आइसिसी टी-२० विश्वकप खेल्न भारतको यात्रा तय गर्दा नेपालको लक्ष्य थियो, सुपर आठमा प्रवेश गर्ने । पछिल्लो समय निकै राम्रो लयमा रहेको नेपाली क्रिकेटले जारी विश्वकपमा चमत्कारिक खेल प्रस्तुत गर्ने अपेक्षा आम क्रिकेटप्रेमीहरुले गरेका थिए । खेलाडीहरु पनि आत्मविश्वासका साथ इतिहास रच्ने लक्ष्यमा अघि बढेको देखिन्थे । तर, नेपालका लागि समूह चरण पार गर्नु निकै चुनौती थियो । कारण, विश्वविजेता इंग्ल्याण्डसँगै वेस्टइण्डिज र स्कटल्याण्ड जस्ता बलिया टिम तथा तुलनात्मकरुपमा कमजोर ठानिएको इटली रहेको समूहमा थियो नेपाल ।
भारतको मुम्बईस्थित वानखेडे स्टेडियममा पहिलो खेलमै विश्वविजेता इंग्ल्याण्डको सामना गर्नुपर्यो । उक्त खेलमा नेपालले उत्कृष्ट खेलेर आम क्रिकेटप्रेमीको मन जित्यो । इंग्ल्याण्डसँग मात्र चार रनको झिनो हार बेहोरेको नेपाली टोलीको चौतर्फी प्रशंसा पनि भयो । पहिलो खेल राम्रो खेलेर पनि हार बेहोरेपछि दोस्रोमा नतिजा नेपालको पक्षमा आउने अपेक्षा गरिएको थियो । एक त इटलीलाई कमजोर टिमको रुपमा आकलन थियो, अर्को पहिलो खेलमा गरेको प्रदर्शनले आत्मबल थप बढाएको थियो । समर्थकहरु पनि उत्साहित थिए । तर दोस्रो खेलमा नेपालले पूरै लय गुमाउनपुग्यो । परिणाम कमजोर मानिएको इटलीसँग पराजित भयो । त्यो हारले नेपाली क्रिकेट समर्थकहरुलाई फेरि निराश बनायो । खेलाडीहरु पनि हतोत्साही भएको देखिए ।
तेस्रो खेलमा वेस्टइण्डिजविरुद्धको खेलमा पनि नतिजा सुखद आएन । नेपालले अपेक्षित प्रदर्शन सो खेलमा पनि गर्न सकेन । वेस्टइण्डिजसँग फराकिलो हार बेहोरेसँगै नेपाल प्रतियोगिताबाट बाहिरियो । र, सुपर आठमा पुग्ने सपना फेरि चकनाचुर भयो । मंगलबार साँझ वानखेडे स्टेडियममै अन्तिम खेल स्कटल्याण्डसँग खेल्दा भने पुनः लयमा फर्कंदै सान्त्वना जित निकालेको छ । स्कटल्याण्डलाई सात विकेटले हराउँदा नेपालले १४ वर्षपछि पहिलोपटक टि-२० विश्वकपमा जित निकाल्न सफल बन्यो । यसैमा खुसी मान्नुपर्ने भयो यो पटकको विश्वकप । दीपेन्द्रसिंह ऐरीको अर्धशतकीय योगदान यो जितमा महतत्वपूर्ण बन्यो ।
विश्वकप यात्रा सकेर स्वदेश फर्कंदै गर्दा नेपाली टोलीले पक्कै पनि पाठ सिकेर आएको हुनुपर्छ । अन्तिम खेलमा गरेको प्रदर्शनबाट पनि त्यो झल्किन्छ । अघिल्ला खेलका गल्तीहरु सुधारिएका छन् । अब भने नेपालले विश्वकपमा गरेका गल्तीहरुको समीक्षा गर्नैपर्छ । ती गल्तीहरुलाई सच्याउँदै अघि बढे आगामी यात्रामा राम्रो नतिजा प्राप्त हुने नै छ । अब हारबाट निराश हुने होइन, सुधारको अठोटसहित सम्पूर्ण खेलाडी, प्रशिक्षक तथा व्यवस्थापकहरु अगाडि बढून् । यसमा राज्यको तर्फबाट आवश्यक सहयोग जरुरी छ ।
