नेपाली कांग्रेसका सभापति शेरबहादुर देउवा असफल नेतृत्वमध्येका एक हुन् । २०७९ को निर्वाचनमा पहिलो दल बन्दासमेत देउवाले सरकारको नेतृत्व गर्न सकेनन् । देउवाको काम कहिले पुष्पकमल दाहाललाई प्रधानमन्त्री बनाउने त कहिले केपी शर्मा ओलीलाई प्रधानमन्त्री बनाउनेमात्र भयो ।
निर्वाचनमा एक्लै लड्न नसकेर देउवाले कहिले माओवादीसँग गठजोड गर्यो त कहिले एमालेसँग । सरकार गठनको क्रममा पनि कहिले माओवादीलाई काँध थाप्यो त कहिले एमालेलाई । काँध गलुञ्जेल दुई दललाई बोकेको कांग्रेसका सभापति देउवाले सुशासनमा कुनै काम गर्न सकेनन् । गिरीबन्धु टी-स्टेटमा एमाले अध्यक्ष ओलीको धुरन्धर विरोध गरेको कांग्रेसले गठबन्धनको सरकार बनेपछि ओलीको पूजापाठ गर्न थाल्यो । उनै ओलीको वरिपरि घुमेर सरकारबाट विवादास्पद निर्णयहरु गराउन तयार भयो । गठबन्धन सरकारले जनआक्रोश यति बढायो कि, झण्डै दुईतिहाइको घमण्ड दुई दिनको सडक आन्दोलनले ध्वस्त बनायो ।
जेन-जी विद्रोहमा देउवाले कुटाइ खानुप¥यो । देउवा दम्पती बालबाल बचे । देउवा कांग्रेसका उनै सभापति हुन् जसले आफ्नै श्रीमती आरजु देउवालाई केन्द्रीय समिति सदस्यदेखि मन्त्रीसम्म बनाए । देउवाको यो निर्णयलाई कांग्रेसीहरुले लालमोहर लगाइरह्यो । परिणामस्वरुप कांग्रेस अहिले मुख लुकाउनुपर्ने अवस्थामा पुगेको छ । यस्तो अवस्थामा पनि कांग्रेसले देउवालाई बोकिरहेको छ । देउवाले चाहेको छ, अबको निर्वाचनबाट आफू अनुमोदित हुन्न । कदमकदाचित डडेलधुराले एकपटक जिताए पनि कांग्रेसले बहुमत ल्याउन सक्ने अवस्था छैन । यसकारण पनि यही प्रतिनिधिसभा ब्युँताएर एकपटक प्रधानमन्त्री बन्ने सपना देउवाले देख्न थालेका छन् ।
देउवाको सपना पूरा गराउन कांग्रेस घुँडा टेकेर लागेको छ । कांग्रेस संस्थापन देउवा प्रधानमन्त्री भए आफूहरु पुनः शक्तिमा फर्किने दाउमा छ भने संस्थापनइतर एकपटक देउवा प्रधानमन्त्री भए आफूहरुले अर्को पटकमा सजिलै पालो पाउने आशामा देखिन्छन् । जसकारण यी दुवै पक्ष मिलेर प्रतिनिधिसभा पुनस्र्थापनाको मुद्दा सर्वोच्च अदालतमा लाँदै छन् । यसअघि यो मुद्दा एमालेले अघि बढाइसकेको छ ।
मुलुकमा हुने महत्वपूर्ण परिवर्तनहरुमा कांग्रेसले नेतृत्वदायी भूमिका निभाउँदै आएको थियो । यसपटक भने कांग्रेस एमालेको पछुवा भएको छ । यो पनि सभापति देउवाको सपना पूरा गर्न । यो विषयमा कांग्रेसले लाज मान्नुपर्ने हो । खुरुखुरु जनताले चाहेको परिवर्तनलाई संस्थागत गरी महाविधेशनबाट नेतृत्व फेर्न लाग्नुपर्नेमा अड्डा अदालत धाउने कांग्रेसको यो मतिले निर्वाचनमा के मुख देखाउँदै घरदैलोमा धाउने होला ?
