नेपाली कांग्रेसको महाविधेशन मंसिरभित्र भइसक्नुपर्छ । तर आफूलाई लोकतन्त्रको हिमायती ठान्ने दल कांग्रेसले अझै पनि महाधिवेशन गर्ने सुरसार गरेको छैन । भदौ २३ र २४ को जेन–जी विद्रोहपछि नेपाली कांग्रेस, नेकपा एमाले र माओवादी केन्द्रको नेतृत्वप्रति चर्को आलोचना सुरु भइसकेको छ । कारण, एकै व्यक्तिबाट लामो समय देश शासित हुनुपरेकोमा हो । यो बीचमा माओवादी केन्द्रले मंसिरमा महाधिवेशन गर्ने निर्णय गरिसकेको छ । माओवादीले केन्द्रीय समिति भंग गर्दै महाधिवेशन आयोजक समितिसमेत गठन गरिसकेको छ ।
यता महाधिवेशन गर्न वर्ष दिन बाँकी रहेको एमालेले पनि मंसिरमै महाधिवेशन गर्ने तयारी गरेको छ । सचिवालय बैठकले महाधिवेशनको मिति तय गरे पनि असोज २९ गतेबाट सुरु हुने केन्द्रीय कमिटीले यसलाई अनुमोदन गर्नुपर्ने छ । नेतृत्वमा जो आउला, त्यो भविष्यले बताउने छ नै । तर आफ्नै अहमताका कारण सडकमा पुगेका दुई दलले महाधिवेशन घोषणा गरिसक्दा मिति गुज्रिन लागेको कांग्रेसले भने अझै महाधिवेशनको मिति तोकेको छैन ।
हरेक संकटमा नेतृत्व वा अगुवाइ गर्ने दलको रुपमा चिनिन्छ कांग्रेसलाई । २००७ सालदेखि विभिन्न राजनीतिक उतारचढावहरुमा कांग्रेसले नेतृत्वदायी भूमिका निभाउँदै आएको छ । २०१७ मा राजा महेन्द्रको कूपछि २०३६ मा देश जोगाउन भन्दै मेलमिलापको नीति लिएर बिपी कोइराला भारतबाट देश फर्र्किए । २०४७ मा नेपाली कांग्रेसका नेता कृष्णप्रसाद भट्टराईकै नेतृत्वमा संविधान जारी भयो । २०५२ बाट सुरु भएको माओवादी द्वन्द्वलाई शान्तिपूर्ण राजनीतिमा अवतरण गरी नयाँ संविधान कांग्रेसकै नेतृत्वमा जारी भयो । २०७४ मा कमजोर अवस्थामा पुगेको कांग्रेसले आफैं हारेर पनि निर्वाचन गरायो । बामपन्थी दलहरुको झगडाका कारण प्रतिनिधिसभा विघटन भएर संकटमा पुगेको बेला २०७८ मा चुनावी सरकारको नेतृत्व लिएर कांग्रेसले निर्वाचन गरायो ।
यस्तै अप्ठेरो परिस्थितिहरुमा कांग्रेसले देशको अवस्था सम्हाल्दै आएको छ । यसैले पनि अहिलेका संकट पार लगाउने जिम्मेवारीबाट कांग्रेस पन्छिन मिल्दैन । यसका लागि मुख्य बाटो भनेको निर्वाचनमा जानु हो । निर्वाचनमा यही नेतृत्व लिएर जाँदा कांग्रेसलाई निकै नोक्सान पुग्ने कांग्रेसकै नेताहरुले बताइरहेका छन् । त्यसैले तत्काल महाधिवेशनको मिति तोकेर अगाडि बढ्नुमा नै कांग्रेसको भलाइ हुने देखिन्छ । असोज २८ बाट बस्ने केन्द्रीय समितिले कांग्रेसको अबको महाविधेशन तोकोस् ।
