जेनजी विद्रोहको बलमा बनेको अन्तरिम सरकारकी प्रधानमन्त्री सुशीला कार्कीले आफू संविधान र लोकतन्त्रप्रति प्रतिबद्ध रहेको संकेत गरेकी छिन् । बिहीबार देशबासीको नाममा सम्बोधन गर्दै प्रधानमन्त्री कार्कीले सडकबाट उठेको आवाजलाई सुनुवाई गर्ने अधिकार आफूसँग नभएको स्पष्ट पारिन् ।
अहिले सडकमा उठेको माग हो प्रत्यक्ष कार्यकारी प्रधानमन्त्रीको । जेनजी युवाहरुमाझ यो माग लोकप्रिय बनिरहेको बेला कार्कीले संवैधानिक प्रक्रियाबाटमात्र यो सम्भव हुने प्रष्ट पारेकी हुन् । पूर्वप्रधानन्यायाधीशसमेत रहेकी कार्की गत भदौ २२ गते जेनजी विद्रोह भएपछि सरकारको नेतृत्वमा आएकी हुन् । निर्वाचन प्रणाली महँगो भएको र यसैका कारण भ्रष्टाचार बढेको कतिपयको तर्क छ । भ्रष्टाचारकै कारण देशमा विकास हुन नसकेको भन्दै जेनजी युवाहरुले यसविरुद्ध आन्दोलन छेडेका थिए । यही बीचमा उनीहरुले संविधान संशोधनको मागसमेत गरेका थिए ।
संविधान संशोधनका लागि संसदीय प्रक्रिया हुन्छ । २०५२ पछि भएको लामो युद्धले संविधानसभाको तय गरेसँगै नेपालमा संघीय लोकतन्त्र स्थापना भएको थियो । सोही संविधानसभाले नयाँ संविधान बनेसँगै देशले नयाँ गति लियो । यद्यपि नेताहरुमा देखिएको आसेपासेवाद, अनियमितता, भ्रष्टाचारका कारण जनतामा चरम असन्तुष्टि देखा पर्यो । यही आक्रोश सडकमा पोखिँदा दलीय नेतृत्व ढल्यो र अहिले निर्दलीय सरकार छ । यो सरकारको म्यान्डेड भनेको फागुन २१ भित्र चुनाव गराउनु हो । तर सडकबाट योबाहेक शासकीय स्वरुप नै फेर्न आवाज उठ्दै छ । कतिपय भिडको आवाज गलत पनि हुन्छन् र संविधानअनुसार अघि बढ्नुपर्छ भन्नेमा प्रधानमन्त्री कार्कीको बिहीबारको सम्बोधनले प्रष्ट पारेको छ । यद्यपि जेनजी विद्रोहको पहिलो र स्पष्ट माग भनेको भ्रष्टाचार गरी अकुत सम्पतत्ति कमाएकाहरुमाथिको कारबाही हो । यस विषयमा भने सरकार निर्मम भएर अगाडि बढ्नुपर्छ ।
यहीबीचमा सस्तो लोकप्रियता कायमका लागि विदेशमा रहेकाहरुबाट पनि मतदान गर्ने माग उस्तै गरी अघि बढेको छ । विदेशमा रहेका नेपालीहरुले मतदान गर्दा सम्बन्धित देशले अनुमति दिन्छ वा दिँदैन, दिए कामदारह?लाई संयुक्त रुपमा बिदा दिन्छन् वा दिँदैनन् भन्ने विषयमा सरकारले ख्याल गरेको छैन । यतिमात्र हैन उक्त देशमा सभा, र्याली, जुलुस गर्ने छुट छ वा छैन । यस्तो विषयमा सरकारले अध्ययन शुरु गरेको भन्दै प्रधानमन्त्री कार्कीले सुझबुझपूर्ण सन्देश दिएको देखिन्छ । यसले पनि प्रधानमन्त्री कार्की संविधानप्रति प्रतिबद्ध छिन् भन्ने प्रष्ट देखिन्छ ।
