कांग्रेस छाडेर एमाले प्रवेश गरेका कपिलवस्तुका वीरेन्द्रकुमार कनौडियाले प्रतिनिधिसभा सदस्यको उम्मेदवार बन्ने मौका पाए । माघ ३ गते एमाले प्रवेश गरेका उनी कांग्रेस कपिलवस्तु क्षेत्र नम्बर ३ बाट उम्मेदवारका लागि एक्लो नाम सिफारिसमा परेका थिए । कनौडियाले सोही साँझ एमालेबाट कपिलवस्तु क्षेत्र नम्बर ३ को टिकट पाए । कनौडिया यसअघि प्रदेशसभामा कांग्रेसको तर्फबाट लुम्बिनी प्रदेश संसदीय दलको नेतासमेत थिए ।
अघिल्लो निर्वाचनमा सर्लाही-४ बाट स्वतन्त्र उम्मेदवार बनेर प्रतिनिधिसभा सदस्य बनेका अमरेश सिंह राष्ट्रिय स्वतन्त्र पार्टी (रास्वपा) प्रवेश गरे । रास्वपा प्रवेश गर्नासाथ उनले सोही क्षेत्रबाट प्रतिनिधिसभा सदस्यको उम्मेदवार बन्न टिकट पाए । सोही क्षेत्रमा कांग्रेसबाट निर्वाचित हुँदै आएका अमरेशलाई २०७९ मा उक्त दलले कारबाही गरेको थियो । यसरी नै यो निर्वाचनमा दल अदलबदल गर्नेको संख्या बढ्दो छ । कांग्रेस सभापति गगन थापा होस् या एमाले अध्यक्ष केपी शर्मा ओली । नेपाली कम्युनिस्ट पार्टीका अध्यक्ष पुष्पकमल दाहाल होस् या रास्वपा सभापति रवि लामिछाने, अरु दलबाट आएकाहरुलाई छाती फुलाएर स्वागत गरिरहेका छन् ।
निर्वाचन जति नजिकियो दल फेर्ने प्रवृत्ति बढ्दो छ । जनआक्रोशका कारण भदौ २३ र २४ मा जेन-जी विद्रोह भयो । दलका नेताहरु जनताको आक्रोशलाई सम्बोधन गर्न निर्वाचन हुन लागेको बताउँछन् । तर दलप्रति आक्रोश बढ्नुका एउटा कारण अरु दलबाट आएकालाई सुरुमै अवसर दिनु पनि हो । वर्षौं पार्टीमा दुःख गर्ने इमान्दार र सक्षम नेता कार्यकर्ताले अवसर नपाउँदा तरमाराहरु सधैँ तर मार्न सफल हुन्छन् ।
कुनै व्यक्ति निकै विवादित हुन्छन् । तर आफ्नो दलमा आएपछि ‘सात खुन माफ’ हुन्छ । सुनपानी छर्र्किएर चोखो बनाएझैं चोखो बनाउने गरिन्छ । यो घटनाले लामो समय पार्टीमा खटेका नेताहरु निराश हुन्छन् । यतिमात्र हैन नजिकबाट नियालिरहेका सर्वसाधारणदेखि कार्याकर्तालेसमेत यस्ता घटना मूल्यांकन गरिरहेका हुन्छन् । जसले गर्दा नै हो, हरेक निर्वाचनमा नयाँलाई मौका दिनुपर्छ भनेर मत बदल्ने गरेको । यसले राजनीतिक दलका नेताहरुको बेइमानीमाथि न्याय त मिल्छ तर राजनीतिक स्थिरता भने पाउँदैन ।
हाम्रो जस्तो मुलुक हरेक निर्वाचनमा यस्तै लहरका कारण प्रताडित हुँदै आएको छ । दलले यस्तो विषय थाहा पत्तो नपाएझैं मौन बसेको देखिन्छ । हुन त हाम्रोमा ‘आफ्नो आङमा भैसी नदेख्ने, अर्काको आङमा जुम्रा पनि देख्ने’ भन्ने उक्ति व्यवहारमै देखिन्छ । अब जनताप्रति र देशप्रति उत्तरदायी हुने हो भने यस्तो अदलीबदली रोक्नुपर्छ । जनताले नरुचाएका नेतालाई आफ्नो दलमा भित्र्याएर फोहोरी राजनीति नगरेकै राम्रो ।
