भदौ २३ गते जेनजी विद्रोह भयो । उक्त समयमा सरकारको नेतृत्वमा थिए एमाले अध्यक्ष केपी शर्मा ओली । ओलीलाई साथ दिइरहेको ठुलो दल थियो नेपाली कांग्रेस । प्रमुख प्रतिपक्षी दल थियो माओवादी केन्द्र । विकसित राजनीतिक घटनाक्रमका कारण यी तीनै दलको वरीयता अहिले गुमेको छ । संसद विघटन भएसँगै सत्ताको शक्तिमा रहेका यी दल सडकमा पुगेको छ ।
जेनजी विद्रोहसँगै प्रशासनिक केन्द्रहरु ध्वस्त भएका छन् भने राजनीतिक दलका नेताहरुको घर पनि जलेका छन् । राजनीतिक दलका मुख्यालयहरुमा आगजनी भएका छन् । यही मेसोमा राजनीतिक दलका नेताहरु एकपछि अर्को सार्वजनिक हुन थालेका छन् । मंगलबार माओवादी केन्द्रका अध्यक्ष पुष्पकमल दाहाल पेरिसडाँडामा देखिए । त्यसैगरी बिहीबार दाहालले भिडियो सन्देश जारी गरे ।
प्रधानमन्त्रीबाट राजीनामा दिएर सेनाको सुरक्षामा बसेका एमाले अध्यक्ष केपी शर्मा ओली पनि सार्वजनिक भएका छन् । संविधान दिवसको अवसर पारी ओलीले आफ्ना नेता कार्यकर्तासमक्ष सम्बोधन गर्ने भएका छन् । विद्रोहकै क्रममा प्रदर्शनकारीले शीर्ष तीन नेताको खोजी गरेका थिए । जसक्रममा नेपाली कांग्रेसका सभापति शेरबहादुर देउवा आफ्नै निवासमा कुटिए । परराष्ट्रमन्त्री डा आरजु देउवा पनि कुटिए ।
जेनजी विद्रोह अहिले साम्य भएको छ । राष्ट्रपति रामचन्द्र पौडेल र नेपाली सेनाको अहम भूमिका निभाएसँगै स्थिति साम्य बनेको हो । दलविरुद्ध जेनजीले ओकलेको आक्रोश एक किसिमले मत्थर भएको छ । राष्ट्रपति र नेपाली सेनाको सुझबुझपूर्ण निर्णयले शान्ति छाएको छ ।
प्रधानमन्त्रीबाट जबरजस्ती हटेका ओलीले पक्कै पनि यो विषय बुझेको हुनुपर्छ । त्यसैले आफ्नो कार्यकर्तालाई उक्साउने अभिव्यक्ति भन्दा पनि आफू र आफ्नो दल सुधार्ने खालको काममा लाग्नु नै वेश देखिन्छ । किनभने मिसन ०८४ मा रहेका दलको लागि चुनाव धेरै पर छैन । फागुन २१ गते चुनाव तोकिएको छ । यो चुनावमा दलसँग असन्तुष्ट मतलाई कसरी रिझाउने र समृद्ध नेपालको अभियानलाई कसरी सफल पार्ने भन्ने विषयमा ओलीले सोच्नु आवश्यक छ ।
अहिले नेपाली कांग्रेसका सभापति देउवा र उनकी पत्नी उपचाररत छन् । कांग्रेस पनि आफ्नो सेनापतिलाई घाइते बनाएकोमा मुर्मुरिएको होला । यो सबै नेताकार्यकर्ताकै कारण भएको हो । अब सबै दलले आफूलाई सुधारको बाटोमा लैजानु आवश्यक छ । जेनजीको आक्रोशलाई थप उमाल्नेभन्दा पनि चिस्याउने र चुनावी वातावरण बनाउनु दलको कर्तव्य हो । जसै नागरिक अगुवाहरुसँगको भेटमा राष्ट्रपति पौडेलले सन्देश पठाएका छन् कि निकै अप्ठेरो परिस्थितिको सामना गरेर व्यवस्था जोगाएको छु, अब यो व्यवस्था जोगाउने पालो दलहरुको ।
