- शीर्ष दलका अधिकांश उम्मेदवार नयाँ अनुहार
- महिला उम्मेदवार १३ प्रतिशतभन्दा कम
- ६८ दलबाट २२९७ जनाको उम्मेदवारी
- ११८७ जनाले दिए स्वतन्त्र उम्मेदवारी
- ३६ देखि ५० वर्ष उमेर समूहका सबैभन्दा बढी १६१० उम्मेदवार
- सबैभन्दा बढी रुपन्देही र सबैभन्दा कम मुस्ताङमा उम्मेदवारी
- अपांगता भएका व्यक्तिबाट ८५ र पिछडिएको क्षेत्रका १३८ जनाको उम्मेदवारी
काठमाडौं- आगामी फागुन २१ गते हुने प्रतिनिधिसभा निर्वाचनका लागि प्रत्यक्षतर्फको १६५ पदमा तीन हजार ४८४ जनाको उम्मेदवारी परेको छ । निर्वाचन आयोगका अनुसार मंगलबार साँझ ५ समयसम्म उम्मेदवारी दर्ताका लागि तोकिएको समयअवधिभित्र उक्त संख्यामा उम्मेदवारी परेको हो ।
उम्मेदवारी दर्ता गर्नेमध्ये ८७ प्रतिशत अर्थात् तीन हजार ८८ जना पुरुष रहेका छन् । दलहरुले विगतमा जस्तै महिला उम्मेदवार न्यून संख्यामा उठाएका छन् । जसको परिणाम महिला उम्मेदवार १३ प्रतिशतभन्दा कम (३९५ जना)मा खुम्चिएको छ । अन्यतर्फ एक जनाको उम्मेदवारी परेको आयोगले जनाएको छ ।
आयोगका अनुसार कूल ६८ दलबाट दुई हजार २९७ जनाको उम्मेदवारी दर्ता भएको छ । स्वतन्त्र उम्मेदवारी दर्ता गरी एक हजार १८७ जना प्रतिस्पर्धामा उत्रिएका छन् । उमेरअनुसार सबैभन्दा बढी ३६ देखि ५० वर्ष उमेर समूहका एक हजार ६१० जनाको उम्मेदवारी परेको छ । यस्तै, ५१ देखि ६५ वर्ष उमेर समूहका एक हजार ९०, २५ देखि ३५ वर्ष उमेर समूहका ५८३ र ६५ देखि माथि उमेरका २०१ जना उम्मेदवार भएका छन् ।
आयोगको विवरणअनुसार देशका १६५ निर्वाचन क्षेत्रमध्ये रुपन्देहीको निर्वाचन क्षेत्र नं २ र ३ मा सबैभन्दा बढी ३५÷३५ जनाले उम्मेदवारी दर्ता गराएका छन् । यसैगरी सबैभन्दा कम मुस्ताङमा चार जनाले उम्मेदवारी दर्ता गराएका छन् । अपांगता भएका व्यक्तिबाट ८५ र पिछडिएको क्षेत्रका १३८ जनाको उम्मेदवारी परेको आयोगको विवरणमा उल्लेख छ ।
मंगलबार बिहान १० बजेदेखि साँझ ५ बजेसम्म उम्मेदवारी दर्ताका लागि समय तोकिएको थियो । स्वतन्त्र तथा दलका उम्मेदवारहरुले नारा जुलुससहित सम्बन्धित निर्वाचन कार्यालयमा पुगेर उम्मेदवारी दर्ता गराएका थिए । यसपटक उम्मेदवारी दिनेमा अधिकांश नयाँ अनुहार देखिएका छन् ।
नेपाली कांग्रेसले ६४ प्रतिशत नयाँलाई अवसर दिँदा एमालेले ५५ प्रतिशत नयाँ उम्मेदवार अगाडि सारेको छ । यता नेपाल कम्युनिस्ट पार्टी (नेकपा)ले पनि अधिकांश उम्मेदवार नयाँ नै बनाएको पार्टीका नेता गोविन्द आचार्यले बताए । राष्ट्रिय स्वतन्त्र पार्टी (रास्वपा) आफैं पनि नयाँ दलका रुपमा देशभर उम्मेदवारी दिएकोले यसपटक नयाँ उम्मेदवारहरु भएको उक्त दलले जनाएको छ ।
बुधबार बिहान १० देखि ३ बजेसम्म उम्मेदवारको विरोधमा उजुरी दिने समय तोकिएको छ । माघ ९ गते उम्मेदवारी फिर्ताको समय तोकिएको छ भने माघ ९ गते नै अन्तिम नामावली प्रकाशन गरी चुनाव चिह्न प्रदान गर्ने तालिका छ ।
कांग्रेसमा ६४ प्रतिशत नयाँ अनुहार
विशेष महाधिवेशनबाट कांग्रेसको नेतृत्व लिएका गगन थापाले प्रतिनिधिसभाको निर्वाचनमा दुईतिहाइ नयाँ अनुहारलाई चुनावी मैदानमा अगाडि सारेका छन् । कांग्रेसले उम्मेदवार बनाएका १६५ जनामध्ये १०६ जना अर्थात् ६४ प्रतिशत नयाँ अनुहार हुन् ।
कांग्रेसका प्रवक्ता देवराज चालिसेले नवीन सोच र बदलिएको कांग्रेसको औचित्य स्थापित गर्न निर्वाचनमा युवा र नयाँ अनुहारलाई प्राथमिकता दिएको बताए । ‘यो नवीन सोच र बदलिएको कांग्रेसको उदाहरण हो । देशैभर कांग्रेस नयाँ उत्साह लिएर चुनावी मैदानमा उत्रिएको छ,’ प्रवक्ता चालिसेले भने ।
कांग्रेसका यसअघिका सभापति शेरबहादुर देउवाले अघिल्लो निर्वाचनमा माओवादी केन्द्र र नेकपा एकीकृत समाजवादीसँग गठबन्धन गरेका थिए । उक्त निर्वाचनमा कांग्रेसले ८९ क्षेत्रमामात्रै उम्मेदवारी दिएकामा ५७ सिट जितेको थियो । कांग्रेस पदाधिकारीमध्ये सभापति थापाले सर्लाही-४, महामन्त्री प्रदीप पौडेलले काठमाडौं-५, गुरुराज घिमिरेले मोरङ-४ निर्वाचन क्षेत्रमा उम्मेदवारी दर्ता गराएका छन् । उपसभापतिद्वय विश्वप्रकाश शर्मा र पुष्पा भुसालले भने यो निर्वाचनमा उम्मेदवारी दिएका छैनन् ।
एमालेमा ५५ प्रतिशत नयाँ
नेकपा एमालेले आगामी प्रतिनिधिसभा सदस्यको निर्वाचनका लागि १६५ वटै निर्वाचन क्षेत्रमा उम्मेदवारी दर्ता गराएको छ । पार्टीे प्रचार विभाग प्रमुख मीनबहादुर शाहीले पार्टी अध्यक्ष केपी शर्मा ओलीलगायत उम्मेदवारले नेता, कार्यकर्ता र जनताको उत्साहपूर्ण सहभागितामा आ–आफ्नो उम्मेदवारी दर्ता गराएको जानकारी दिए ।
शाहीका अनुसार यसपटकको निर्वाचनमा एमालेले अगाडि सारेका उम्मेदवारमध्ये ५४.५४ प्रतिशत नयाँ छन् । सबैभन्दा धेरै नयाँ उम्मेदवार कर्णाली प्रदेशमा ७५ प्रतिशत र कम लुम्बिनीमा ४२.३० प्रतिशत रहेका प्रचार विभाग प्रमुख शाहीले बताए ।
नेकपाको १६४ क्षेत्रमा उम्मेदवारी
नेपाली कम्युनिस्ट पार्टी(नेकपा)ले पहिलो हुने निर्वाचित हुने (प्रत्यक्ष)तर्फ १६४ वटा निर्वाचन क्षेत्रमा उम्मेदवारी दिएको छ । नेकपाबाट टिकट पाएका सबै उम्मेदवारले आ-आफ्नो निर्वाचन क्षेत्रमा पुगी मनोनयन दर्ता गराएको पार्टीका नेता गोविन्द आचार्यले जानकारी दिए । बागलुङ–१ मा भने नेकपाले राष्ट्रिय जनमोर्चाका उम्मेदवारलाई समर्थन गरेको छ ।
रास्वपाको पनि १६४ स्थानमा उम्मेदवारी दर्ता
राष्ट्रिय स्वतन्त्र पार्टी (रास्वपा)ले प्रतिनिधिसभा सदस्यका लागि प्रत्यक्षतर्फ देशभरका १६४ निर्वाचन क्षेत्रमा उम्मेदवारी दर्ता गरेको छ । रास्वपाकातर्फबाट मनाङमा उम्मेदवारी नपरेको हो । त्यहाँ अनिल गुरुङले पार्टीबाट सिफारिस पाएका थिए । पार्टीका नेता एवं रास्वपाकातर्फबाट काठमाडौं निर्वाचन क्षेत्र ८ का उम्मेदवार विराजभक्त श्रेष्ठले मनाङबाहेक सबै निर्वाचन क्षेत्रमा उम्मेदवारी दर्ता भएको जानकारी दिए ।
रास्वपाका मनाङका उम्मेदवारको बाटोमा अलमलका कारण दर्ता छुटेको हुनसक्ने श्रेष्ठले बताए । पार्टीका सहमहामन्त्री एवं दाङ २ बाट उम्मेदवारी दिएका वीपिनकुमार आचार्यले कूल उम्मेदवार दर्तामध्ये रास्वपाका तर्फबाट करिब आठ प्रतिशत उम्मेदवार महिला रहेको जानकारी दिए ।
