प्रतिनिधि सभाको निर्वाचन अब ६ दिन बाँकी छ । निर्वाचनका पूर्वसन्ध्यामा दलहरुले अझै पनि मतदान हुँदैन कि भन्ने किसिमका आशंका व्यक्त गर्न छाडेको छैन । कांग्रेस सभापति गगन थापाले बिहीबार सुर्खेत पुगेर निर्वाचनप्रति संशय उत्पन्न भएको मत राखे । यद्यपि कांग्रेसको पूर्ण साथ निर्वाचन सम्पन्न गर्नमै रहेको थापाले बताए ।
निर्वाचनको मुखमा सरकारले भदौ २४ को विध्वंशमा संलग्नविरुद्धको उजुरीमा निर्णय लिने तयारी गरेको छ । भदौ २४ मा संसद भवनदेखि सिंहदरबारसम्म जलाइएको थियो । उक्त दिन नेताका घरदेखि पार्टी कार्यालय र प्रहरी चौकी निशानामा परेका थिए भने व्यापारिक केन्द्रहरु पनि आगजनीबाट नष्ट भयो । भदौ २३ गते युवाहरुको विरोध प्रदर्शनका क्रममा संसद भवनअगाडि युवाहरु मारिएको आक्रोशमा भदौ २४ को घटना भएको थियो ।
यो घटनाको सत्यतथ्य छानबिन गर्न पूर्व न्यायाधीश गौरीबहादुर कार्कीको नेतृत्वमा छानबिन आयोग गठन भएको छ । यो आयोगले निर्वाचनको मुखैमा प्रतिवेदन सार्वजनिक गर्ने तयारी रहेको सुनिएको छ । यो भनेको निर्वाचनमा भाग लिन लागेका सबै पक्षलाई भाँड्नु हो । यता यही बेला बीबीसीले भदौ २३ को घटनालाई समेटेर वृत्तचित्र सार्वजनिक गरेको छ ।
यो वृत्तचित्रले भदौ २३ लाई पुनस्मरण गराइदिएको छ भने पुराना दलप्रति आक्रोशित जनताले सामाजिक सञ्जालमा यसलाई व्यापक बनाएका छन् । उक्त रिपोर्टमा पूर्व आइजी चन्द्रकुवेर खापुङको आदेशपछि प्रदर्शनकारीमाथि गोली चलाएको दाबी गरिएको छ । यो रिपोर्टले निर्वाचन बिथोलिने देखिएको कतिपयले दाबी गरेका छन् ।
यता निर्वाचन आयोगले भने यो भिडियो हटाउन भन्दै प्रेस काउन्सिललाई पत्र पठाएको छ । सबैभन्दा पहिले त बीबीसीको रिपोर्ट हटाउन आयोगले दिएको निर्देशन आफैमा विवादास्पद छ । सबै पक्ष निर्वाचनका लागि तयार रहेको बेला आयोग आफै भने निर्वाचनको वातावरण बिथोल्नेतिर लागेको देखिन्छ । खासमा पत्रकारिता सरकारलाई खबरदारी गर्ने माध्यम हो । जेन-जी विद्रोहको समयमा भएका घटनाको दोषी लुकाउन सरकारले छानबिन आयोगको प्रतिवेदन सारेको सा¥यै गरेको बेला बीबीसीको रिपोर्टले मतदातामा एक किसिमको राहत दिलाएको छ ।
निर्वाचन आयोगले रिपोर्ट हटाउनु भन्नु स्वतन्त्र पत्रकारितामाथिको धावा हो । यसरी अंकुश लगाउन खोज्नु आफैमा शंकास्पद विषय हो । त्यसैले निर्वाचनको मुखमा आयोगले यस्तो खालको शंकास्पद काममा आफूलाई अघि बढाउनु हुँदैन । निर्वाचन नजिकिएको छ यसैले यो बेला दल, जे-जी अभियन्ता, मिडिया सबैले संयमता अपनाउन जरुरी छ ।
