- एमाले महासचिव शंकर पोखरेल र पोलिटब्युरो सदस्य महेश बस्नेतलाई विमानस्थलमै रोक्न जम्मा भएका जेन–जी र एमाले कार्यकर्ताबीच झडप
- जेन–जी युवा सम्राट उपाध्याय एमाले कार्यकर्ताबाट कुटिएको दाबी
- कुटपिटपछि जेन–जी युवाहरू प्रतिकारमा उत्रिँदा तनाव
- सिमरा घटनाले चुनावी सुरक्षामा गम्भीर प्रश्न
५०–६० जना मान्छे आएर ढुंगामुढा गरेर एयरपोर्ट नै बन्द गराइदिने ? के हो यस्तो ? अनि भन्छ चुनाव गर्ने रे ? सभा गर्न नदिनेले चुनाव कसरी गर्छ ?
केपी शर्मा ओली
अध्यक्ष, नेकपा एमाले
काठमाडौं– प्रधानमन्त्री सुशीला कार्कीले निर्वाचन आयोगमा दर्ता भएका १२७ वटा दलका नेताहरूसँग बुधबार चुनाव केन्द्रित छलफल गरिन् । तर, उक्त छलफल हुनुभन्दा केही घण्टाअघि मधेस प्रदेशअन्तर्गत बाराको सिमरामा झडपको अवस्था सिर्जना भयो । नेकपा एमालेका कार्यकर्ता र जेन–जी अलायन्समा आबद्ध युवाहरूबीच झडप भएको हो ।
सिमरामा भएको घटना संवेदनशील छ । यसमा राष्ट्रिय स्वतन्त्र पार्टीको गम्भीर सरोकार र सरकारको आवश्यक ध्यानाकर्षण माग गर्दछौं ।
मनिष झा
प्रवक्ता, रास्वपा
जेन–जी अगुवा दाबी गर्ने सुदन गुरुङले पूर्वप्रधानमन्त्रीसमेत रहेका एमाले अध्यक्ष केपी शर्मा ओलीसहितका नेताहरूलाई चुनाव लड्नै नदिने अभिव्यक्ति दिएको सन्दर्भबीच बुधबार एमाले कार्यकर्ता र जेन–जी अलायन्सका युवाहरू झडपमा उत्रिएका हुन् । स्थिति नियन्त्रणमा लिन जिल्ला प्रशासन कार्यालयले निषेधाज्ञा लगाउनुप¥यो । यसले चुनावी सुरक्षामाथि गम्भीर प्रश्न उठेको छ ।
सिमरा घटना जेन–जी भावना होइन, त्यसको दुरुपयोग हो । निषेधको राजनीति कसैले नगरौं ।
विश्वप्रकाश शर्मा
महामन्त्री, नेपाली कांग्रेस
सिमरा घटना हुनुमा एमाले जिम्मेवार रहेको जेन–जी अगुवाहहरुको दाबी छ । जेन–जी अलायन्स बाराका संयोजक सम्राट उपाध्यायलाई सुरुमा एमाले कार्यकर्ताले कुटपिट गरेको जेन–जी समूहका मधेस प्रदेश संयोजक शिव यादवले बताए ।
‘हामीले प्रहरीमा उजुरी दिएका छौं, उजुरीउपर छानबिन होला,’ उनले प्रभावसँग भने, ‘सम्राटजीलाई कुटपिट गरेपछि हामी प्रतिकारमा उत्रियौं र स्थिति नियन्त्रणबाहिर गयो ।’ सम्राटले मंगलबार बिहान ८ बजेतिर फेसबुकमा स्टाटस लेख्दै ‘निर्वतमान हत्यारा सरकारविरुद्ध शान्तिपूर्ण प्रदर्शन’ हुन गइरहेको भन्दै सबैलाई आउन अपिल गरेका थिए । नभन्दै बुधबार बिहानै केही जेन–जी युवाहरू विमानस्थलनजिकैको सिमरा बजारमा भेला भएका थिए । भेलामै विवाद हुँदा सम्राटसहित केही युवाहरूमाथि एमाले नेता कार्यकर्ताले कुटपिट गरेको सार्वजनिक भिडियोमा देखिन्छ ।
कुटपिटपछि सम्राटसहित अरु युवाहरूले थपिएर विमानस्थलभित्र छिर्न प्रयत्न गरेका थिए । त्यसबेला प्रहरीसँग घम्साघम्सी भएको थियो । जबकि, एमाले महासचिव शंकर पोखरेल र पोलिटब्युरो सदस्य महेश बस्नेतलाई स्वागत गर्न विमानस्थलको मूल प्रवेशद्वारको गेटमा रहेका क्यान्टिन आसपासमा एमाले कार्यकर्ता भेला भएका थिए । अन्ततः एमाले कार्यकर्ताले उपाध्यायमाथि कुटपिट गरेपछि तनावपूर्ण स्थिति निम्तिएको हो । लगत्तै जिल्ला प्रशासन कार्यालय बाराले निषेधाज्ञा जारी ग¥यो । झण्डै नौ घण्टामा स्थिति नियन्त्रणमा आएपछि निषेधाज्ञालाई प्रशासनले हटाएको छ ।
जिल्ला प्रहरी कार्यालय बाराका प्रहरी प्रमुख सन्तोष तामाङले उपाध्यायलाई सात/आठ जनाको समूहले कुटपिट गरेको भन्दै इलाका प्रहरी कार्यालय सिमरामा उजुरी परेको बताए । सात/आठ जनाले कुटे भन्ने छ । उजुरी पनि परेको छ,’ उनले प्रभावसँग भने, ‘अनुसन्धान हुँदै छ ।’
तर, सिमरा घटनापछि एमाले अध्यक्ष केपी शर्मा ओली सरकारको आलोचनामा उत्रिए । उनले सभा गर्न नदिने सरकारले चुनाव गर्छ भनेर पत्याउन नसकिनेसमेत बताए । ‘बारामा हाम्रो युवा भेला थियो । सिमरा एयरपोर्ट बन्द भयो । हाम्रा नेताहरू जान पाउनुभएन । जानबाट रोकियो । एयरपोर्टमै तोडफोड गर्न दिइयो,’ उनले काठमाडौंमा आयोजित एक कार्यक्रममा भने, ‘५०–६० जना मान्छे आएर ढुंगामुढा गरेर एयरपोर्ट नै बन्द गराइदिने ? के हो यस्तो ? अनि भन्छ चुनाव गर्ने रे ? सभा गर्न नदिनेले चुनाव कसरी गर्छ ?’
ओलीले आफ्ना दलका नेताहरूलाई रोक्ने जेन–जी अलायन्सका युवाहरूप्रति आक्रोश पोखे । हरेक राजनीतिक दललाई जनतामा जान सभा, सम्मेलन गर्ने, भेटघाट गर्ने र आफ्ना एजेण्डा सुनाउने अधिकार संविधानप्रदत्त हो । तर, बुधबार बाराको परवानीपुरमा आयोजित मधेसस्तरीय युवा भेलालाई सम्बोधन गर्न जाँदा एमाले महासचिव पोखरेल, पोलिटब्युरो सदस्य बस्नेतलगायत नेताहरूलाई जेन–जी अलायन्स बाराले रोक्ने प्रयास गरेको हो ।
घटनालाई राष्ट्रिय स्वतन्त्र पार्टी (रास्वपा)ले संवेदनशील भनेको छ । चुनावी सुरक्षा उपलब्ध गराउन सरकारको ध्यानाकर्षण गरेको छ । जारी केन्द्रीय समिति बैठकबाट बाहिरिने क्रममा प्रवक्ता मनिष झाले भने, ‘सिमरामा भएको घटना संवेदनशील छ । यसमा राष्ट्रिय स्वतन्त्र पार्टीको गम्भीर सरोकार र सरकारको आवश्यक ध्यानाकर्षण माग गर्दछौं ।’
तनावपूर्ण घटनाबीच एमालेनिकट युवा संघको सभा भएको छ । पूर्वसांसदहरू किसान श्रेष्ठ, लिलानाथ श्रेष्ठ र युवा संघका केन्द्रीय अध्यक्ष क्षितिज थेबेलगायतले भेलालाई सम्बोधन गर्दै जेन–जी अलायन्सले गरेको अवरोध प्रयासको भत्र्सना गरे ।
घटनाको विरोध गर्दै कांग्रेस महामन्त्री विश्वप्रकाश शर्माले निषेधको राजनीति नगर्न आग्रह गरेका छन् । एमाले नेताहरूलाई रोक्ने जेन–जी पुस्ताको भावना नभएर दुरुपयोग भएको टिप्पणी गरे । ‘सामाजिक सञ्जाल निषेधविरुद्ध उभिने जेन–जी कसैको समाज भ्रमण अधिकारविरुद्ध उभिन सक्दैनन् । शर्माले सामाजिक सञ्जाल एक्समा लेखेका छन्, ‘अतः सिमरा घटना जेन–जी भावना होइन, त्यसको दुरुपयोग हो । निषेधको राजनीति कसैले नगरौं ।’
‘सिमरामा भएको तनाव र हिंसा दुःखद’
प्रधानमन्त्री सुशीला कार्कीले बाराको सिमरामा बुधबार भएको झडपको घटना दुःखद भएको बताएकी छन् । बुधबार साँझ सामाजिक सञ्जाल फेसबुकमार्फत उनले लोकतन्त्रमा अराजकता स्वीकार्य नहुनेसमेत बताएकी छन् ।
‘बाराको सिमरामा आज (बुधबार) देखिएको तनाव र हिंसा अत्यन्तै दुःखद छ । म स्पष्ट पार्न चाहन्छु कि यस किसिमको अराजकता लोकतन्त्रमा कदापि स्वीकार्य छैन । युवाहरूको आक्रोश र राजनीतिक असन्तुष्टिलाई हामीले गम्भीरतापूर्वक लिएका छौं,’ प्रधानमन्त्री कार्कीले भनेकी छन् ।
अभिव्यक्ति स्वतन्त्रताको सम्मान सरकारको प्रतिबद्धता भएको उनले उल्लेख गरेकी छन् । तर यसको अर्थ सार्वजनिक सम्पत्तिको क्षति, विमानस्थलमा अवरोध वा कानुन हातमा लिने छुट नभएको उनले स्पष्ट पारिन् ।
‘मैले गृह प्रशासन र सुरक्षा निकायलाई शान्ति तथा सुव्यवस्था कायम गर्न, सबै राजनीतिक दलका नेताहरूको सुरक्षित आवागमन सुनिश्चित गर्न र निर्वाचनको निष्पक्ष तथा भयमुक्त वातावरण बनाउन उच्च संयम र पूर्ण तयारीका साथ काम गर्न निर्देशन दिएको छु,’ उनले भनेकी छन्, ‘लोकतान्त्रिक प्रणालीको माध्यमबाट मात्रै युवाहरूको वास्तविक अपेक्षा पूरा गर्न सकिन्छ ।
त्यसैले म सबै पक्षलाई अवाञ्छित राजनीतिक उत्तेजनाबाट टाढा रहन र लोकतान्त्रिक प्रक्रियामा विश्वास राख्न हार्दिक अपिल गर्दछु ।’
