काठमाडौं- राष्ट्रिय आदिवासी जनजाति विकास प्रतिष्ठान (एनएफडिन) को आयोजनामा रजत जयन्ति तथा नेपाल आदिवासी ज्ञान सम्मेलन /महोत्सव–२०२६ काठमाडौंस्थित राष्ट्रिय सभा गृहमा आयोजना हुँदै छ।
“ज्ञानको साझा, सम्पदाको संरक्षण, भविष्यको निर्माण” भन्ने मूल नारासहित आयोजना हुन लागेको सम्मेलनले नेपालका आदिवासी जनजातिको मौलिक ज्ञान, संस्कृति, परम्परा र पहिचानलाई राष्ट्रिय तथा अन्तर्राष्ट्रिय स्तरमा उजागर गर्ने लक्ष्य लिएको आयोजकले जनाएको छ।
सम्मेलनको उद्घाटन कार्यक्रम फेब्रुअरी ८ आइतबार दिउँसो १ बजे सुरु भएको छ। उद्घाटन समारोहको प्रमुख अतिथिका रूपमा सम्माननीय राष्ट्रपति रामचन्द्र पौडेल सहभागी हुने कार्यक्रम रहेको छ। कार्यक्रममा गृह मन्त्री सम्माननीय ओमप्रकाश अर्याल, राष्ट्रिय मानव अधिकार आयोगका अध्यक्ष तप बहादुर मगर, आदिवासी जनजाति आयोगका अध्यक्ष रामबहादुर थापा मगर, थारु आयोगका अध्यक्ष सुबोध सिंह थारु, नेफिन अध्यक्ष गेल्जे लामा शेर्पालगायतको उपस्थिति रहने जनाएको छ।
उद्घाटन कार्यक्रममा राष्ट्रिय गान तथा आदिवासी गीत प्रस्तुत गरिनेछ भने सुनुवार समुदायको शान्यादार शिल नृत्य र भोटे समुदायको स्याप्रो नृत्य सहित विभिन्न आदिवासी सांस्कृतिक प्रस्तुति समावेश गरिएका छन्। कार्यक्रममा विभिन्न क्षेत्रमा योगदान पुर्याएका व्यक्तित्वहरूलाई सम्मान पनि गरिनेछ।
उद्घाटन सत्रपछि सोही दिन दिउँसो मुख्य भाषण सत्र आयोजना हुनेछ। उक्त सत्रमा प्रा. डा. महेन्द्र पी. लामाले “विश्वमा आदिवासी जनताको अवस्था: भारतको अनुभवबाट नेपालले के सिक्न र के नसिक्न सक्छ” विषयमा मुख्य प्रस्तुति दिने कार्यक्रम रहेको छ।
सम्मेलनमा आदिवासी ज्ञान, अधिकार, संस्कृति, नीति तथा अन्तर्राष्ट्रिय अभ्याससम्बन्धी बहस, प्रस्तुति र अनुभव आदान–प्रदान गरिने आयोजकको भनाइ छ।
कार्यक्रम एनएफडिनको आयोजनामा तथा काठमाडौँ महानगरपालिका, एफएओ नेपाल र डब्लुडब्लुएफ नेपालको सहकार्यमा सम्पन्न हुँदैछ।
