दसैं सुरु भएसँगै सहरी बजार ‘भाइब्रेन्ट’ हुने छाँट देखिन्छ । किनमेलका लागि देशभरबाट काठमाडौं ओइरने क्रम पनि बढ्दो छ । किनमेल गर्न आउने र गाउँ जानेको लर्कोले प्रमुख राजमार्गहरुमा सवारीको चाप बढ्दो छ । यस्तै आउजाउका कारण राजमार्गहरु व्यस्त हुने समय हो यो । अर्को विषय पर्यटक भित्रने याम पनि हो यो । तर वर्षाका कारण सडक भने निरन्तर अवरुद्ध हुन थालेको छ । शनिबार बिहानैबाट मुग्लिन–नारायणगढ सडकखण्ड पहिरोले अवरुद्ध हुँदा यात्रीले सास्ती खेप्नुपर्याे। एक त निरन्तर वर्षा, अर्को पूर्वपश्चिम जाने सुरक्षित सडकको विकल्प नहुनु ।
पहिरो खस्दा पनि एकछिन नरोकी खोल्नुपर्ने बाध्यता छ । आइतबार केही बेर खुला गरेको तुइन खोलाको सडक पहिरो खस्न थालेपछि साँझ ८ बजेबाट पूर्णरुपमा बन्द भएको छ । मनसुन सक्रिय भएकाले पूर्व जाने बिपी राजमार्गमा रातिमा सवारी आवागमन बन्द गरिएको छ । अर्को सूचना नआएसम्म प्रत्येक दिन बेलुका ८ः०० देखि बिहान ५ः०० बजेसम्म बिपी राजमार्गमा सवारीसाधन आवागमनमा रोक लगाइएको हो । यसले पनि मुग्लिन–नारायणगढ सडकखण्डमा सवारी चाप बढाएको थियो ।
कोशी राजमार्गको सखुंवासभास्थित भोटखोला गाउँपालिका–४ बरुण र मकालु गाउँपालिका–३ एकुवामा अविरल वर्षापछि सडक पूर्णरूपमा बिग्रिएको छ । सिद्धिचरण लोकमार्गको उदयपुरको कटारी नगरपालिकारू–८ को सिरिरेमा सडक अवरुद्ध भयो । रसुवागढीमा नेपाल–चीन जोड्ने पुल बाढीले बगाए पनि अझै पुनर्निर्माण हुन सकेको छैन, जसले गर्दा अझैसम्म पूर्णरूपमा यो सडक अवरुद्ध छ । अरनिको राजमार्गअन्तर्गत सिन्धुपाल्चोकको भोटेकोशी गाउँपालिका–२ मा पर्ने कोदारी र सोही गाउँपालिकाको वडा नम्बर ४ स्थित डाक्लाङमा पहिरोका कारण सडक पूर्णअवरुद्ध रहेको छ । जाजरकोट–डोल्पा खण्ड पूर्णरूपमा अवरुद्ध भएको छ । जाजरकोटको नलगाड नगरपालिका–११ भिरकुनास्थित जाजरकोट–डोल्पा खण्डमा माथिबाट ढुंगा, माटोसहितको सुक्खा पहिरो खसेपछि सडक पूर्णरूपमा अवरुद्ध भएको प्रहरीको भनाइ छ । त्यस्तै, म्याग्दी बेनी–दरवाङ खण्ड पनि पूर्णरूपमा अवरुद्ध भएको छ ।
निरन्तर वर्षाले माटो खुकुलो बनाएपछि पहिरो खस्ने र जमिन भासिने गर्छ । यस्तो विषयमा सडक विभागदेखि सम्बन्धित निकायले विशेष ध्यान पु¥याउनैपर्छ । यस्तै चापको बेला दुर्घटना हुने सम्भावना बढी रहन्छ । यसैका लागि सरकारले सुरक्षाका योजनाहरु अघि बढाउने र रातको समयमा सडक बन्द गर्नुपर्छ । पहिरोग्रस्त क्षेत्रमा सावधानीपूर्वक पहिरो पन्छाएरमात्र यातायात सञ्चालन गरेमा सम्भावित दुर्घटनाबाट जोगिन सकिन्छ ।
