हिन्दू धर्मावलम्बीहरुको दसैं पर्व भित्रिसकेको छ । यो बेला राजधानी तथा सहरी क्षेत्रमा रहेका मानिसहरु आफ्नो गाउँ जाने क्रम बढेको छ । कोही किनमेलका लागि सहरबजारमा निस्किरहेका छन् भने कोही पर्व मनाउन गाउँ पसिरहेका छन् । चाडपर्वमा अपराधका घटना धेरै हुने गरेका छन् । लुटपाट, हत्याका घटना यस्तै बेला बढ्ने गर्छन् । अत्याधिक मादकपदार्थ सेवन, रिसइबी साँध्नेजस्ता कारण पनि अपराधिक घटना बढ्छन् । अपराधका मुख्य कारण पत्ता लगाउन निकै अनुसन्धान गर्नुपर्छ । कतिपयले आफू सहर छोडी घर गएको, घर छोडेर सहर गएको सूचनाहरु सामाजिक सञ्जालमा राख्दा पनि चोरीका घटना बढेका छन् ।
यसपटक जेन–जी विद्रोहका कारण १३ हजारभन्दा बढी कैदी जेल बाहिर निस्किए । तीमध्ये आधाआधी जेल फर्किए पनि आधी कहाँ छन् कसैलाई थाहा छैन । यहीबेला प्रहरीको मनोबल पनि खस्किएको छ । आन्दोलनकारीहरूले प्रहरीका एक हजार २७६ थान राइफल र पेस्तोलसमेट लुटेका छन् । प्रहरीको आन्तरिक अभिलेखअनुसार आन्दोलनपछि ९८ हजार ४९१ थान गोलीको अत्तोपत्तो छैन । जेन–जीको आन्दोलनमा काठमाडौंबाट लुटिएका दुई पेस्तोल र २८ राउण्ड गोली कैलालीको गौरीगंगामा मंगलबार भेटिएको छ ।
यसरी काठमाडौंबाट लुटिएका हतियार देशभर पुगेको अनुमान गर्न सकिन्छ । यस्ता हतियारले समाजमा आतंक सिर्जना हुन्छ । नागरिकले असुरक्षा महसुस गर्छन् । प्रहरीबाट लुटिएका हतियारहरू घातक छन् भन्ने कुरा त भदौ २३ गतेको प्रदर्शनकै क्रममा १९ जनाभन्दा बढी मारिएको घटनाबाट प्रस्ट हुन्छ । एक त सजाय भुक्तान गरिरहेको व्यक्तिहरु खुलेआम समाजमा प्रवेश हुनु, अर्को उनीहरुको हातमा घातक हतियार हुनुले त्रास बढाएको छ ।
गत असोज ३ गते कारागारबाट भागेका काभ्रे पनौतीका एक व्यक्तिले आफ्नै श्रीमतीको हत्या गरे । जेन–जी आन्दोलनका क्रममा नक्खु कारागारबाट भदौ २४ गते भागेका ती कैदीले आफ्नो अपराध स्वीकार गरिसकेका छन् । यस्तो अवस्थामा प्रहरीले अबका दिनमा हतियारमात्र हैन हतियाररहित कैदीहरुको पनि विशेष निगरानी राख्नुपर्छ । किनकि, कारागारबाट बाहिर निस्केका कैदीमाथि पनि आक्रमण हुन सक्छ । यसले थप अपराध बढ्ने भएकोले बेलैमा सूक्ष्म निगरानी राख्नु आजको आवश्यकता हो । आन्दोलनको बेला प्रहरीमाथि आक्रमण गरे पनि शान्तिसुरक्षाका लागि प्रहरी अतिआवश्यक हो भन्ने प्रमाणित भइसकेको छ । त्यसैले पुनः मनोबल दरो बनाएर प्रहरीले चाडपर्व लक्षित सुरक्षा व्यवस्थालाई कसिलो बनाउनुपर्छ ।
