- २७ कात्तिकमा पदभार ग्रहण गर्ने
- १८ चैत २०८४ सम्म सम्हाल्ने छन् प्रहरीको कमाण्ड
काठमाडौं– सरकारले प्रहरी अतिरिक्त महानिरीक्षक (एआइजी) दानबहादुर कार्कीलाई नेपाल प्रहरीको ३३औं प्रहरी महानिरीक्षक (आइजिपी)मा नियुक्त गरेको छ । सोमबार बसेको मन्त्रिपरिषद् बैठकले एआइजीहरूमध्ये पहिलो वरीयतामा रहेका कार्कीलाई महानिरीक्षक नियुक्त गरेको हो ।
प्रहरी महानिरीक्षक चन्द्रकुबेर खापुङ ३० वर्षे सेवा अवधिका कारण यही बुधबार अवकाशमा जाँदै छन् । त्यसअघि नै सरकारले कार्कीलाई महानिरीक्षक नियुक्त गरेको हो ।काठमाडौं उपत्यका प्रहरी कार्यालय रानीपोखरीका प्रमुख रहेका कार्कीले १८ चैत २०८४ सम्म प्रहरीको कमाण्ड सम्हाल्ने छन् । बाबु कृष्णबहादुर र आमा चन्द्रकुमारीको कोखबाट १५ साउन २०२९ मा उनको जन्म भएको हो । जन्मथलो गुल्मीको मालिका गाउँपालिका–७ घमिर हो । मानविकी तथा समाजशास्त्र, शिक्षाशास्त्र र कानुनमा स्नातक कार्कीले राजनीतिशास्त्रमा स्नातकोत्तकर उपाधि हासिल गरेका छन् । १८ चैत २०५४ मा उनले प्रहरी निरीक्षकबाट सेवा प्रवेश गरेका हुन् ।
- प्रहरी निरीक्षक – १८ चैत २०५४
- प्रहरी नायव उपरीक्षक – २६ मंसिर २०६६
- प्रहरी उपरीक्षक – १९ साउन २०७४
- प्रहरी वरिष्ठ उपरीक्षक – ३ साउन २०७९
- प्रहरी नायव महानिरीक्षक – १३ जेठ २०८१
- प्रहरी अतिरिक्त महानिरीक्षक – ११ वैशाख २०८२
- प्रहरी महानिरीक्षक – २४ कात्तिक २०८२
खासमा उनी परराष्ट्र सेवाको अधिकृत हुन चाहन्थे । उनको अंग्रेजी भाषामा बोलाइ र लेखाइ राम्रो थियो । तर, त्यहीबेला प्रहरी निरीक्षक (इन्स्पेक्टर)मा प्रतिस्पर्धा गर्दा उनको नाम निस्कियो । प्रहरी निरीक्षक भएपछि पहिलो पदस्थापन सिन्धुली भयो, जुन तत्कालीन विद्रोही नेकपा माओवादीले १ फागुन २०५२ मा प्रहरी चौकी आक्रमण गरेर विद्रोहको सुरुआत गरेकोमध्ये एउटा जिल्ला हो । युद्धकै बेला उनी रुकुममा पनि पुगे ।
११ वर्षपछि २०६६ सालमा उनी प्रहरी नायव उपरीक्षक (डिएसपी) भए । २०७४ सालमा प्रहरी उपरीक्षक (एसपी) र २०७९ मा प्रहरी वरिष्ठ उपरीक्षक (एसएसपी)मा बढुवा भए । एसएसपीबाट २०८१ को जेठमा प्रहरी नायव महानिरीक्षक (डिआइजी) र गत वैशाखमा प्रहरी अतिरिक्त महानिरीक्षक (एआइजी) नियुक्त भए । उनी एसएसपीबाट डिआइजी र एआइजीमा बढुवा हुँदा जहिल्यै पहिलो वरीयतामा रहे । सोमबार उनै कार्की आइजिपी नियुक्त भएका हुन् ।
शान्ति सुव्यवस्था कायम गर्न चुनौतीपूर्ण मानिने काठमाडौंको प्रहरी प्रमुख उनी एसएसपी हुँदा भएका थिए । डिआइजी हुँदा लुम्बिनी प्रदेशको प्रहरी प्रमुख बने । केही समय उनले केन्द्रीय प्रहरी प्रवक्ताको जिम्मेवारी सम्हाले । एआइजीमा बढुवा भएपछि भने प्रहरीको मानव स्रोत विभागमा उनको पदस्थापन भयो । गत २३ जेन–जी विद्रोहको क्रममा ठूलो मानवीय क्षति भएपछि उनको काठमाडौं उपत्यका प्रहरी प्रमुखको रूपमा सरुवा भएको हो । अब उनले यही २७ कात्तिकदेखि प्रहरी महानिरीक्षकको जिम्मेवारी सम्हाल्ने छन् ।
