काठमाडौं- काठमाडौं निर्वाचन क्षेत्र नम्बर २ बाट संघीय संसद् (प्रतिनिधिसभा) सदस्यका लागि डा.विश्वास बस्नेतले स्वतन्त्र उम्मेदवारी दर्ता गराएका छन् । उनले उम्मेदवारी दर्तापछि सार्वजनिक अपिल जारी गर्दै आफ्नो जीवनको ऐतिहासिक क्षणका रूपमा उल्लेख गरेका हुन् ।
उम्मेदवारी दर्तासँगै उत्साह र जिम्मेवारी दुवै महसुस गरिरहेको उल्लेख गर्दै डा. बस्नेतले काठमाडौं-२ लाई केवल निर्वाचन क्षेत्र नभई आफ्नो राजनीतिक चेतनाको उद्गम थलो र कर्मभूमि भएको बताएका छन् । “यो क्षेत्रसँग मेरो सम्बन्ध भूगोलको मात्र होइन, अपनत्व र कर्तव्यको हो,” उनले सार्वजनिक अपिलमार्फत भनेका छन् ।
उनले ‘जेन-जी आन्दोलन’ कुनै दललाई जिताउन नभई व्यवस्था सुधार, सुशासन र अधिकारका लागि भएको स्पष्ट पार्दै त्यस आन्दोलनले उठाएका मुद्दाहरूलाई संसद्मा प्रभावकारी रूपमा उठाउनु आफ्नो मुख्य उद्देश्य रहेको बताए । खानेपानीको समस्या, सडकको दुरावस्था, कृषिको आधुनिकीकरण तथा साना व्यवसायीका चुनौतीहरू आफूले नजिकबाट बुझेको उनको भनाइ छ ।
डा. बस्नेतले विगतमा धेरै प्रतिनिधिहरू आए पनि नीति निर्माणमा अपेक्षित गम्भीरता नदेखिएको टिप्पणी गर्दै सांसदको प्रमुख भूमिका सही कानुन निर्माण र जनताको आवाज सदनसम्म पुर्याउनु भएको उल्लेख गरेका छन् । “म व्यक्तिगत आकांक्षाभन्दा संवैधानिक जिम्मेवारी कुशलतापूर्वक निर्वाह गर्न र अलपत्र परेका योजनाहरूमा संघीय तहबाट समन्वय गर्न चुनावी मैदानमा आएको हुँ,” उनले भने ।
उनले मतदाता र अभिभावकसँग आशीर्वादको अपेक्षा गर्दै आफूलाई देशको भविष्य निर्माण गर्ने जिम्मेवारी सुम्पिने विश्वास व्यक्त गरेका छन् । साथै, क्षेत्रका हरेक सुख-दुःखमा राज्यको बलियो उपस्थिति गराउने र जनतालाई आफ्ना सांसदप्रति गर्व महसुस गराउने प्रतिबद्धता जनाएका छन् ।
डा.बस्नेतले व्यवस्था सुधार र युवाको आवाजस् जेन-जी आन्दोलनले उठाएका सुशासन र अधिकारका मुद्दाहरू संसद्मा सशक्त रूपमा उठाउने उल्लेख गरेका छन । “पर्यटन र कृषिमा आधुनिकीकरण ल्याई काठमाडौं-२ का उत्पादनलाई मुख्य बजारसँग सिधा जोड्ने संयन्त्र विकास गर्ने, टोल-टोलमा व्यावसायिक केन्द्र बनाउने, स्वरोजगार प्रवद्र्धन गर्ने, सरकारी शिक्षामा सुधार ल्याउने, व्यवसाय प्रकृति अनुसार वर्गीकरण गरी साना तथा ठूला व्यवसायीलाई मर्का नपर्ने कर व्यवस्था गर्ने” उनले सार्वजनिक अपिलमा चुनावी प्रतिबद्धता उल्लेख गरेका छन् ।
