काठमाडौं– सरकारले नेपाली कांग्रेसका सभापति शेरबहादुर देउवा र उनकी पत्नी डा आरजु देउवाको सम्पत्तिमाथि अनुसन्धान अघि बढाएको छ । जेनजी आन्दोलनका क्रममा देउवा निवास बुढानिलकण्ठमा जलेका नोटहरु संकलन गरेर सरकारले उनीहरुको सम्पत्तिमाथि अनुसन्धान अघि बढाएको हो ।
जेनजी आन्दोलनको क्रममा बुढानिलकण्ठस्थित देउवा निवासमा आगजनी भएको थियो । आगलागीपछि उक्त भवनमा जलेका नोटहरु भेटिएको भन्दै भिडिओहरु सार्वजनिक भएका थिए । यसै विषयमा सम्पत्ति शुद्धीकरण विभागले प्रमाणहरु संकलन गरी परीक्षणका लागि नेपाल प्रहरकिो फरेन्सिक ल्याबमा पठाएको जनाएको छ ।
गत आइतबार विभागको टोली देउवा निवास र पूर्वमन्त्री दीपक खड्काको घरमा पुगेको थियो । देउवा निवासमा अमेरिकी डलरसहित नेपाली हजार, पाँच सयका नोटहरू जलेको टुक्रा भेटिएको थियो भने पूर्वऊर्जामन्त्री खड्काको घरबाट नोट उड्दै गरेको भिडियो सार्वजनिक भएको थियो । कतिपयले देउवाको घरमा पैसा राख्ने सुरुङसमेत रहेको दाबी गरेका छन् ।
जलेको घर र त्यसको अवस्था, रकम रहेको ठाउँ लगायतको मुचुल्का भएको र अनुसन्धान अघि बढाइएको विभागले जनाएको छ । ‘ती प्रमाणको यथार्थ परीक्षण गर्न नेपाल प्रहरीको ल्याबमा प्रमाण सहितको पत्र पठाइएको छ,’ विभाग स्रोतले भन्यो । घटनाको ११ दिनपछि विभागको टोली गएर मुचुल्का गरेको हो । मुचुल्का उठाउन गएको विभागको हातमा भने माटो र खरानीमात्र परेको विभाग स्रोतले भन्यो । ढिला पुग्दा त्यहाँ पैसाको टुक्रासमेत सर्वसाधारणले खोस्रेर लगेका थिए ।
राज्यका निकाययहरु सक्रिय भइसकेका छन् । के के रोक्का गर्नुपर्छ रोक्का गर्छ । बयान पनि लिनुपर्ने होला । पक्राउ पनि पर्ने होला
ओमप्रकाश अर्याल, गृहमन्त्री
विभागबाट खटिएका टोलीले विभिन्न भिडियोलाई प्रमाणका रुपमा लिएको र प्रत्यक्षदर्शीसँगसमेत कुराकानी गरेको बताइएको छ । सम्पत्तिमाथि छानबिनका लागि देउवा दम्पत्तीको राहदानीसमेत रोक्क गर्ने तयारी सरकारले गरेको छ । सरकारले नेताहरुका सम्पत्तिमाथि छानबिन गर्न कुनै कसर बाँकी नराख्ने गृहमन्त्री ओमप्रकाश अर्यालले बताए । ‘भ्रष्टाचार र सुशासनमा सरकारले खुट्टा टेक्छ । तथ्य स्थापित भएपछि पछाडि फर्कनै पर्दैन,’ गृहमन्त्री अर्यालले बताए ।
गौरीबहादुर कार्की नेतृत्वको उच्चस्तरीय जाँचबुझ आयोगले दिएको सुझावको आधारमा कारबाही अघि बढ्ने अर्यालको भनाई थियो । अनुसन्धान गर्ने निकायले कानुनअनुसार पक्राउ गर्नसक्नेसमेत सक्ने उल्लेख गर्दै गृहमन्त्री अर्यालले यो मुद्दा नछाड्ने दाबी गरे । ‘राज्यका निकाययहरु सक्रिय भइसकेका छन् । के के रोक्का गर्नुपर्छ रोक्का गर्छ । बयान पनि लिनुपर्ने होला । पक्राउ पनि पर्ने होला,’ अर्यालले भने ।
प्रदर्शनका क्रममा व्यक्तिका नीजि घर तोडफोड र आगजनी हुँदा अस्वभाविक रूपमा देखिएको नगद रकमका सम्बन्धमा सरकारका सम्बद्ध निकायले छानबिनको कारबाही सुरु गरिसकेको छ
सुशीला कार्की, प्रधानमन्त्री
प्रधानमन्त्री सुशीला कार्कीले पनि देशबासीको नाममा सम्बोधन गर्दै विगतमा भएका भ्रष्टाचारबारे स्पष्ट जानकारी पाइसकेको उल्लेख गर्दै दोषीलाई कारबाही गरिने बताएकी छन् । ‘वर्तमान सरकारले विगतमा भएका भ्रष्टाचारको सन्दर्भमा यो छोटो समयमा स्पष्ट जानकारी पाइसकेको छ । तसर्थ, त्यसको आवश्यक छानबिन गरी दोषीलाई कारबाहीको प्रकृया अगाडि बढाउनेछ,’ बिहीबार सम्बोधनका क्रमा प्रधानमन्त्री कार्कीले भनिन्, ‘प्रदर्शनका क्रममा व्यक्तिका नीजि घर तोडफोड र आगजनी हुँदा अस्वभाविक रूपमा देखिएको नगद रकमका सम्बन्धमा सरकारका सम्बद्ध निकायले छानबिनको कारबाही सुरु गरिसकेको छ ।’
देउवाको सचिवालयले भने विज्ञप्ती जारी रकम राख्ने सुरुङ र पैसा नभएको दाबी गरेको थियो । उक्त सुरुङ नभइ पानी ट्याङ्की रहेको दाबी देउवाको सचिवालयको थियो । ‘सामाजिक सञ्जालमा देखाइएका दृश्यहरू कपोकल्पित, अतिरञ्जित र भ्रामकका साथै दुसित मनासयले बदनाम गर्ने उद्देश्यले फैलाइएका हुन्,’ विज्ञप्तिमा भनिएको छ, ‘जनमानसमा अपमानित गर्ने मनसायले प्रविधिको गलत प्रयोगबाट विभिन्न ठाउँमा विभिन्न समयका जलेका नोटका दृश्यहरू जोडेर सम्पादित फोटो र भिडियोहरू युटुब तथा सामाजिक सञ्जालमा सम्प्रेषण गरिएको पाइएको छ । यसमा कुनै सत्यता नभएको स्पष्ट पार्न चाहन्छौं ।’
पटकपटक प्रधानमन्त्री भएका देउवाले आरजु राणामार्फत भूमिगत गिरोहमार्फत रकम बुझ्ने गरेको आरोप लाग्दै आएको छ । नेपालीलाई भुटानी शरणार्थी बनाइ अमेरिका लैजाने प्रकरणमासमेत आरजु मुछिएकी थिइन् । यतिमात्र हैन सरकारी निकायका प्रमुख नियुक्तीमासमेत देउवा दम्पत्तीलाई ठुलो रकम बुझाउनुपर्ने चर्चा चल्ने गर्छ । सबैभन्दा ठुलो दल नेपाली कांग्रेसका नेतासमेत रहेका देउवाले देशभर आफ्ना नेता कार्याकर्तालाई टिकट बाँड्दासमेत ठुलै रकम लिने गरेको नेताहरु गुनासो गर्छन् । शक्ति र पदको आडमा देउवाले यस्ता घटनालाई गुपचुप राख्न सफल भएको बताइन्छ ।
