एजेन्सी - अफगानिस्तानको सबैभन्दा ठूलोमध्येको सहर मजार-ए-शरीफमा मध्यरातमा आएको भूकम्पमा कम्तीमा चार जना मारिएको अधिकारीहरूले बताएका छन्। अमेरिकी भूगर्भसम्बन्धी निकाय यूएसजीएसले ६.३ म्याग्निट्यूडको भूकम्पको केन्द्रबिन्दु जमिनको सतहबाट २८ किलोमिटरको गहिराइमा रहेको बताएको छ।
भूकम्पका कारण "उल्लेख्य हताहत" र "व्यापक प्रकोप हुन सक्ने" चेतावनी उक्त निकायले दिएको छ। मजार-ए-शरीफ राजधानी रहेको बल्ख प्रान्तका तालिबान प्रवक्ता हाजी जैदले चार जनाको मृत्यु भएको र कैयौँ मानिसहरू घाइते भएको एक्समा पोस्ट गरेका छन्।
नजिकैको हिमाली जिल्ला समानगन जिल्लाका एक जना स्वास्थ्य अधिकारीले सात जनाको मृत्यु भएको र १५० जनालाई उपचारका लागि स्वास्थ्य केन्द्रहरूमा पुर्याइएको समाचार संस्था रोएटर्ससँग बताएका छन्। बीबीसीले यो सङ्ख्याको स्वतन्त्र पुष्टि गरेको छैन।
आफ्नो अघिल्लो पोस्टमा हाजी जैदले प्रान्तका सबैजसो जिल्लाहरूमा सामान्य घाइते र सामान्य क्षतिका विवरणहरू प्राप्त भएको जनाएका थिए।"अधिकांश घाइतेहरूलाई अग्ला भवनहरूबाट खसेका कारण चोटपटक लागेको छ," उनले भनेका थिए।
मजार-ए-शरीफमा पाँच लाखभन्दा धेरै मानिसहरू बसोबास गर्छन्। सहरका अधिकांश मानिसहरू आफ्नो घर भत्कने डरले सडकमा निस्किएको एएफपी समाचार संस्थाले जनाएको छ।तालिबानका अधिकारीले मजार-ए-शरीफको प्रतिकका रूपमा रहेको ब्लू मस्कमा भग्नावशेष देखिने भिडिओ पनि सामाजिक सञ्जालमा शेअर गरेका छन्।
यो धार्मिक भवनमा धार्मिक नेता प्रथम शीया इमामको मृत शरीर सुरक्षित राखिएको छ। अहिले उक्त भवनमा मानिसहरू भेला हुने र धार्मिक कार्यक्रम तथा उत्सवहरू मनाउने गर्छन्।
-बीबीसबाट
