एजेन्सी - अमेरिकी राष्ट्रपति डोनाल्ड ट्रम्पले सबै तेस्रो–विश्व देशहरू (Third World Countries) बाट हुने आप्रवासनलाई “स्थायी रूपमा रोक्ने” घोषणा गरेका छन्। उनले अमेरिकी आप्रवासन प्रणाली “पूर्ण रूपमा पुनर्स्थापित र सुधार गर्न” यस्तो कदम आवश्यक भएको बताएका छन्।
ट्रम्पले आफ्नो औपचारिक वक्तव्य तथा सामाजिक सञ्जालमार्फत भने, “अब अमेरिका केवल त्यहीँ व्यक्तिहरूका लागि खुला हुनेछ, जो देशका लागि ‘नेट एसेट’ बन्न सक्छन्। देशप्रति प्रेम नभएका वा सुरक्षात्मक जोखिम उत्पन्न गर्ने आप्रवासीहरूलाई अब स्वीकार गरिँदैन।”
यो घोषणा वाशिङटन डीसीमा हालै भएको गोलीकाण्डपछि आएको हो, जहाँ एक अफगान नागरिक संलग्न रहेको US अधिकारीहरूले पुष्टि गरेका थिए। ट्रम्पका अनुसार २०२१ मा सुरु गरिएको "ढीला आप्रवासन नीति" का कारण अमेरिकाले “खतरनाक” व्यक्तिहरूलाई प्रवेश दिन बाध्य भयो, जसले अहिलेको सुरक्षा चुनौती जन्माएको छ।
ट्रम्प प्रशासनले यसअघि पनि १९ वटा चिन्ताजनक देशका नागरिकलाई जारी गरिएका ग्रीन कार्डहरू पुनरावलोकन गर्ने आदेश दिएको थियो। अब भने उनी यसलाई आणविक रूपमा विस्तार गर्दै छन्—तेस्रो विश्वका सबै राष्ट्रहरू समेटेर।अहिलेसम्म आधिकारिक सूची सार्वजनिक गरिएको छैन, तर अमेरिकी सञ्चारमाध्यमहरूले एशिया, अफ्रिका र क्यारिबियनका विकसित राष्ट्रहरु यस श्रेणीमा पर्ने अनुमान गरेका छन्। यसमा नेपाल, अफगानिस्तान, बङ्गलादेश, सोमालिया, सुडान, हाइटी लगायत सम्भावित छन्।ट्रम्पका अनुसार अमेरिका अब “देशहितमा योगदान नपुर्याउने” विदेशी नागरिकलाई आश्रय वा स्थायी बसोबास दिने छैन।
मानवअधिकार समूह, आप्रवासनविद् र केही अमेरिकी सांसदहरूले यो कदमलाई “विभेदपूर्ण, अस्पष्ट र अन्तर्राष्ट्रिय मान्यताविपरीत” भन्दै आलोचना गरेका छन्।“तेस्रो–विश्व” को परिभाषा नै अस्पष्ट भएकाले लाखौँ कानुनी आप्रवासी प्रभावित हुनसक्ने चेतावनी दिइएको छ। अर्कातिर, ट्रम्प समर्थकहरूले भने यो कदमलाई “अमेरिकी सीमा सुरक्षा र राष्ट्रिय हितका लागि ऐतिहासिक निर्णय” भन्दै स्वागत गरेका छन्।
