बर्सेनि आउने मौसमी विपद्ले मुलुकमा ठूलो जनधनको क्षति पु¥याउँदै आएको छ । यो वर्ष पनि उही अवस्था दोहोरियो । यही असोज १७ गतेपछिको मनसुनी विपद्ले मात्रै ५३ जनाको ज्यान लिएको तथ्यांक राष्ट्रिय विपद् जोखिम न्यूनीकरण तथा व्यवस्थापन प्राधिकरणले सार्वजनिक गरेको छ । यो बुधबारसम्मको तथ्यांक हो । यो वर्ष सरकारको पूर्वतयारीका कारण अझ धेरै क्षति हुनबाट जोगियो । जल तथा मौसम विभागले हप्ता दिनअघि नै भारी वर्षा हुने पूर्वानुमान सार्वजनिक गरेको थियो । सोहीअनुसार सरकारका निकायहरुले विपद् जोखिम क्षेत्रमा सतर्कता अपनाउन नागरिकलाई सचेत गराए । राजमार्गहरु बन्द गरियो । जसले धेरै हदसम्म सम्भावित क्षति न्यूनीकरणमा भूमिका खेल्यो । सरकारले यसपटक गरेको पूर्वतयारीको चौतर्फी प्रशंसा पनि भयो ।
प्राधिकरणले सार्वजनिक गरेको तथ्यांकअनुसार असोज १७ यताको विपद्मा मृत्यु भएकामध्ये पहिरोमा परेर ४० जना, बाढीबाट ११ जना र चट्याङबाट दुई जना रहेका छन् । पहिरोबाट इलाममा मात्रै ३८ जनाको मृत्यु भयो । पाँचथरमा एक र काभ्रेमा एक जनाले पहिरोबाट ज्यान गुमाएका छन् । बाढीबाट मृत्यु हुने ११ जनामध्ये उदयपुरमा दुई, धनुषामा दुई, तथा इलामा, पाँचथर, खोटाङ भोजपुर, मोरङ, सुनसरी र रौतहटमा एक/एक जना रहेका छन् । बाढीबाट रसुवामा चार र इलाममा एक गरी पाँच जना बेपत्ता भएका छन् । मनसुनी विपद्मा परेर उक्त अवधिमा ४७ जना घाइते भएका छन् । घाइतेमध्ये पहिरोमा परेर ३३ र चट्याङबाट १४ जना रहेका छन् ।
सरकारले विपद् पूर्वतयारीमा जस्तै अब तत्काल विपद्बाट प्रभावितहरुको राहत र पुनस्र्थापनामा पनि काम गर्नुपर्छ । त्यसो त अहिले विभिन्न तहबाट प्रभावितहरुलाई केही सहयोग भइरहेको छ । यद्यपि, प्रभावकारी रुपमा संघीय सरकारले प्रभावितसमक्ष राहत पु¥याउन जरुरी छ । पीडितलाई दिइने राहत एकीकृत प्रणालीबाट जान जरुरी छ ।
प्राधिकरणका अनुसार पछिल्लो मनसुनी विपद्मा ५० जिल्ला प्रभावित भएका थिए । यही असोज १८ गते दिउँसो र रातिको समयमा मुसलधारे वर्षा हुँदा ठूलो क्षति पु¥याएको थियो । अहिले मनसुन बाहिरिन सुरु भइसकेकोले पुनस्र्थापनाको कामलाई तीव्रता दिनुपर्छ । उक्त मनसुनी वर्षापछिको बाढी र पहिरोले अवरुद्ध बनेका राजमार्ग तथा सडकहरु अझैसम्म खुल्न सकेका छैनन् । राजमार्ग बन्द हुँदा दसैं मनाउन काठमाडौंबाट बाहिर गएकाहरु फर्कन सकस भइरहेको छ । राजमार्ग तथा सडकहरु खुलाउने कामलाई थप तीव्रता दिन पनि सरकारको ध्यान जाओस् ।
