- नेकपा उम्मेदवार तथा पूर्वमन्त्री हितबहादुर तामाङ तेस्रोपटक जितको खोजीमा
- काठमाडौंबाट फर्किएका कांग्रेस उम्मेदवार डा. प्रकाशशरण महत पहिलोपटक गृहजिल्लामा चुनाव लड्दै
- एमालेका बद्री मैनाली र रास्वपाका डा. विक्रम तिमिल्सिना पनि प्रतिस्पर्धामा
हामीले विगतमा जनताले नदेखेका काम गरेका छौँ । मत लिएर गएपछि जनताको शिर निहुरिने कुनै गलत काम गरेका छैनौँ । स्थानीयको सुख-दुःखमा निरन्तर जोडिएको छु । मतदातासँगको संवादले पनि यो पटक जित सुनिश्चित भएको विश्वास दिलाएको छ ।
हितबहादुर तामाङ
उम्मेदवार, नेकपा
काठमाडौं- नुवाकोट क्षेत्र नम्बर १ बाट लगातार तेस्रोपटक प्रतिनिधिसभा सदस्य बन्ने लक्ष्यसहित नेपाली कम्युनिस्ट पार्टी (नेकपा)का उम्मेदवार हितबहादुर तामाङ चुनावी मैदानमा छन् । अघिल्ला दुई निर्वाचनमा फरक-फरक गठबन्धनको समर्थनमा विजयी भएका तामाङ यसपटक भने कुनै ठूलो दलको औपचारिक साथ बिनै आफ्नै बलबुतामा चुनाव जित्ने प्रयासमा छन् ।
०७४ सालको निर्वाचनमा वाम गठबन्धन र २०७९ मा कांग्रेससँगको तालमेलमा तत्कालीन नेकपा माओवादीबाट उम्मेदवार बनेका तामाङ दुवैपटक संसद् पुगेका थिए । तर, यो पटक एमाले र कांग्रेस दुवैको साथ नपाउँदा उनको चुनावी यात्रा चुनौतीपूर्ण देखिएको छ । देशभर राष्ट्रिय स्वतन्त्र पार्टी (रास्वपा)को बढ्दो प्रभावका कारण नुवाकोट-१ मा तेस्रो शक्तिको मतले नतिजा निर्धारण गर्ने विश्लेषण भइरहेको छ ।
मलाई यसअघि नै आफ्नो जन्मथलोबाट चुनाव लड्ने मन थियो, के के मिलेको थिएन, यसपटक जुर्यो र म त्यहाँको जनादेश लिएर संसद् आउँछु ।
डा. प्रकाशशरण महत
उम्मेदवार, नेपाली कांग्रेस
तामाङ भने आफू जनताको असली प्रतिनिधि भएको दाबी गर्दै फेरि पनि विजयी हुनेमा ढुक्क छन् । ‘हामीले विगतमा जनताले नदेखेका काम गरेका छौँ । मत लिएर गएपछि जनताको शिर निहुरिने कुनै गलत काम गरेका छैनौँ,’ तामाङ भन्छन्, ‘स्थानीयको सुख-दुःखमा निरन्तर जोडिएको छु । मतदातासँगको संवादले पनि यो पटक जित सुनिश्चित भएको विश्वास दिलाएको छ ।’
वाकोट-१ का सात पालिकामध्ये तीन पालिकामा अध्यक्ष, उपाध्यक्षसहित बहुमत जनप्रतिनिधि आफ्नो पक्षमा रहेको उल्लेख गर्दै उनले संगठनात्मक आधार मजबुत रहेको बताए । ककनी, पञ्चकन्या र दुप्चेश्वर गाउँपालिकामा नेकपाको जितले आत्मविश्वास बढाएको उनको भनाइ छ ।
यस निर्वाचनमा नेपाली कांग्रेसले काठमाडौंबाट डा. प्रकाशशरण महतलाई गृह जिल्ला नुवाकोट फर्काएको छ । डा. महत काठमाडौं-४ बाट २०७४ मा उम्मेदवार थिए । त्यसबेला उनी पराजित भए । २०७९ मा उनी समानुपातिक सांसद भए । डा. महतलाई कांग्रेसमा निर्वाचन जित्न नसक्ने नेताको रूपमा लिइन्छ । उनी जतिपटक संसद् पुगे, समानुपातिकबाट मात्रै हो । यसपटक उनको नाम काठमाडौं-५ बाट पनि उम्मेदवारको रूपमा सिफारिस भएको थियो । तर, उनी गृहजिल्ला नुवाकोट फर्किएका हुन् ।
उनको चुनावी भिडन्त नेकपाका पूर्वमन्त्रीसमेत रहेका हितबहादुरसँग हुने भएको हो । तामाङले २०७४ मा डा. प्रकाशशरण महतकै दाजु डा. रामशरण महतलाई पराजित गरेका थिए । त्यसअघि पहिलो र दोस्रो संविधानसभामा पनि रामशरणसँगै तामाङले पराजय बेहोरेका थिए । यसपटक भने भाइ प्रकाशशरणले तामाङसँग प्रतिस्पर्धा गर्ने भएका हुन् ।
‘मलाई यसअघि नै आफ्नो जन्मथलोबाट चुनाव लड्ने मन थियो, के के मिलेको थिएन, यसपटक जुर्यो र म त्यहाँको जनादेश लिएर संसद् आउँछु,’ उनले प्रभावसँग भने । नेकपा एमालेले तामाङसँग अघिल्लोपटक (२०७९) मै प्रतिस्पर्धा गरेका नेता बद्री मैनालीलाई उम्मेदवार बनाएको छ । मैनाली तामाङसँग झिनो मतान्तरले पराजित भएका थिए । राष्ट्रिय स्वतन्त्र पार्टी (रास्वपा)ले डा. विक्रम तिमिल्सिनालाई मैदानमा उतारेको छ ।
डा. तिमिल्सिना भन्छन्, ‘अहिलेको राजनीतिले देशलाई अघि बढाउन सकेन भनेर आम असन्तुष्टि छ । देशको राजनीतिलाई सङ्ल्याउन, बदल्न र सही बाटो हिँडाउन लागेको छु । जिल्ला र उम्मेदवारको कुरा होइन, देशभर महाअभियान सुरु भएको छ ।’
२०७९ को प्रतिनिधिसभाको निर्वाचनमा समानुपातिकतर्फ १६ हजार २६७ मतसहित एमाले पहिलो, १५ हजार ७५१ मतसहित कांग्रेस दोस्रो र १५ हजार १२७ मतसहित माओवादी तेस्रो भएको थियो । त्यसबेला रास्वपाले ५ हजार ४४९ मत ल्याएको थियो । यसरी एमाले, कांग्रेस र माओवादीबीच मतान्तर निकै कम रहेको र रास्वपाले पनि उल्लेख्य मत ल्याएको तथ्यले यस पटकको चुनाव झनै रोचक बनेको छ ।
नुवाकोट-१ को चुनावी मैदानमा २३ उम्मेदवार रहेका छन् । यद्यपि हितबहादुर तामाङ, डा. प्रकाशशरण महत, बद्री मैनाली र डा. विक्रम तिमिल्सिनाबीच मुख्य प्रतिस्पर्धा हुने देखिएको छ ।ह्याट्रिकको लक्ष्यसहित मैदानमा उत्रिएका तामाङका लागि यो निर्वाचन व्यक्तिगत प्रतिष्ठासँगै आफ्नै राजनीतिक हैसियत प्रमाणित गर्ने अवसरका रूपमा हेरिएको छ ।
