जेनेभा - युरोपमा सुरक्षा र सहयोगका लागि क्षेत्रीय सङ्गठन (ओएससिई)ले युक्रेनमा रूसको युद्धविरामको अनुगमनमा प्रमुख भूमिका खेल्नसक्ने स्विट्जरल्याण्डका विदेशमन्त्रीले आइतबार एक अन्तर्वार्तामा उल्लेख गरेका छन् ।
स्विट्जरल्यान्डले सन् २०२६ मा ओएससिईको अध्यक्षता गर्नेछ । विदेश मन्त्री इग्नाजियो क्यासिसले भने, “ स्विट्जरल्यान्डले विश्वास निर्माण गर्ने उपायहरूमा ध्यान केन्द्रित गर्न चाहन्छ र मस्को र किएभबीच सम्भावित युद्धविरामको तयारी गर्न पहल गर्न चाहन्छ ।
“यस विषयमा यसपहिले नै धेरै ठोस विचारहरू व्यक्त भएका छन् र सङ्गठनले छोटो सूचनामा धेरै दर्जन मानिसहरूलाई तैनाथ गर्न सक्षम हुने भएकाले ओएससीईले युद्धविरामको अवलोकन गर्न, युद्धविरामको निगरानी गर्न, चुनावको निगरानी गर्न र यस्तै अन्य कुराहरू गर्न सक्छ,” क्यासिसले सोन्टाग्सब्लिक पत्रिकासँगको अन्तवार्तामा भने ।
उनले भने, “ओएससिईको युक्रेनसँगको सीमाना एक हजार ३०० किलोमिटरसम्म फैलिएकोले यसले एक्लै सम्पूर्ण यूक्रेनको निगरानी गर्न असम्भव भएपनि आवश्यकता र क्षमता अनुसार काम गर्न तयार हुनसक्छ । यसका लागि सहभागी राज्यहरूबाट महत्त्वपूर्ण प्रतिबद्धता आवश्यक पर्दछ।”
अमेरिकी राष्ट्रपति डोनल्ड ट्रम्पले चाँडै युद्धविरामको सम्झौता गर्न सक्ने बताउँदै क्यासिसले यसका लागि समग्र युरोपले आफ्नो धारणा निर्माण गर्न ढिला गर्ननहुने बताए। “युद्धविराम सहमतिको कुरा गाजा सम्झौताजस्तै अचानक आउनसक्छ । मेरो लक्ष्य भनेको ओएससिईको रूपमा हामी तयार हुनु हो। सम्झौता हुने बित्तिकै हामी तत्काल तयार रहनका लागि सक्षम हुनुपर्छ र यो ओएससिईका लागि चुनौतिसँगै अवसर पनि हो।”
उनले भने, “पहिलो कदमको रूपमा, एक तथ्य–खोजी मिशनले युक्रेनमा तैनाथ हुनुपर्नेछ र स्थितिको निदानको साथ फर्कनु आवश्यक हुनेछ । यसले ओएससिईलाई चाँडै अर्को चरणहरू सुरु गर्न सहज हुनेछ।” शीतयुद्धको समयमा पूर्व र पश्चिमबीचको तनाव कम गर्न सन् १९७५ मा स्थापना भएको ओएससिईमा संयुक्त राज्य अमेरिका, युक्रेन र रुससहित युरोप, मध्य एसिया र उत्तर अमेरिकाबाट ५७ सदस्य राष्ट्र छन्।
क्यासिसले भने, “रूसले ओएससिईको आधारभूत सिद्धान्तहरूको उल्लङ्घन गरिरहेको छ । सन् २०२२ फेब्रुअरीमा युक्रेनमा पूर्ण मात्रामा आक्रमण सुरु गरेको छ। यद्यपि मस्कोले संगठन छोडेको छैन मस्कोलाई यस सङ्गठनबाट निष्कासन गरिएको छ । यसले के सङ्केत गर्दछ भने ओएससिई ‘रूससँग वार्ताको लागि महत्त्वपूर्ण शक्ति हो ।
क्यासिसले भने, “ओएससीईले सहयोगको सन्दर्भमा के गर्न सक्छ र यसले प्रयोग गर्न सक्ने च्यानलहरूमा प्रमुख शक्तिहरूको ध्यान आकर्षित हुनु आवश्यक छ । उनले भने, “ओएससिई अवसर प्राप्त हुने बित्तिकै काम गर्न तयार हुनुपर्दछ । यद्यपि यस क्षणमा, सम्भावनाहरू सीमित छन्।” युक्रेनी र अमेरिकी अधिकारीहरूबीच तीन दिनको वार्ताले शनिबार कुनै स्पष्ट सफलता हासिल नगरे पनि युक्रेनी राष्ट्रपति भोलोदिमिर जेलेन्स्कीले ‘वास्तविक शान्ति’ को लागि थप वार्ता गर्ने प्रतिबद्धता व्यक्त गरेका छन् ।
यद्यपि, रूसले आफ्नो छिमेकी युक्रेनमा ड्रोन र मिसाइल आक्रमणको अर्को श्रृङ्खला सुरु गरेको छ।
