ढाका- बंगलादेशमा आइतबार डेंगुरोग सङ्क्रमित नौ जनाको मृत्यु भएको छ । बंंगलादेशमा यो वर्ष एकै दिनमा सबैभन्दा धेरै डेंगु सङ्क्रमितको मृत्यु भएको हो । यो बर्ष कुल डेंगु सङ्क्रमितको मृतकको सङ्ख्या २१२ पुगेको स्वास्थ्य सेवा महानिर्देशनालयले जानकारी दिएको छ ।
तथ्यांक अनुसार बंगलादेशभर आइतबार यस वर्ष एकै दिनमा सबैभन्दा बढी डेंगु सङ्क्रमित उपचारका लागि भर्ना भएका छन्। स्थानीय समयअनुसार आइतबार बिहान ८ः०० बजेसम्म पछिल्लो २४ घण्टामा अस्पताल भर्ना भएका डेंगु सङ्क्रमित बिरामीहरूको सङ्ख्या एक हजार ४२रेकर्ड गरिएको छ ।
यससँगै यो वर्ष लामखुट्टेबाट सर्ने डेंगुरोगको कुल सङ्क्रमितहरूको सङ्ख्या ४९ हजार ९०७ पुगेको छ।डेंगुको थप फैलावटलाई रोक्नका लागि बंगलादेशी स्वास्थ्य अधिकारीहरूले लामखुट्टेको प्रजनन दर रोक्न र लार्भा नस्ट गर्ने अभियान सञ्चालन गर्न उपायहरू कडा पारेका छन्।
बंंगलादेशमा सन् २०२३ मा डेंगुका कारण एक हजार ७०५ जनाको मृत्यु भएको थियो । यो पछिल्ला केही बर्षमा सबैभन्दा बढी वार्षिक मृत्यु सङ्ख्या हो।सामान्यतया बंगलादेशमा मनसुनको मौसममा देखिने डेंगु ज्वरो अहिले जुन–सेप्टेम्बर अवधिभन्दा बढी फैलिरहेको पाइएको छ।
