काठमाडाैं - ल्होछारलाई सधैं एउटै मितिमा पर्नेगरी तय गर्नुपर्ने नेपाली काँग्रेस केन्द्रीय सदस्य एवं आदिवासी जनजाति विभाग प्रमुख दिलमान पाख्रिनले बताएका छन् । नेपाल तामाङ संघ काठमाडौंले शनिबार आयोजना गरेको ल्होछार शुभकामना आदानप्रदान कार्यक्रममा साे बताएका हुन् ।
सरकारले समस्याग्रस्त सहकारी पिडकहरुलाई उन्मुक्ति दिएलगत्तै निर्वाचन समयमै नहुने आशंका पैदा भएको पनि उनले बताए । उनले ल्होछारलाई सधैं एउटै मितिमा पर्नेगरी तय गर्नुपर्ने सल्लाह पनि सरकारलाई सुझाएका छन् ।
तामाङ जातिको ल्होछार परम्परागत रूपमा माघ शुक्ल पूर्णिमा तथा माघे संक्रान्तिमा मनाइने गरिएको स्मरण गर्दै हाल ज्ञान, विज्ञान र प्राविधिक आधारमा पात्रो अनुसार मनाइँदा तिथि–मिति फरक परेको बताए। उनले तामाङ समुदायका चाडपर्वका लागि राज्यले दिएको एक दिने बिदा पर्याप्त नभएको उल्लेख गर्दै अन्य चाडपर्व सरह सार्वजनिक बिदाको व्यवस्था हुनुपर्ने माग राखेका छन् ।
साथै नेपाली कांग्रेस पार्टीको वर्तमान अवस्थाबारे चर्चा गर्दै पार्टीभित्र केही अन्तरद्वन्द्व देखिए पनि पार्टीको चुनाव चिन्ह सुरक्षित रहेको स्पष्ट पारे । त्यसैगरी नेपाल तामाङ संघका केन्द्रीय सदस्य–सचिव बिलाम मुक्तानले ´हामी भित्र म `भन्ने सिद्धान्तअनुसार काँग्रेसले सबै समुदायको सहअस्तित्वलाई सम्मानद गरेको छ ।
विगतमा थोरै समूहले लुकेर मनाइने सोनाम ल्होछार आज देशका कुना–कुनासम्म राज्यको स्रोत–साधन प्रयोग गरी भव्य रूपमा मनाइँदै आएको र विदेशमा समेत तामाङ कलाकारहरूलाई आमन्त्रण गरी सांस्कृतिक कार्यक्रम आयोजना भइरहेको बताए।
संस्थापक सदस्य कृष्णबहादुर तामाङले नेपाली कांग्रेस पार्टीभित्र तामाङ संघलाई भातृ संस्थाका रूपमा मान्यता दिलाउनको लागि तत्कालीन स्व.दामन पाख्रिन,स्व.भिमबहादुर तामाङ र हर्षजित लामा संँग २०५४/०५५ साल तिर सल्लाह गरेर पार्टी पंक्तिलाई दबाब दिएको स्मरण गरे। २०६३ सालतिर प्रक्रिया सुरु भई २०६६ सालमा औपचारिक मान्यता प्राप्त भएको उनले जानकारी दिए । उनले तामाङ समुदायले हरेक क्षेत्रमा अझै पनि धेरै संघर्ष गर्नु परेको बताए।
महासमिति सदस्य शारदा लामाले क्याम्पस अध्ययनरत रहँदा बसन्तपुरमा भएको तामाङ समुदायको ठूलो भेलामार्फत स्व. नेता गिरिजाप्रसाद कोइरालाद्वारा तामाङ संघलाई भातृ संस्थाको रूपमा घोषणा भएको स्मरण गर्दै आज सोही संस्थाको कार्यक्रममा अतिथिका रूपमा सहभागी हुन पाएकोमा खुशी व्यक्त गरेकी छन् ।
तामाङ संघका अध्यक्ष सशिकर लामाको अध्यक्षतामा भएको उक्त कार्यक्रममा अतिथिहरू महाधिवेशन फुलमाया तामाङ, नेपाली काँग्रेस कार्यसमिति काठमाडौको कोषाध्यक्ष राजेन्द्र बुढाथोकी, काठमाडौं तामाङ संघ पुर्व अध्यक्ष रणबहादुर तामाङ लगायतका नेताहरूले सोनाम ल्होछारको शुभकामना व्यक्त गरेको थिए ।
