काठमाडाैं - उपराष्ट्रपति रामसहाय प्रसाद यादवले वसन्त पञ्चमी तथा सरस्वती पूजा- २०८२ को शुभकामना व्यक्त गरेका छन् ।हरेक वर्ष माघ शुक्लपक्ष पञ्चमीका दिन उल्लासपूर्वक मनाइने वसन्त पञ्चमी तथा सरस्वती पूजाको शुभ अवसरमा उपराष्ट्रपति यादवले स्वदेश तथा विदेशमा रहेका सबै नेपाली दिदीबहिनी तथा दाजुभाइहरूमा सुख, शान्ति, समृद्धि, सुस्वास्थ्य र उत्तरोत्तर प्रगतिको मंगलमय शुभकामना एक विज्ञप्ति जारी गरी व्यक्त गरेका हुन् ।
विज्ञप्तिका अनुसार विद्या, विवेक, कला र संगीतकी अधिष्ठात्री देवी सरस्वतीको आराधना गर्ने परम्परा यस पर्वको मूल सार हो । यस अवसरमा शैक्षिक संस्थानहरूमा सांगीतिक कार्यक्रम तथा पूजा–अर्चना गरिनुले ज्ञान र संस्कृतिप्रति सम्मान प्रकट गर्नु हो । यस दिन पुस्तक, कलम, वाद्ययन्त्र आदिको पूजा गर्ने परम्पराले अध्ययन–अभ्यासमा प्रयोग हुने साधनलाई आदर गर्नुपर्ने सन्देश दिन्छ । अभिभावकहरूले बालबालिकाको अक्षरारम्भ गर्ने परम्परा पनि यस पर्वको विशेषता हो ।
'देशभरका सरस्वती मन्दिरहरूमा मेला लाग्ने, सार्वजनिक पण्डालमा सामूहिक पूजा गर्ने, भजन–कीर्तन तथा वसन्त श्रवण गरिनुले हाम्रो मौलिक परम्परा र सांस्कृतिक सम्पदाको संरक्षणमा योगदान पुग्दछ । देवी सरस्वतीको प्रतिमाको विसर्जनसँगै हुने धार्मिक झाँकीहरूले मौलिक संस्कृतिको जगेर्ना गर्ने प्रेरणा दिन्छन् ' विज्ञप्तिमा भनिएकाे छ ।
'यस पर्वलाई श्रीपञ्चमीका रूपमा पनि मनाइन्छ, जसले कृषिसँग सम्बन्ध जोडेको छ । मधेशमा हलो पूजा गर्ने तथा कृषिश्रमिकलाई सम्मान गर्ने परम्परा मौलिक संस्कृतिको जीवन्त उदाहरण हुन् । आधुनिकताले केही परम्परा कमजोर भए पनि यसको पुनर्जीवन आवश्यक छ, किनभने कृषि हाम्रो अर्थतन्त्रको मेरुदण्ड हो ।'विज्ञप्तिमा उल्लेख गरिएकाे छ , 'वसन्त पञ्चमीको अर्को विशेषता यसको सर्वधर्म स्वीकार्यता हो । हिन्दू धर्मावलम्बीहरूले देवी सरस्वतीको पूजा गर्ने, बौद्ध धर्मावलम्बीहरूले मञ्जुश्रीको आराधना गर्ने, मुस्लिम समुदायले सुफी वसन्तका रूपमा मनाउने परम्परा यस पर्वलाई बहुधार्मिक उत्सवको रूपमा स्थापित गर्दछ ।'
उनले विज्ञप्तिमा भने ,'नेपालको गणतन्त्रात्मक संविधानले बहुजाति, बहुभाषा, बहुसंस्कृति र विविध भेषभूषालाई संरक्षण गर्दै राष्ट्रिय एकतालाई बलियो बनाएको छ । वसन्त पञ्चमीले आपसी वैमनस्यता विसर्जन गरी सहकार्य, सद्भाव र ज्ञानमार्गमा अघि बढ्न सबैलाई प्रेरित गर्दछ ।अन्त्यमा, वसन्त पञ्चमीले प्रेम, मेलमिलाप र एकताको भावना प्रवर्धन गर्दै प्रत्येक नेपालीको जीवनमा आनन्द, शान्ति र समृद्धि ल्याओस् । यस पर्वले सकारात्मक सोच, ऊर्जाशील जीवनशैली र नयाँ खोजतर्फ अग्रसर हुन सबैलाई प्रेरित गरोस्, पुनः हार्दिक शुभकामना व्यक्त गर्दछु । '
