
सार्वजनिक भएको समानुपातिक मत परिणामअनुसार देशभर लोकप्रिय मतमा राष्ट्रिय स्वतन्त्र पार्टी (रास्वपा )अगाडि देखिएको छ।सामानुपातिक तर्फ को १,०७,३९,११५ मत गणना हुदा रास्वपा ५१,३९,२३५ मत सहित पहिलो स्थानमा छ।
कर्णाली प्रदेशको प्रतिनिधि सभातर्फको समानुपातिक मतगणनाअनुसार नेपाली कांग्रेस पहिलो स्थानमा रहेको छ। कांग्रेसले करिब १लाख ४१ हजारभन्दा बढी मत प्राप्त गर्दा राष्ट्रिय स्वतन्त्र पार्टीले करिब १ लाख ३३ हजारभन्दा बढी मत प्राप्त गरी दोस्रो स्थानमा रहेको छ।
त्यसैगरी करिव १ लाख २० हजार मत तेस्रो स्थानमा नेपाल कम्युनिस्ट पार्टी (एमाले) रहेको छ भने चौथो स्थानमा नेपाली कम्युनिस्ट करिव १ लाख ७ हजार मत छ । अन्य दलहरूमा राष्ट्रिय प्रजातन्त्र पार्टी, प्रगतिशील लोकतान्त्रिक पार्टी, नेपाल कम्युनिस्ट पार्टी (माओवादी केन्द्र) लगायतका दलहरूले तुलनात्मक रूपमा कम मत प्राप्त गरेका छन्।देशव्यापी रूपमा लोकप्रिय मतमा ३% थ्रेसहोल्ड कटाई राष्ट्रिय पार्टी बन्न अग्रसर भइरहेको श्रम संस्कृति पार्टी पनि कर्णालीमा जम्मा ४,६५७ मतसहित नवौँ स्थानमा रहेको छ।
प्रत्यक्षतर्फ एक सिट मात्र जित्न सफल भएको पार्टी रास्वपा प्रदेशस्तरको समग्र मत परिणाममा दोस्रो स्थानमा रहे पनि जिल्लागत विवरण हेर्दा अधिकांश जिल्लामा चौथो वा तल्लो स्थानमा सीमित भएको देखिन्छ।जिल्लागत विवरण हेर्दा हुम्लामा राष्ट्रिय स्वतन्त्र पार्टी करिब २ हजार मतसहित चौथो स्थानमा रहेको छ। मुगुमा पनि अवस्था लगभग त्यस्तै देखिन्छ, जहाँ करिब २१०० मतसहित उक्त पार्टी चौथो स्थानमा रहेको छ। डोल्पामा भने ३१०२ मतसहित तेस्रो स्थानमा पुगेको देखिन्छ।
कालिकोटमा राष्ट्रिय स्वतन्त्र पार्टी करिब ५ हजार मतसहित चौथो स्थानमा रहेको छ भने जुम्लामा करिब ५ हजार १ सय मतसहित पाँचौं स्थानमा रहेको तथ्यांकले देखाउँछ। त्यस्तै जाजरकोटमा करिब ५हजार ७सय मतसहित चौथो स्थानमा रहेको छ।रुकुम पश्चिममा भने राष्ट्रिय स्वतन्त्र पार्टी १०,१४९ मतसहित तेस्रो उक्लिएको देखिन्छ। दैलेखमा पनि करिब २०हजार ५ सय मत प्राप्त गर्दै दोस्रो स्थानमा उक्लिएको छ।
कर्णाली प्रदेशको मुख्य प्रशासनिक केन्द्र रहेको सुर्खेतमा भने रास्वपा करिब ५४ हजार २सय मतसहित पहिलो स्थानमा रहेको तथ्यांकले देखाएको छ।राजनीतिक विश्लेषकहरूका अनुसार कर्णालीमा परम्परागत दलहरूको संगठनात्मक प्रभाव अझै बलियो रहेकाले नयाँ शक्तिका रूपमा उदाएको राष्ट्रिय स्वतन्त्र पार्टीलाई धेरै जिल्लामा अपेक्षित समर्थन प्राप्त हुन सकेको देखिँदैन। तर कर्णालीका सुगम जिल्ला सुर्खेत र दैलेख जस्ता जिल्लामा भने पार्टीले उल्लेखनीय मत प्राप्त गरेको देखिन्छ।यसले देशभर लोकप्रिय मतमा अग्रता लिइरहेको रास्वपाको प्रभाव कर्णाली प्रदेशमा भने कमजोर रूपमा रहेको विश्लेषण गरिएको छ।
