सियोल- उत्तर कोरियाले प्रत्येक वर्ष १० देखि २० वटा आणविक हतियार बनाउन पुग्ने मात्रामा आणविक सामग्री उत्पादन गरिरहेको दक्षिण कोरियाका राष्ट्रपति ली जे म्युङले बुधबार बताएका छन् । नयाँ वर्षको अवसरमा आयोजित पत्रकार सम्मेलनमा राष्ट्रपति लीले प्योङयाङको आणविक र मिसाइल क्षमताले क्षेत्रीय मात्र नभई विश्वव्यापी सुरक्षा चुनौती सिर्जना गरिरहेको धारणा राखे ।
“अहिले पनि उत्तर कोरियामा वर्षमा १० देखि २० वटा आणविक हतियार उत्पादन गर्न पर्याप्त आणविक सामग्री तयार भइरहेको छ”, राष्ट्रपति लीले पत्रकारहरूसँग भने । उनका अनुसार उत्तर कोरियाले अमेरिकाको मुख्य भूमिलाई लक्षित गर्ने उद्देश्यले लामो दूरीका ब्यालेस्टिक मिसाइल प्रविधि निरन्तर परिष्कृत गरिरहेको छ ।
राष्ट्रपति लीले अन्तरमहाद्वीपीय ब्यालेस्टिक मिसाइल (आइसिबिएम) क्षमताको सन्दर्भमा उत्तर कोरियाले आफ्नो शासन जोगाउन आवश्यक ठानिएको आणविक शस्त्रागार सुरक्षित गरिसकेको उल्लेख गरे । “एक समय यस्तो आउन सक्छ, जब उत्तर कोरियाले संयुक्त राज्य अमेरिकालाई मात्र होइन, विश्वव्यापी रूपमा नै खतरा उत्पन्न गर्ने क्षमतायुक्त आइसिबिएम र आणविक शक्ति हात पार्नेछ”, उनले चेतावनी दिँदै भने, “यदि आवश्यकताभन्दा बढी आणविक सामग्री संचित भयो भने, त्यो देशबाहिर निर्यात हुनसक्छ । त्यसपछि समस्या केवल कोरियाली प्रायद्वीपमा सीमित रहने छैन, विश्वव्यापी खतरा देखा पर्नेछ ।”
उत्तर कोरियाको आणविक कार्यक्रमलाई समाधान गर्न व्यावहारिक र यथार्थपरक दृष्टिकोण आवश्यक रहेको राष्ट्रपति लीको भनाइ छ । उनका अनुसार आणविक सामग्री उत्पादन र आइसिबिएम विकासलाई निलम्बन गर्नुका साथै विदेश निर्यातमा रोक लगाउन सके सबै पक्षका लागि लाभदायक हुनेछ । “यो सबैका लागि फाइदाजनक उपाय हुनेछ”, उनले भने । उनले यस विषयमा अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी जिनपिङ दुवैसँग आफ्ना तर्कहरू राखिसकेको जानकारी दिए ।
गत जुन महिनामा पदभार सम्हालेदेखि नै राष्ट्रपति लीले कुनै पूर्वशर्त नराखी उत्तर कोरियासँग संवाद सुरु गर्न जोड दिँदै आएको छ, जुन उनका पूर्ववर्तीको कठोर नीतिभन्दा फरक मानिन्छ । तर प्योङयाङले अहिलेसम्म उक्त प्रस्तावप्रति कुनै औपचारिक प्रतिक्रिया जनाएको छैन ।
यसैबीच उत्तर कोरियाले हालै दक्षिण कोरियाले सीमावर्ती सहर केसोङ क्षेत्रमा ड्रोन उडाएको आरोप लगाएको छ । राष्ट्रपति लीको कार्यालयले उक्त आरोप अस्वीकार गर्दै दक्षिण कोरियाली सरकारको संलग्नता नरहेको स्पष्ट पारेको छ, यद्यपि सो कार्य कुनै निजी व्यक्तिबाट हुनसक्ने सम्भावनालाई भने नकारिएको छैन ।
![सिण्डिकेटधारीविरुद्ध व्यवसायीको आक्रोशः २५ व्यवसायीको तस्बिरमा जुत्ता प्रहार [भिडियो]](https://www.prabhabonline.com/uploads/posts/200X200/jutta-prahar-bairo-1789318338.jpg)