काठमाडौं - काठमाडौं महानगरपालिका वडा नं. ५ ले आयोजना गरेको डबली सर्किट रन–२०८२ सम्पन्न भएको छ । वडाबासी र वडाभित्रका विद्यालयका २६४ जना छात्रछात्रा (खेलाडीहरू) सहभागी उक्त प्रतिस्पर्धामा ब्वाइजतर्फ सफल पुन र गर्ल्सतर्फ साङ्ग्रिला श्रेष्ठ स्वर्ण पदक जित्न सफल भएका हुन् ।
१८ वर्षमुनिका स्कुले खेलाडीबीच सम्पन्न प्रतियोगितामा गर्ल्सतर्फ २ किलोमिटर र ब्वाइजतर्फ ३ किलोमिटर दूरी तोकिएको थियो । दौड गहनापोखरीबाट सुरु भई भीमसेनस्थान, कृष्णमन्दिर डबली, कोटालटोल हुँदै पुनः गहनापोखरीमै सम्पन्न भएको थियो । उद्घाटन वडा अध्यक्ष वीरेन्द्र प्रजापतिले सिट्ठी फुकेर गरेका थिए ।
