एपी- पाकिस्तानले सन् २०२५ मा पोलियोका घटनाहरू अघिल्लो वर्षको तुलनामा आधाभन्दा कम रिपोर्ट गरेको छ । पाकिस्तानले चार करोड ५० लाख बालबालिकालाई लक्षित गर्दै राष्ट्रव्यापी पोलियो खोप अभियान सुरु गरेको दुई हप्तापछि यो तथ्य सार्वजनिक भएको हो ।
यस वर्ष पनि खोप लगाउने स्वास्थ्य कार्यकर्ताहरूले बारम्बार आतङ्कवादी आक्रमणको सामना गर्नुपरेको भए पनि पोलियो उन्मूलन अभियानमा प्रगति देखिएको सरकारी पोलियो उन्मूलन पहलको विज्ञप्तिमा उल्लेख छ । राष्ट्रिय आपतकालीन अपरेसन केन्द्रका संयोजक अनवारुल हकले सन् २०२५ मा सम्भावित पोलियोका ३० घटना रिपोर्ट भएको बताए । यो एक वर्षअघि ७४ थियो ।
विश्व स्वास्थ्य संगठनका अनुसार पाकिस्तान र छिमेकी अफगानिस्तान मात्र दुई देश हुन् जहाँ पोलियो अझै उन्मूलन हुन सकेको छैन । स्वास्थ्य अधिकारीहरूले खोप कभरेजमा सुधार आएको र रिपोर्ट गरिएका केसहरू तीव्र रूपमा घटेको बताएका छन् । तर, पहुँच कठिन क्षेत्रहरूमा निरन्तर प्रसारणको जोखिम रहेको छ, जसले खोप अभियान स्थिर नभएसम्म देशलाई चुनौतीको सामना गर्नुपर्ने देखाउँछ ।
हकले फेब्रुअरीको पहिलो हप्तामा नयाँ वर्षको पहिलो पोलियो विरोधी अभियान सुरु हुने बताए। उनले सेप्टेम्बरदेखि देशमा नयाँ सङ्क्रमणको रिपोर्ट नभएको र लक्षित जनसङ्ख्याको ९८ प्रतिशतभन्दा बढीलाई पछिल्लो खोप अभियानले सम्पर्क गरेको बताए ।
उत्तरी पश्चिमी प्रान्त खैबर पख्तुनख्वामा स्वास्थ्य कार्यकर्ताहरूले सुरक्षा चुनौती र प्रतिरोधको सामना गरिरहेका छन् । खोप अभियानलाई मुस्लिम बच्चाहरूलाई नसबन्दी गर्ने पश्चिमी षड्यन्त्र भएको झुटो दाबी गर्दै आतंकवादीहरूले बारम्बार खोप कार्यकर्ताहरू र उनीहरूको सुरक्षामा खटिएका प्रहरी अधिकारीहरूलाई निशाना बनाएका छन् ।
हरेक अभियान अघि गुप्तचर चेतावनीअनुसार हजारौँ प्रहरी अधिकारी तैनाथ गरिन्छन् । सन् १९९० को दशकदेखि यस्ता आक्रमणमा २०० भन्दा बढी पोलियो कार्यकर्ता र सुरक्षा अधिकारीहरूले आफ्नो जीवन गुमाइसकेका छन् ।
