कठमाडाैं - नेपाल एशोसिएशन अफ राफ्टिङ एजेन्सिज (नारा) ले नेपाल पर्यटन बोर्डको सहकार्यमा आफ्नो गौरवशाली इतिहासलाई स्मरण गर्दै आगामी २०२६ मा "२४ औं हिमालयन ह्वाइटवाटर च्यालेन्ज २०२६ तथा ५०औं अन्तर्राष्ट्रिय ह्वाइटवाटर राफ्टिङ र कायाकिङ महोत्सव" आयोजना गर्न लागेको सहर्ष जानकारी गराइन्छ।
नेपालमा साहसिक जलयात्राको इतिहास सन् १९६० को दशकदेखि सुरु भएको मानिन्छ। सन् १९६४ मा फ्रान्सको एक्सपेडिसन टोलीले त्रिशूलीमा र सन् १९६५ मा सर एडमण्ड हिलारीको टोलीले सुनकोशीमा गरेको जलयात्रा यस क्षेत्रका कोशेढुङ्गा हुन्।
सन् १९७४ मा अमेरिकी गाइड माइक एगरले त्रिशूलीमा सफल यात्रा गरी छाडेका उपकरणहरूबाट सन् १९७५ मा हिमालयन रिभर एक्सप्लोरेशन (HRE) मार्फत नेपालमा व्यावसायिक राफ्टिङको विधिवत् आरम्भ भएको थियो।
महोत्सवको मुख्य आकर्षणमा केवल एक प्रतियोगिता मात्र नभई नेपालको ५० औं वर्ष लामो व्यावसायिक जलयात्रा इतिहासको उत्सव पनि हो । नेपालमा राफ्टिङको जग बसाल्ने HRE (Himalayan River Exploration) का संस्थापकहरूलाई विशेष सम्मान गरिने आयाेजकले जनाएकाे छ। खेल विधाहरूमा कायाकिङतर्फ २ र राफ्टिङतर्फ १ गरी जम्मा ३ विधामा प्रतिस्पर्धा हुने आयाेजकले जनाएकाे छ। आयाेजकका अनुसा उक्त च्यालेन्जमा ३० जना अन्तर्राष्ट्रिय खेलाडी र १४० जनाभन्दा बढी राष्ट्रिय खेलाडी (कायाकिङ र राफ्टिङ) गरी कुल १७० खेलाडीको सहभागिता रहनेछ।
