प्रमुख राजनीतिक दलहरु, विशेषगरी नेपाली कांग्रेस र नेकपा एमाले निर्वाचनमा जान तयार छैनन् । एमालेले खुलेरै निर्वाचन नहुने बताउँदै आए पनि कांग्रेसले दोहोरो भूमिका खेलिरहेको छ । कांग्रेस एकतर्फ निर्वाचनमा सहभागी हुने भन्ने अर्कोतिर प्रतिनिधिसभा पुनस्र्थापनाका लागि एमालेकै पछिपछि लागेर सर्वोच्चमा रिट दायर गर्ने कार्यमा अग्रसर छ ।
यस्तो परिस्थितिका कारण आगामी २१ फागुनका लागि तोकिएको प्रतिनिधिसभा निर्वाचनमाथि संशय उत्पन्न भएको छ । सरकार निर्वाचन गराइछाड्ने अडानका साथ तयारीमा लागेको भए पनि प्रमुख दलहरुको सहभागिताविना त्यो सम्भाव देखिँदैन ।यद्यपि, निर्वाचन आयोगले चुनावी तयारीलाई तीव्रता दिएको छ । निर्वाचनको कार्यतालिकाअनुसार आयोगले काम गरिरहेको छ । यहीबीच आयोगले चुनावका लागि आचारसंहिताको तयारीसमेत गरिरहेको छ । आचारसंहितामा आयोगले केही नयाँ प्रस्तावसमेत समेटेको छ । चुनाव प्रचारप्रसारका क्रममा धेरै झण्डाको प्रयोग गर्न नदिनेगरी आयोगले नयाँ प्रस्ताव गरेको हो । प्रस्तावित आचारसंहितामा झण्डा प्रयोगका सम्बन्धमा नयाँ व्यवस्था गरिएको छ ।
आयोगका अनुसार कुनै पनि राजनीतिक दलले आयोजना गर्ने आमसभा, जुलुस कोणसभा वा घरदैलो जस्ता कार्यक्रममा १० वटा मात्रै झण्डाको प्रयोग गर्न सक्ने छन् । आयोगले उम्मेदवार वा दलको कार्यालयमा साइनबोर्ड तथा कपडामा बनाई तीन–चार फिटको दलको झण्डा र सोही नापको चुनाव चिह्न राख्नबाहेक दलको प्रचारप्रसार गर्ने उद्देश्यले कुनै पनि प्रकारको डिजिटल बोर्ड, फ्लेक्स वा ग्लुसाइन बोर्ड राख्न, श्रव्य सामग्री बजाउन र श्रव्यदृश्य सामग्री प्रदर्शन गर्न नहुने उल्लेख गरेको छ ।
प्रस्तावित आचारसंहितामा १० वटा झण्डा र चुनाव चिह्न प्रयोग गर्न तथा राजनीतिक दल तथा उम्मेदवारको नाम र चिह्न भएको एउटामात्रै तुल वा फ्लेक्स राख्न पाइने प्रस्ताव गरिएको छ । यसैगरी निर्वाचन प्रचारका लागि घरदैलोमा जाँदा उम्मेदवार, प्रस्तावक, समकर्थकसहित २५ जनाभन्दा बढीको जुलुस प्रदर्शन गर्न पाइने छैन । चुनाव प्रचारका क्रममा जाँदा बाजागाजा तथा झाँकीसहित जान नहुने व्यवस्था गर्न लागिएको छ । अनलाइन, वेबपेज, टिभी, स्क्रोलिङ, सपिङ मलमा डिस्प्ले, कल सेन्टर सञ्चालन, बैंकका एटिएम, काउन्टरमा सन्देश वा सडक नाटक आदि माध्यमबाट दलको वा उम्मेदवारबारेमा कुनै पनि प्रचारप्रसार गराउन पाइने छैन ।
तर, राजनीतिक दल वा उम्मेदवारले बढीमा एउटा निजी र आधिकारिक वेबपेजमा त्यस्तो प्रचार सामग्री राख्न भने पाउने प्रस्ताव गरिएको छ । निर्वाचनलाई स्वच्छ, शान्त र मर्यादित बनाउने उद्देश्यका साथ प्रस्ताव गरिएको आचारसंहिता स्वागतयोग्य देखिन्छ । निर्वाचन प्रचारको नाममा हुने भड्किलो र अमर्यादित गतिविधि रोक्न यसले प्रभावकारी भूमिका खेल्नसक्छ । त्यसैले यसलाई कार्यान्वयनमा ल्याउनेगरी आयोगले काम गर्नु आवश्यक छ ।
