काठमाडौं - अमेरिकी राष्ट्रपति डोनाल्ड ट्रम्पले गाजामा शान्ति कायम गर्न नयाँ २१ बुँदे योजना अघि सारेका छन्। वासिङ्टनले सार्वजनिक गरेको यो योजना अरब तथा मुस्लिम मुलुकका नेताहरूसँग दिइएको हो।
समाचार एजेन्सी एएफपीका अनुसार, संयुक्त अरब इमिरेट्स, साउदी अरब, कतार, इजिप्ट, जोर्डन, टर्की, इन्डोनेसिया र पाकिस्तानलाई यसबारे जानकारी दिइएको छ। अमेरिकाले यो पहलले इजरायलसहित सम्पूर्ण मध्यपूर्वका देशहरूको चासो सम्बोधन गर्ने दाबी गरेको छ।
युद्धविराम, बन्धक मुक्त र सहायता प्रस्ताव
यो प्रस्तावमा गाजामा स्थायी युद्धविराम, प्यालेस्टिनी क्षेत्रमा रहेका बन्धकहरूको रिहाइसहित इजरायली सेनाको फिर्ती र मानवीय सहायताको अबाध आपूर्ति सुनिश्चित गर्ने प्रावधान राखिएको छ। कूटनीतिक स्रोतका अनुसार अरब र मुस्लिम नेताहरूले यसलाई सकारात्मक रूपमा लिएका छन्। उनीहरूले गाजामा इजरायली कारबाही र कब्जा गर्ने प्रयास अन्त्य गर्न आग्रह गरेका छन्।
ट्रम्पका मध्यपूर्व दूत स्टिभ विटकोफले भने, ‘अमेरिकाले गाजामा स्थायी शान्ति कायम गर्न २१ बुँदे योजना अघि सारेको छ। यो इजरायल र क्षेत्रीय छिमेकी सबैको चासोलाई सम्बोधन गर्छ।’
हमास बाहिरै
बैठकसँग परिचित एक स्रोतका अनुसार प्रस्तावमा हमासलाई समावेश गरिएको छैन। अमेरिकाले गाजाका लागि नयाँ शासन संरचना प्रस्ताव गरेको छ जसमा हमासको कुनै भूमिका रहने छैन।सन् २०२३ अक्टोबरमा हमासको आक्रमणपछि सुरु भएको युद्धमा इजरायलले हमासलाई समाप्त गर्ने घोषणा गरिसकेको छ र भविष्यमा उसको सत्तासँग कुनै संलग्नता नहुने स्पष्ट पारेको छ।
प्यालेस्टिनी प्राधिकरण र नयाँ सुरक्षा बल
प्रस्तावमा प्यालेस्टिनी प्राधिकरणलाई केही भूमिकासहित सुधार गर्ने र क्षेत्रीय देशहरूको आर्थिक सहयोगमा नयाँ सुरक्षा बल गठन गर्ने परिकल्पना गरिएको छ।उक्त बलले अरब तथा मुस्लिम देशका सेनासँग समन्वय गरी गाजाको पुनर्निर्माण र प्रशासनमा सहयोग गर्नेछ।यो प्रस्तावलाई ट्रम्पका ज्वाइँ जारेड कुश्नर र पूर्व बेलायती प्रधानमन्त्री टोनी ब्लेयरले पछिल्ला महिनामा अघि सारेका अन्य विचारहरूभन्दा फरक बताइएको छ।
बस्ती विस्तार रोक्न दबाब
अरब र मुस्लिम नेताहरूले पश्चिम किनाराको केही भाग कब्जा गर्ने वा जेरुसेलमका पवित्र स्थलहरूको कानुनी तथा ऐतिहासिक स्थिति परिवर्तन गर्ने प्रयास नहुने ग्यारेन्टी गर्न माग गरेका छन्। स्रोतका अनुसार नेताहरूले गाजावासीहरूको विस्थापन नगर्ने, फिर्तीमा अवरोध नगर्ने र गाजा कब्जा नगर्ने स्पष्ट आश्वासन दिन दबाब दिएका छन्।
एक्सिओसका अनुसार ट्रम्पले पनि नेताहरूलाई आफूले इजरायललाई पश्चिम किनाराको कुनै भाग कब्जा गर्न अनुमति नदिने बताए।
