काठमाडौं- नेपाल आदिवासी जनजाति महासंघको ११औँ राष्ट्रिय महाधिवेशन आगामी २०८२ साल माघ ९ र १० गते विराटनगरमा आयोजना हुँदैछ । उक्त महाधिवेशनमा महासंघको अध्यक्ष पदका लागि अमृत बहादुर सुनुवारले औपचारिक रूपमा आफ्नो उम्मेदवारी घोषणा गरेका छन् ।
उम्मेदवारी घोषणा गर्दै सुनुवारले संविधानमा सुनिश्चित आदिवासी जनजातिका मौलिक अधिकारहरूको पूर्ण कार्यान्वयन, आईएलओ महासन्धि १६९ तथा संयुक्त राष्ट्रसंघीय आदिवासी अधिकारसम्बन्धी घोषणापत्र (UNDRIP) को प्रभावकारी कार्यान्वयनलाई आफ्नो प्रमुख प्राथमिकताका रूपमा अघि सारेका छन् ।
साथै, राज्यका सबै निकायमा समानुपातिक समावेशी प्रतिनिधित्व सुनिश्चित गर्नु, आदिवासी जनजातिको भूमि, भाषा, संस्कृति र पहिचानको संरक्षण तथा प्रवर्द्धन उनका मुख्य समसामयिक एजेन्डा रहेको उनले बताएका छन् ।अमृत बहादुर सुनुवारले महासंघलाई एकताबद्ध, पारदर्शी, लोकतान्त्रिक र अधिकारमुखी संगठनका रूपमा सुदृढ बनाउँदै, देशभरका आदिवासी जनजातिहरूको साझा आवाजलाई राष्ट्रिय तहमा अझ सशक्त र प्रभावकारी रूपमा स्थापित गर्ने प्रतिबद्धता व्यक्त गरेका छन् ।
उनले आफू नेपाल आदिवासी जनजाति महासंघको संस्थापक सदस्य संस्था ( सुनुवार सेवा समाजको तर्फबाट संस्थागत नेतृत्वका लागि अघि बढेको स्पष्ट पारेका छन् । विगत २५ वर्षभन्दा बढी समयदेखि नेपालका आदिवासी जनजातिहरूका सामूहिक अधिकार, पहिचान र प्रतिनिधित्वका सवालमा निरन्तर सक्रिय रहँदै आएका सुनुवार आदिवासी आन्दोलनका जुझारु अनुभवी अभियन्ता मानिन्छन् ।
उनले सुनुवार कलाकार तथा चलचित्रकर्मी समाज, आदिवासी जनजाति चलचित्र महासंघ, किरात समन्वय समिति, सुनुवार सेवा समाज लगायतका विभिन्न आदिवासी संस्थाहरूको केन्द्रीय तहमा नेतृत्वदायी भूमिका निर्वाह गरिसकेका छन् ।त्यसैगरी, नेपाल आदिवासी जनजाति महासंघको संघीय परिषद् र सचिवालयसँग नजिक रहेर लामो समयदेखि आदिवासी अधिकारसम्बन्धी नीति, कार्यक्रम, आन्दोलन र अभियानहरूमा सक्रिय सहभागिता जनाउँदै आएको उनको भनाइ छ ।
आदिवासी अधिकारका हरेक आन्दोलनमा अग्रपंक्तिमा उभिएर योगदान पुर्याउँदै आएको अनुभवले महासंघको नेतृत्व थप प्रभावकारी हुने विश्वास उनले व्यक्त गरेका छन् । आगामी दिनमा महासंघको नेतृत्व सम्हाल्ने अवसर प्राप्त भएमा सम्पूर्ण आदिवासी जनजातिहरूका अधिकार सुनिश्चित गर्न, संगठनलाई संस्थागत रूपमा मजबुत बनाउन, र समुदायका सुख–दुःखमा सेवाभावका साथ उभिने प्रतिवद्धता उनले जनाएका छन् ।अन्त्यमा, सुनुवारले सबै आदिवासी जनजाति समुदाय, महासंघका प्रतिनिधि, अभियन्ता, बुद्धिजीवी तथा शुभेच्छुकहरूबाट सहयोग, समर्थन र ऐक्यबद्धताको अपेक्षा गर्दै आफ्नो उम्मेदवारीलाई सशक्त बनाउन आग्रह गरेका छन् ।
