हिमपात र वर्षासँगै देशभार चिसो बढेको छ । यसले जनजीवन प्रभावित हुन थालेका छन् । विशेषगरी हिमाली क्षेत्रमा हिमपातलले दैनिकी कष्टकर बनाएको छ । हिउँले सडक ठप्प हुँदा यातायात बन्द भएका छन् । यसले कतिपय ठाउँमा यात्रीहरु अलपत्र परेका छन् ।
चिसोबाट बच्न प्रायः विद्यालयहरु बन्द गरिएका छन् । विशेषगरी बालबालिका, वृद्धवृद्धा र बिरामी व्यक्तिहरुलाई हिउँ र चिसोको प्रभावबाट जोगाउनुपर्छ । हिमालमात्रै नभएर पहाड र तराई क्षेत्रका जनजीवन पनि चिसोले प्रभावित तुल्याएको छ । यहीबीच स्वास्थ्य तथा जनसंख्या मन्त्रालयले हिमपातका कारण विभिन्न जोखिम निम्तन सक्ने भन्दै सावधानी अपनाउने सर्वसाधारणमा अनुरोध गरेको छ ।
मन्त्रालयले शरीरको सबै भाग ढाक्ने गरी बाक्लो र न्यानो लुगा लगाउन, सुत्दा न्यानो ओढ्ने प्रयोग गर्ने र टाउको एवं छाती अनिवार्य ढाक्न, बेलाबेला तातो पानी र पोषिलो तातो झोल पदार्थ प्रशस्त मात्रामा पिउन, बालबालिका, गर्भवती, सुत्केरी र ज्येष्ठ नागरिकको विशेष हेरचाह गर्न आग्रह गरेका छ । त्यसैगरी कोठा न्यानो पार्न आगो वा हिटर बाल्दा हावा ओहोरदोहोर हुने व्यवस्था मिलाउनसमेत मन्त्रालयले आग्रह गरेको छ ।
जाडोयाम सुरु भएसँगै सामान्यभन्दा तापक्रम कम भएर विभिन्न क्षेत्रमा हुने शीतलहर, हुस्सु, कुहिरो र हिमपात जस्ताले जनस्वास्थ्यमा प्रतिकूल असर पार्ने तथा रुघाखोकी, ज्वरो, दम बढ्ने वा सास फेर्न गाह्रो हुने, हाइपोथर्मिया जस्ता लक्षण भएका बिरामीहरु बढ्ने गरेका छन् । चिसोका कारण देखिने समस्या रहिरहे वा बढेमा ढिला नगरी नजिकैको स्वास्थ्य संस्थामा सम्पर्क गर्न वा हेलो स्वास्थ्य कल सेन्टर १११५ बाट परामर्श लिनसमेत अनुरोध गरिएको छ । जाडोयाममा बालबालिका, गर्भवती, वृद्धवृद्धा तथा दीर्घरोगी बढी जोखिम हुने गरेको देखिन्छ । पछिल्ला वर्षहरूमा जाडोयामसँगै बढ्ने वायु प्रदूषणले मुटु, फोक्सो, मस्तिष्कलगायत अंगमा गम्भीर असर पार्नाका साथै दम, क्यान्सरजस्ता दीर्घरोगको जोखिम र मृत्युदर बढाउने गरेको बताइन्छ ।
चिसोका कारण उत्पन्न हुने सक्ने लक्षण वा रोगलाई न्यून गर्न तथा लाग्न नदिन धुवाँधुलोबाट बच्ने, पोषणयुक्त सन्तुलित खाना खाने, न्यानो लुगा लगाउने गर्न मन्त्रालयले सुझाएको छ । यसैगरी भिटामिन सी पर्याप्त मात्रा भएका सुन्तला, कागती र अमला खाने, मौसमअनुसारको ताजा फलफूल तथा सागपात पर्याप्त मात्रामा खाने, सरसफाइमा ध्यान दिन आग्रह गरिएको छ । यी सुझावलाई सबैले पालना गर्नु नै बुद्धिमानी हुन्छ ।
