मुलुकको राजनीति सामान्य अवस्थामा भएको भए यतिखेर विदेशी पर्यटकहरु धमाधम भित्रिने समय हो । किनकि, मनसुन अन्त्यसँगै मुलुकमा पर्यटकीय सिजन सुरु भइसकेको छ । तर, यो वर्ष पर्यटन क्षेत्रमा उत्साह छैन । मुख्य सिजनमै पर्यटक आगमन घटेपछि पर्यटन व्यवसायीहरु निराश देखिन्छन् । पटक–पटक राजनीतिक अस्थिरताका कारण प्रभावित बनेको पर्यटन क्षेत्रमा यसपटक जेन–जी आन्दोलनले पुनः धक्का पु¥याएको छ । २०७२ सालको भूकम्प र त्यसपछि विश्वव्यापी कोरोना महाभारीको समय धराशायी बनेको पर्यटन क्षेत्र क्रमशः लयमा फर्कंदै थियो । जेन–जी आन्दोलनले त्यसमा पुनः ‘ब्रेक’ लगाइदिएको छ ।
‘पर्यटनबाटै समृद्धि’ को नारा लगाउने सरकार र राजनीतिक दलहरु यो क्षेत्रका लागि आवश्यक वातावरण निर्माणमा असक्षम बनेको तथ्य कतै लुकेका छैन । पछिल्लो राजनीतिक अवस्था सिर्जना हुनुमा पनि दलहरु नै मुख्य जिम्मेवार हुन् । जब देशमा राजनीतिक अस्थिरता हुन्छ, विदेशी पर्यटक आउँदैनन् । अस्थिरताका बेला नेपाल आउँदा आफ्नो कार्यतालिका प्रभावित हुने त छँदै छ, सुरक्षाको दृष्टिकोणले पनि संवेदनशील हुने भएकोले पर्यटक आउन चाहँदैनन् । पर्यटक भित्र्याउनका लागि उनीहरुलाई सुरक्षाको ग्यारेण्टी दिन सक्नुपर्छ । जब सुरक्षित महसुस हुँदैन भने कोही पनि नेपाल आउन चाहँदैनन् ।
जेन–जी आन्दोलनका क्रममा भएको हत्या, हिंसा, तोडफोड, आगजनीलगायत घटनाले विश्वमा नै नराम्रो सन्देश गएको छ । उक्त आन्दोलनले सत्ता नै परिवर्तन गरी चुनावतर्फ मुलुकलाई धकेलेको छ । अझै पनि राजनीति कुन बेला के हुने हो भन्ने निश्चित छैन । चुनावी माहोल बढ्दै जाँदा हिंसात्मक गतिविधि बढ्ने आशंकामा पनि अधिकांश विदेशी पर्यटकहरु यो सिजन नेपाल आउन नचाहेको व्यवसायीहरु बताउँछन् । यो सिजनका लागि बुकिङ गरिसकेका कयौं पर्यटकले आफ्नो भ्रमण रद्द गरेका उनीहरुको भनाइ छ । व्यवसायीहरुले भनेजस्तै परिणाम पर्यटक आगमनको संख्यामा देखिएको छ । गत वर्षभन्दा बढ्ने अपेक्षा गरिएको पर्यटक संख्या यो वर्ष सिजनको सुरुआतमै घट्न पुगेको छ ।
राजनीतिक अस्थिरतालाई कारण देखाउँदै पर्यटकले धमाधम भ्रमण कार्यक्रम रद्द गरेसँगै धेरै व्यवसायीहरु कामविहीन बनेका छन् । पर्यटन क्षेत्रसँग सम्बन्धित सयौं श्रमिकहरुको रोजीरोटी बन्द भएको छ । साथै, पर्यटनसँग सम्बन्धित होटल, होमस्टे, यातायातलगायत क्षेत्र पनि प्रभावित बनेका छन् । यसले मुलुकमा विदेशी मुद्रा भित्र्याउने अवसर पनि गुमेको छ । यसबाट मुलुकको अर्थतन्त्रमा धक्का लाग्ने निश्चित भएको छ ।
पर्यटकीय सिजनमा व्यहोरेको यो क्षतिलाई पूर्ति गर्न सम्भव छैन । अबको बाटो भनेको मुलुकलाई छिटो संक्रमणबाट मुक्त गरी राजनीतिक स्थिरतातर्फ अगाडि बढाउनु हो । फागुन २१ का लागि तोकिएको निर्वाचन सफल बनाई स्थायी सरकार निर्माण गरी मुलुकमा व्याप्त भ्रष्टाचार र कुशासनको अन्त्य गर्न राजनीतिक दल र सरोकारवाला सबैको ध्यान पुग्न जरुरी छ । पर्यटनको अथाह सम्भावना छ भन्ने तर वातावरण नबनाउने प्रवृत्ति तोड्नुपर्ने आजको प्रमुख आवश्यकता हो । यसतर्फ सरोकारवाला सबै जिम्मेवार बनोस् । विश्वलाई नेपाल सुरक्षित छ भन्ने सन्देश दिन ढिलाइ नगरौं ।
