बीबीसी अफगान - तालिबान सरकारले अफगानिस्तानको विश्वविद्यालय शिक्षा प्रणालीमा महिलाहरूले लेखेका पुस्तकहरू हटाएको छ। चार वर्षअघि सत्तामा फर्केयता तालिबानले ल्याएका कैयौँ प्रतिबन्धहरूको शृङ्खलामा आएको यो पछिल्लो आदेश हो।
त्यसले मानव अधिकार र यौन उत्पीडनसम्बन्धी शिक्षणलाई समेत गैरकानूनी बनाएको छ। तालिबानले "शरियाविरोधी र तालिबान नीति" का कारण भन्दै ६८० पुस्तकहरूलाई "चिन्ताजनक" ठहर्याएको छ। जसमध्ये "सेफ्टी इन केमिकल ल्याब्रोट्री" जस्ता शीर्षकसहित महिलाहरूले लेखेका झण्डै १४० पुस्तकहरू पनि समावेश छन्।
विश्वविद्यालयहरूलाई अब विभिन्न १८ विषयहरू पढाउन अनुमति नरहेको समेत भनिएको छ। ती विषय "शरिया सिद्धान्त र प्रणालीका नीतिसँग बाझिने" भएकाले त्यसो भनिएको एक तालिबान अधिकारीले बताए।
यसै साता मात्र तालिबानको सर्वोच्च नेताको आदेशमा कम्तीमा १० प्रान्तहरूमा 'फाइबर-अप्टिक' इन्टरनेट प्रतिबन्ध लगाइएको थियो। अधिकारीहरूले त्यसलाई अनैतिकता रोक्नको लागि कदम चालिएको बताएका थिए।
