जेरूसेलम- इजरायली सेनाले बिहीबार लेबनानमा भएको आक्रमणमा इरानको ‘एलाइट कुद्स युनिट’का एक सदस्यको मृत्यु भएको बताएको छ । सेनाले मारिने इरानी अधिकारी हुसेन महमुद मार्शद अल–जहरी रहेको पुष्टि गरेको छ । अल–जहरीे रिभोलुसनरी गाड्र्सको विदेश सञ्चालन शाखा ‘इलाइट कुद्स फोर्स’का एक प्रमुख सदस्य भएको इजरायली सेनाले बताएको छ।
सेनाले भनेको छ, “हुसेन इरानको निर्देशनमा रहेको इजरायल र सिरियाको सुरक्षा फौजविरुद्ध आतङ्कवादी गतिविधिमा संलग्न थिए।गत जुनमा इजरायलले इरानसँग १२ दिने युद्ध लडेको थियो । इजरायलले इरानको आणविक अनुसन्धान र ब्यालिस्टिक क्षेप्यास्त्र कार्यक्रमलाई अस्तव्यस्त बनाउन खोजेको भन्दै सैन्य र आणविक स्थलका साथै आवासीय क्षेत्रहरूमा पनि आक्रमण गरेको थियो ।
इरानले पनि बदलामा इजरायलमाथि ड्रोन र मिसाइल आक्रमण गर्दै इजरायली क्षेत्रमा आक्रमण गरेको थियो । युद्धविराम घोषणा गर्नुअघि संयुक्त राज्य अमेरिकाले पनि इरानको आणविक सुविधाहरूमा आक्रमण गर्न इजरायललाई सघाएको थियो । इजरायललाई मान्यता नदिने इरानले लामो समयदेखि आफूमाथि आणविक केन्द्रविरुद्ध तोडफोड गरेको र वैज्ञानिकको हत्या गरेको आरोप लगाउँदै आएको छ ।
इरानले लेबनानको हिजबुल्ला र प्यालेस्टिनी लडाकू समूह (हमास) सहित प्रतिरोधको तथाकथित रूपमा यस क्षेत्र वरपरका लडाकू समूहहरूलाई पनि समर्थन गर्दछ । यी समूहविरूद्ध विगत दुई वर्षमा इजरायलले ठूलो द्वन्द्व लडेको छ ।यसअघि बिहीबार इजरायलले इरानी गुप्तचर सेवाको निर्देशनमा सुरक्षा अपराध गरेको आशङ्कामा एक इजरायली व्यक्तिलाई पक्राउ गरेको घोषणा गरेको थियो ।
