राजनीतिक अस्थिरताले गर्दा मुलुकको सबै क्षेत्र निराशामा डुबेको बेला एउटा क्षेत्रले भने खुसी दिलाइरहेको छ, त्यो हो क्रिकेट । नेपाली क्रिकेट टोलीले ऐतिहासिक छलाङ मार्दै विश्वभरका नेपालीहरुलाई हर्षित तुल्याएको छ । राजनीति अझै कतातिर जाने हो अनिश्चित रहेकोबेला टि–२० विश्वकपमा लगातार दोस्रोपल्ट छनोट भइ नेपाली क्रिकेट टोलीले दिएको यो खुसीलाई दीर्घकालीन बनाउन भने धेरै काम गर्न बाँकी छ ।
नेपाल लगातार दोस्रो र समग्रमा तेस्रोपटक टि–२० विश्वकप खेल्ने पक्का भएको छ । आगामी माघमा भारत र श्रीलंकामा हुने उक्त प्रतियोगितामा छनोटका लागि ओमानमा भएको प्रतियोगितामा नेपालले उत्कृष्ट प्रदर्शन गर्यो । समूह चरणमा कतार र जापानलाई हराएको नेपालले सुपर सिक्समा पनि अपराजित रहँदै छनोट प्रतियोगिताको च्याम्पियन बन्यो । नेपालले सुपर सिक्समा घरेलु टोली ओमानसहित युएई र सामोआलाई पराजित गरेको हो ।
नेपालले अन्तर्राष्ट्रिय क्रिकेट परिषद् (आइसिसी)को प्रतियोगितामा लामो समयपछि उपाधि हात पारेको छ । आइसिसी पुरुष टी–२० विश्वकप एसिया–इस्ट एसिया प्यासिफिक छनोटअन्तर्गतको अन्तिम खेलमा शुक्रबार सामोआलाई हराउँदै उपाधि जित्दा सारा नेपालीले शिर ठडिएको अनुभूति गर्न पाएका छन् । आइसिसीको प्रतियोगितामा सात वर्षयता हात पार्न नसकेको उपाधिको खडेरीलाई तोड्दै नेपाल च्याम्पियन बन्न सफल भएको छ । यो सफलता साँच्चै नै नेपाली क्रिकेटको मात्रै होइन, सारा नेपालीको हो ।
अन्तर्राष्ट्रिय क्षेत्रमा नेपाल र नेपालीले गर्व गर्नलायक बनेको छ, नेपाली क्रिकेट । यसमा खेलाडीहरुको मिहेनत र समर्पण महŒवपूर्ण छ । पछिल्ला खेलहरुमा देखिएको नतिजाले पनि यसलाई पुष्टि गर्छ । त्यसैले त नेपाली क्रिकेटका समर्थकहरु दिनानुदिन बढिरहेका छन् । क्रिकेटमा राज्यको पनि नजर पर्न थालेको छ । मुलुकभित्रै पनि क्रिकेट गतिविधि र पूर्वाधारमा लगानी बढाउँदै लगिएको छ । यो सकारात्मक पक्ष हो । तर अझै पनि राज्यले पूरा गर्नुपर्ने दायित्व पूरा गर्न सकेको छैन । खेलाडीहरुको मनोबल बढाउन सरकारले उनीहरुमाथि लगानी बढाउन जरुरी छ ।
नेपाली खेलकुद क्षेत्र अगाडि नबढ्नुको मुख्य कारण हो, राजनीतिकरण । यही कारण फुटबल शून्यको अवस्थामा पुगिसकेको छ । अन्तर्राष्ट्रिय प्रतिस्पर्धामा लाजमर्दो नतिजा दिइरहेको छ फुटबलमा । अन्य खेलकुदको पनि हालत उही छ । अहिले आशा जगाइरहेको भनेको क्रिकेटले मात्रै हो । बेलाबेला यो क्षेत्र पनि विभिन्न विवादमा नफसेको भने होइन । विभिन्न विवाद र समस्याका बाबजुद पनि आफ्नो लय छाडेको छैन, नेपाली क्रिकेटले । अब विश्वकप यात्रा तय गरिसकेकोले उक्त प्रतियोगितामा उत्कृष्ट प्रदर्शन गरी क्रिकेटका महारथी राष्ट्रहरुलाई चकित तुल्याउनेतर्फ ध्यान केन्द्रित गर्नुपर्छ । यसका लागि नेपाल क्रिकेट संघ (क्यान), सरकार र सरोकारवाला सबैले आ–आफ्नो दायित्व इमान्दारीसाथ समयमै पूरा गर्नुपर्छ ।
