- मंगलबार खोटाङमा एमालेबाट केपिलासगढी गाउँपालिका अध्यक्षमा निर्वाचित पूर्वअध्यक्ष कृष्णकुमार राई र शुक्रबार सिन्धुपाल्चोकको बाह्रबिसे नगरपालिकाका पूर्वमेयर निमफुञ्जो शेर्पा नेपाली कम्युनिस्ट पार्टी (नेकपा) प्रवेश
- शनिबार कांग्रेस महामन्त्री प्रदीप पौडेलले गतिशील लोकतान्त्रिक पार्टीका केन्द्रीय सदस्यसहित पाँच जनालाई कांग्रेसमा भित्र्याए
- पार्टीभित्रको किचलो देखाउँदै कांग्रेस छाडेका कपिलवस्तुका वीरेन्द्रकुमार कनौडियाले कपिलवस्तु-३ बाट पाए टिकट
काठमाडौं- सुनसरीका कांग्रेस नेता डा. अब्दुल हुसेन अन्सारी माघ ५ गते एमाले प्रवेश गरे । कांग्रेसमा विशेष महाधिवेशनको कलहले उनी एमाले पसेका थिए । एमाले पसेकै दिन उनले सुनसरी-४ को टिकट पाए । यद्यपि, भोलिपल्टै उनको टिकट खोसियो । यो क्षेत्रमा एमालेले जगदिश कुशियतलाई उम्मेदवार बनायो ।
पार्टीभित्र किचलो देखाउँदै कांग्रेस छाडेका कपिलवस्तुका वीरेन्द्रकुमार कनौडियाले भने हुसेनको नियति भोग्नुपरेन । माघ ३ गते एमाले प्रवेश गरेका उनी कांग्रेस कपिलवस्तु क्षेत्र नम्बर ३ बाट उम्मेदवारका लागि एक्लो नाम सिफारिसमा परेका थिए । कनौडियाले सोही साँझ एमालेबाट कपिलवस्तु क्षेत्र नम्बर ३ को टिकट पाए । कनौडिया यसअघि प्रदेश सभामा कांग्रेसको तर्फबाट लुम्बिनी प्रदेश संसदीय दलको नेतासमेत रहेका थिए ।
हेर्दा सामान्य लागे पनि निर्वाचनपूर्व हुने दल अदलबदलले उम्मेदवारहरूको विश्वसनीयता, दलको निष्पक्षता र राजनीतिक स्थिरतामा प्रश्न उठाउँछ ।
अर्जुन अर्याल
उपप्राध्यापक, त्रिवि
माघ १४ गते कांग्रेस सभापति गगन थापाले आफ्नो चुनावी क्षेत्रमा चार जना वडा अध्यक्षलाई कांग्रेस प्रवेश गराए । सर्लाही-४ मा पर्ने गोडैता नगरपालिका-५ का वडाध्यक्ष प्रकाशप्रसाद गुप्ता भने भोलिपल्टै आफ्नो पार्टी जनता समाजवादी पार्टी (जसपा) फर्किए ।
यी त निर्वाचन नजिकिँदा भएका रोचक प्रवेश हुन् । यी बाहेक हिजोआज दलहरुले आफ्नो चुनावी क्षेत्रमा पार्टी प्रवेश गराउने कार्यक्रम बढाइरहेका छन् । दल अदलबदल गर्दै खादामाला लगाउनेको लहर दैनिक बढिरहेकै छ ।
शनिबारमात्र कांग्रेस महामन्त्री प्रदीप पौडेलले गतिशील लोकतान्त्रिक पार्टी (गलोपा)का केन्द्रीय सदस्यसहित पाँच जनालाई कांग्रेस प्रवेश गराए । कांग्रेस सभापति थापाको उपस्थितिमा काभ्रे-२ बाट समानुपातिक उम्मेदवार रहेको गलोपाका केन्द्रीय सदस्य डा. अल्का सापकोटा र काठमाडौं-२ बाट समानुपातिक उम्मेदवार एवं केन्द्रीय सदस्य नग्मा खरेल छन् । यसैगरी, संस्थापक केन्द्रीय सदस्य जगन्नाथ लामिछाने, बुसन केडी प्रसाईं र इन्दिरा खाती सुनार पनि कांग्रेस प्रवेश गरे ।
लामिछाने २०७९ को निर्वाचनमा यही क्षेत्रका प्रदेश सभा-२ बाट स्वतन्त्र उम्मेदवार थिए । कांग्रेसका पुराना कार्याकर्ता लामिछानेले त्यतिबेला कांग्रेसले श्याम खड्कालाई उम्मेदवार बनाएपछि असन्तुष्टि जनाउँदै बागी उम्मेदवारी दिएका थिए । स्वतन्त्रबाट लडेका खतिवडाले त्यतिबेला ६५२ मत पाएका थिए । कांग्रेसका खड्काले ९ हजार ७४२ मत पाएर निर्वाचित भएका थिए ।
शुक्रबार सिन्धुपाल्चोकको बाह्रबिसे नगरपालिकाका पूर्वमेयर निमफुञ्जो शेर्पा नेपाली कम्युनिस्ट पार्टी (नेकपा) प्रवेश गरे । उनलाई नेकपाका संयोजक पुष्पकमल दाहालले पार्टीमा स्वागत गरे । २०७४ मा बाह्रबिसे नगरपालिकामा एमालेबाट मेयर जितेका शेर्पाले माघ ९ गते एमाले परित्याग गरेका थिए ।
शेर्पाझैं मंगलबार खोटाङमा एमालेबाट निर्वाचित पूर्वगाउँपालिका अध्यक्ष कृष्णकुमार राई नेकपामा प्रवेश गरे । २०७४ सालमा एमालेबाट कोपिलासगढी गाउँपालिका अध्यक्ष निर्वाचित राई माघ २० गते नेकपामा प्रवेश गरेका हुन् । नेकपा प्रवेश गरेका राई एमालेका पूर्वसचिवालय सदस्य हुन् । उनी २०७९ को स्थानीय तहको निर्वाचनमा भने पराजित भएका थिए ।
यसरी नै डोल्पामा मितेरी नेपाल पार्टीबाट उम्मेदवारी दर्ता गरेकी जुनु भण्डारी कांग्रेस प्रवेश गरिन् । माघ ९ गते उनी नेपाली कांग्रेस पार्टी प्रवेश गरेकी हुन् । शनिबारमात्र सप्तरी-३ अन्तर्गत पर्ने रुपनी गाउँपालिका अन्तर्गत तत्कालिन रायपुरका पूर्वगाविस उपाध्यक्ष हिरालाल मण्डल कांग्रेस छाडेर जनता समाजवादी पार्टी नेपालमा गरेका छन् । यो जसपा नेपालका अध्यक्ष उपेन्द्र यादवको निर्वाचन क्षेत्र हो ।
निर्वाचन नजिकिँदा पार्टीको प्रचार विभागहरुले आफ्नो दलमा धेरै नेता कार्याकर्ता भित्रिएको भन्दै प्रचारबाजी गर्न थालेका छन् । यसरी प्रचारबाजी गर्नेमा नेपाली कांग्रेस सबैभन्दा धेरै अगाडि देखिएको छ । त्रिभुवन विश्वविद्यालयका उपप्राध्यापक अर्जुन अर्याल निर्वाचनको पूर्वसन्ध्यामा दल अदलबदल गर्नु गम्भीर समस्या भएको बताउँछन् । यसले दलहरुप्रति विश्वसनीयता र राजनीतिक स्थिरतामै प्रश्न उठाउने उनको भनाइ छ । नेपालमा दल अदलबलको घटना सामान्यजस्तो भए पनि यस्तो विषयमा दलहरु गम्भीर हुनुपर्ने अर्यालले बताए ।
‘हेर्दा सामान्य लागे पनि निर्वाचनपूर्व हुने दल अदलबदलले उम्मेदवारहरूको विश्वसनीयता, राजनीतिक दलका निष्पक्षता र राजनीतिक स्थिरतामा प्रश्न उठाउँछ,’ अर्यालले भने । यस्तो गतिविधि रोक्न कानुनी नियन्त्रणसमेत आवश्यक पर्ने उनी बताउँछन् ।
विश्वका धेरै देशले निर्वाचनपूर्व यस्ता गतिविधि रोक्न कानुनी प्रावधान नै राखेको देखिन्छ । थाइल्याण्डले उम्मेदवार हुन कम्तीमा ९० दिनसम्म लगातार एउटा दलको सदस्य हुनुपर्ने प्रावधान राखेको छ र ब्राजिलमा निर्वाचनमा उम्मेदवार बन्नका लागि राजनीतिक दलसँग कम्तीमा छ महिनाको सदस्यता हुनुपर्छ ।
संयुक्त अधिराज्यमा कञ्जर्भेटिभ र लेबर पार्टीहरूले उम्मेदवारहरूका लागि छ महिनादेखि एक वर्षसम्मको सदस्यता आवश्यक गर्छन् । साइप्रस र डेनमार्कका अधिकांश दलहरूले छ महिनादेखि एक वर्षसम्मको सदस्यता आवश्यक गर्छन् । स्वीडेन, रोमानिया, आयरल्याण्ड, क्रोएसिया, ग्रीस, र अस्ट्रियामा पनि यस्ता नियमहरू सामान्य छन् ।
नेपालमा भने उम्मेदवार बन्न खासै कडा प्रावधान छैन, जसले गर्दा उम्मेदवारहरूले सजिलै दल परिवर्तन गर्न सक्ने जानकारहरु बताउँछन् । जसले गर्दा वर्षौं पार्टीमा खटिरहेका इमान्दार र सक्षम नेता कार्यकर्ता ओझेलमा पर्ने र तरमाराहरु सधैँ तर मार्न सफल हुन्छन् ।
