झापा– कोशी प्रदेश सरकारले बाढीपहिरोमा परी ज्यान गुमाउनेहरूका परिवारलाई राहतस्वरुप ३४ लाख ५० हजार रुपैयाँ वितरण गरेको छ । प्रदेश सरकारले बाढीपहिरोबाट मानवीय क्षति भएका इलाम, पाँचथर, झापा सुनसरी, उदयपुर र खोटाङका परिवारलाई राहत वितरण गरेको हो ।
आन्तरिक मालिम तथा कानुन मन्त्रालयका विपद् शाखा प्रमुख षडानन्द भट्टराईका अनुसार सबैभन्दा बढी २१ लाख ५० हजार रुपैयाँ राहतस्वरुप इलाममा वितरण गरिएको छ । गत असोज १८ देखि २० गतेसम्म परेको अविरल वर्षाका कारण इलाममा बाढीपहिरोले ठूलो जनधनको क्षति भएको थियो । सरकारले इलामलाई तीन महिनाका लागि विपद् संकटग्रस्त क्षेत्र घोषणा गरिसकेको छ । विपद्बाट भएको खोज–अनुसन्धान तथा राहत वितरणसम्बन्धी २०७६ को दफा ९ बमोजिम विपद्मा परेको जिल्लामा राहत वितरण गरेको उनले बताए ।
विपद् शाखा प्रमुख भट्टराईले पाँचथरमा चार लाख ५० हजार रुपैयाँ, भोजपुरमा एक लाख रुपैयाँ, उदयपुरमा दुई लाख रुपैयाँ, खोटाङमा एक लाख रुपैयाँ, झापामा दुई लाख ५ हजार रुपैयाँ र सुनसरीमा दुई लाख रुपैयाँ विपद्मा परी ज्यान गुमाउनेका परिवारलाई राहतस्वरुप वितरण गरिएको जानकारी दिए ।
विपद्मा परी ज्याने गुमाउनेको परिवारलाई एक लाख रुपैयाँ र सोही परिवारको थप सदस्यको मृत्यु भएमा प्रतिव्यक्ति ५० हजार रुपैयाँका दरले थपेर राहत विरण गरिएको उनको भनाइ छ । उनले प्रदेश सरकारले विपद्मा परेका परिवारलाई चामल, दाल, तेल, नुन, बेसार, आलु, ज्याकेट, ब्लांकेट, म्याट्रेसलगायत सामग्री राहतस्वरुप वितरण गरेको बताए ।
प्रदेश सरकारले इलाममा पहिरोमा परी ध्वस्त भएका घर निर्माण गर्ने घोषणा गरेको छ । हाल सरकारले जिल्ला प्रशासन इलाममार्फत क्षतिग्रस्त भएका घरको विवरण संकलन गरिरहेको उनले जानकारी दिए । प्रदेशकै सबैभन्दा बढी क्षति भएको जिल्ला इलामलाई विपद् प्रतिकार्य र न्यूनीकरण, राहत विरणका लागि थप १० लाख रुपैयाँ जिल्ला प्रशासनमार्फत पठाइएको उनले बताए ।
