काठमाडौं - काठमाडौं महानगरपालिकाको कार्यवाहक प्रमुख सुनिता डङ्गोलले फोहर व्यवस्थापन चक्रमा कमजोरी हुन नदिन वातावरण व्यवस्थापन विभागका अधिकारीलाई निर्देशन दिएका छन् ।
कार्यवाहक डङ्गोलले स्रोतमा फोहर वर्गीकरण गर्ने, वर्गीकृत फोहरलाई छुट्टै सङ्कलन, ढुवानी र अन्तिम व्यवस्थापन गर्ने क्रममा प्रयोग गरिएका अभ्यासलाई निरन्तरता दिन र प्राप्त उपलब्धिमा ह्रास आउन नदिनेगरी कार्यसञ्चालन गर्न वातावरण व्यवस्थापन विभागका अधिकारीहरूलाई निर्देशन दिएका हुन् ।
विभागहरूले अहिलेसम्म गरेका कामको नतिजाका बारेमा जानकारी लिने क्रममा आज वातावरण व्यवस्थापन विभागका अधिकारीहरूसँग छलफल गर्दै उनले यस्तो बताएका हुन् । “कामलाई सहज बनाउन नीतिगत रूपमा गर्नुपर्ने केही काम छन् भने म त्यसमा सहजीकरण गर्नेछु । सहरी स्वच्छता, सरसफाइ र वातावरणीय सुधारमा हामीले प्रयोग गरेका असल अभ्यास, परिचालन गरेका जनशक्ति, साधन र उपकरणको क्षमतामा कमी आउनु हुँदैन”, उनले अधिकारीहरूसँग भने ।
“नीति, प्रविधि, समन्वय, सहकार्य र उत्तरदायित्वजस्ता धेरै पक्षको संयोजनले उत्पादित फोहर व्यवस्थापनमा दिगोपना प्राप्त गर्न सकिन्छ । यसकारण कामपाभित्रको फोहरको प्रकृति, स्रोतमा वर्गीकरण, सङ्कलन, ढुवानी र अन्तिम व्यवस्थापनसँगै ल्याण्डफिल साइटको उपयोग, यससँग स्थानीय तथा अन्य पालिकाको सम्बन्ध, अन्तर सरकार सम्बन्धित कार्यक्रम लेखाजोखा गरौँ । तथ्य विश्लेषण गरौँ । यसका आधारमा कार्यक्रमलाई व्यावहारिक र वैज्ञानिक बनाउँदै लैजानुपर्छ”, उनले भने ।
छलफलमा प्रमुख प्रशासकीय अधिकृत सरोज गुरागाईँले, सहरमा फोहर सङ्कलन गर्ने, ढुवानी गर्ने तथा अन्तिम व्यवस्थापन गर्ने अभ्यासलाई थप प्रभावकारी बनाउँदै लान आवश्यक रहेको बताए । त्यस क्रममा कामपा वातावरण विभागका प्रमुख सरिता राईले विभागका नियमित र आकस्मिक कामका बारेमा जानकारी गराउँदै कामलाई प्रविधिमा जोड्दै लगेर नतिजा दिने विभागका कार्यक्रमसमेत सुनाएका थिए ।
