- २५० जनालाई अवैधरूपमा अमेरिका पठाएको आरोपमा बस्नेतद्वयविरुद्ध करिब एक अर्बको मुद्दा
- ९८ करोडभन्दा बढी अवैध कारोबार भेटियो
- एक अभियुक्त कारागारमा, अर्का फरार
- वर्षौंदेखि विभिन्न माध्यम प्रयोग गरी युवायुवतीलाई अमेरिका पठाइदिने प्रलोभन देखाउँदै ठूलो रकम असुल्ने गरेको खुलासा
- वैदेशिक रोजगारी वा अवैध बाटो हुँदै अमेरिका जाने प्रलोभनमा नपर्न अपिल
हामीले बैंक खाताहरू, लेनदेन विवरण र सम्पत्तिको स्रोत जाँच गर्दा अस्वाभाविक रकमको कारोबार देखियो । त्यसैका आधारमा सम्पत्ति शुद्धीकरण मुद्दा अघि बढाइएको हो ।
राजन लिम्बू
एसपी, मानव बेचविखन ब्युरो
काठमाडौं- करिब २५० जनालाई अवैध तरिकाले अमेरिका पठाउने तथा केहीलाई अमेरिका लैजाने बहाना बनाई ठगी गरेको आरोपमा दुई जनाविरुद्ध करिब एक अर्ब रुपैयाँबराबरको सम्पत्ति शुद्धीकरण मुद्दा दायर भएको छ । यससँगै मानव तस्करीको संगठित सञ्जालबारे थप विवरणसमेत सार्वजनिक भएको छ ।
जिल्ला सरकारी वकिल कार्यालय काठमाडौंले मानव बेचबिखन अनुसन्धान ब्युरोको अनुसन्धान प्रतिवेदनका आधारमा रुकुम पश्चिमको बाँफिकोट गाउँपालिका–२ का कलबहादुर बस्नेत र रुकुमपूर्वको सिस्ने गाउँपालिका-५ का अमित बस्नेतविरुद्ध मंगलबार काठमाडौं जिल्ला अदालतमा मुद्दा दायर गरेको हो ।
अनुसन्धान अनुसार उनीहरूले वर्षौंदेखि विभिन्न माध्यम प्रयोग गरी युवायुवतीलाई अमेरिका पठाइदिने प्रलोभन देखाउँदै ठूलो रकम असुल्ने गरेका थिए । केहीलाई भने गैरकानुनी बाटोहुँदै अमेरिका पु¥याइएको र कतिपयलाई विदेशका विभिन्न देशमा अलपत्र पारिएको आरोप छ ।
मुद्दामा प्रतिवादी बनाइएका कलबहादुर हाल डिल्लीबजार कारागारमा छन् । उनलाई अन्तर्राष्ट्रिय प्रहरी संगठन (इन्टरपोल) को सहयोगमा गत भदौमा दुबईबाट पक्राउ गरी नेपाल ल्याइएको थियो । उनी मानव बेचबिखन तथा ओसारपसार मुद्दामा पुर्पक्षका लागि थुनामा छन् । अर्का प्रतिवादी अमित भने फरार छन् । उनलाई फरार प्रतिवादी कायम गरी मुद्दा अघि बढाइएको हो ।
प्रहरीले सार्वजनिक गरेको विवरणअनुसार उनीहरूले अमेरिका पठाइदिने भन्दै पीडितहरूसँग लाखौंदेखि करोडौं रुपैयाँसम्म उठाएका थिए । अनुसन्धानका क्रममा धेरै पीडितले ठूलो रकम बुझाएको तर अमेरिका पुग्न नसकेको भन्दै उजुरी दिएका थिए । मानव बेचबिखन अनुसन्धान ब्युरोका प्रहरी उपरीक्षक राजन लिम्बूले अनुसन्धानका क्रममा ठूलो परिमाणमा अवैध वित्तीय कारोबार देखिएको बताए । उनले भने, ‘हामीले बैंक खाताहरू, लेनदेन विवरण र सम्पत्तिको स्रोत जाँच गर्दा अस्वाभाविक रकमको कारोबार देखियो । त्यसैका आधारमा सम्पत्ति शुद्धीकरण मुद्दा अघि बढाइएको हो ।’
उनका अनुसार कलबहादुर बस्नेतको विभिन्न बैंक खातामा ७० करोड ६० लाख ५३ हजार ७२२ रुपैयाँबराबरको अवैध कारोबार भएको भेटिएको छ । त्यस्तै फरार प्रतिवादी अमित बस्नेतको खाताबाट २७ करोड ४५ लाख २९ हजार रुपैयाँबराबरको शंकास्पद कारोबार देखिएको छ ।
प्रहरीले दुवै जनाको कूल ९८ करोड पाँच लाख ८२ हजार रुपैयाँबराबरको अवैध कारोबार पुष्टि भएको भन्दै सोही रकमबराबरको बिगो मागदाबी गरिएको जनाएको छ । अनुसन्धानमा संलग्न अधिकारीहरूका अनुसार उनीहरूले विभिन्न ‘एजेण्ट’ र बिचौलियामार्फत गाउँ–गाउँबाट युवाहरू संकलन गर्ने, भिसा प्रक्रिया मिलाइदिने, ट्राञ्जिट देशहुँदै अमेरिका लैजाने योजना बनाउनेजस्ता काम गर्दै आएका थिए । कतिपयलाई दक्षिण अमेरिकी देशहरू हुँदै जोखिमपूर्ण यात्रा गराइएको ब्युरोको प्रारम्भिक निष्कर्ष छ ।
ब्युरोका एसपी लिम्बू यो सामान्य ठगीमात्र नभई संगठित मानव तस्करीको जालो देखिएको बताउँछन् । उनका अनुसार ठगी घटनामा विभिन्न देशमा सम्पर्क रहेका व्यक्तिहरू प्रयोग भएको संकेत भेटिएको छ । पीडितहरूले बयानमा अमेरिका पठाइदिने भनिएपछि ३० लाखदेखि ८० लाख रुपैयाँसम्म बुझाएको देखिएको छ । केहीले घरजग्गा बेचेर वा ऋण लिएर रकम बुझाएको बताएका छन् । अमेरिका पुग्न नसकेपछि उनीहरू आर्थिक र मानसिक समस्यामा परेका थिए ।
प्रहरीका अनुसार यस प्रकरणमा थप व्यक्तिहरूको संलग्नता हुन सक्ने भएकाले अनुसन्धान जारी छ । फरार प्रतिवादी अमितको खोजीका लागि प्रहरी परिचालन गरिएको र अन्तर्राष्ट्रिय समन्वय पनि भइरहेको जनाइएको छ ।
यस घटनापछि वैदेशिक रोजगारी वा अवैध बाटो हुँदै अमेरिका जाने प्रलोभनमा नपर्न प्रहरी र सरोकारवाला निकायहरूले सर्वसाधारणलाई सचेत गराएका छन् । ब्युरोले भनेको छ, ‘विदेश पठाइदिने भन्दै अस्वाभाविक प्रस्ताव आएमा तुरुन्त सम्बन्धित निकायमा जानकारी दिनुहोस् ।’
