जेनजी आन्दोलनले सत्ताच्युत ओली आज पार्टी मुख्यालय च्यासल निरीक्षणमा
२४ भदौको अपराह्न बालुवाटारबाट सेनाले ओलीको उद्धार गरेको थियो
ओली-शाक्य दम्पती नेपाली सेनाको महाराजगञ्ज युद्ध भैरब ब्यारेकमा राखिएको थियो
पूर्वप्रधानमन्त्री तथा हाम्रो पार्टीका अध्यक्ष केपी शर्मा ओली सेनाको ब्यारेकबाट निस्किनुभएको छ । उहाँले आज पार्टी कार्यालयको निरीक्षण गर्नुहुन्छ र संविधान दिवसको अवसरमा आयोजना गर्ने कार्यक्रमलाई सम्बोधन गर्नुहुन्छ
पद्म अर्याल
सचिव, नेकपा एमाले
काठमाडौं- जेनजी आन्दोलनमा भएको दमनले हिंसा भड्किँदा राजीनामा दिएर नेपाली सेनाको ब्यारेकमा शरण लिन पुगेका पूर्वप्रधानमन्त्री केपी शर्मा ओली १०औं दिनमा सार्वजनिक भएका छन् । उनलाई बिहीबार एमाले नेताकार्यकर्ताले स्वागत गरे ।
आन्दोलनकारीले २४ भदौको अपराह्नतिर प्रधानमन्त्रीको सरकारी निवास बालुवाटार घेरेपछि बढ्दो असुरक्षाका कारण उनले प्रधानमन्त्रीबाट राजीनामा दिए । लगत्तै नेपाली सेनाको हेलिकोप्टरमार्फत् उनको उद्धार भयो । यसबीचमा पूर्वप्रधानन्यायाधीश सुशीला कार्कीको नेतृत्वमा गैरदलीय अन्तरिम सरकार गठन भएको छ । कार्की नेतृत्वका सरकारको सिफारिसमा प्रतिनिधिसभा विघटन भएको छ । आगामी २१ फागुनमा चुनाव हुने भएको छ । विकसित यिनै राजनीतिक घटनाक्रमसँगै देशमा शान्ति बहाली भएको छ । यस्तो अवस्थामा पूर्वप्रधानमन्त्री ओली सार्वजनिक भएका हुन् । उनीभन्दा दुई दिनअघि पूर्वप्रधानमन्त्रीहरू पुष्पकमल दाहाल, माधवकुमार नेपाल, झलनाथ खनाल सेनाको ब्यारेकबाट निस्किएका थिए ।
एमाले सचिव पद्म अर्यालका अनुसार ओली आज जेनजी प्रदर्शनकारीले ध्वस्त बनाएको पार्टी मुख्यालय जाँदैछन् । त्यहाँ बिहान ८ बजे पार्टीले संविधान दिवस कार्यक्रम आयोजना गर्दैछ । कार्यक्रमलाई ओलीले सम्बोधन गर्ने छन् ।
‘पूर्वप्रधानमन्त्री तथा हाम्रो पार्टीका अध्यक्ष केपी शर्मा ओली सेनाको ब्यारेकबाट निस्किनुभएको छ । उहाँले आज पार्टी कार्यालयको निरीक्षण गर्नुहुन्छ र संविधान दिवसको अवसरमा आयोजना गर्ने कार्यक्रमलाई सम्बोधन गर्नुहुन्छ’, अर्यालले भनिन् ।
२३ भदौमा घातक बल प्रयोग गरेर जेनजी आन्दोलनलाई दबाउन खोजेको गम्भीर आरोप ओलीमाथि छ । त्यसदिन काठमाडौंमा १७ जना र इटहरीमा दुई जना गरी १९ जना जेनजी प्रदर्शनकारीको प्रहरीले चलाएको गोली लागेर मृत्यु भयो । ३ सय ४७ जना घाइते भए । निहत्था युवा विद्यार्थीमाथि गोली बर्साएर बर्बर दमन गरेको भन्दै २४ भदौमा ओलीको आलोचना मात्रै भएन, देशव्यापी ठूलो प्रदर्शन भयो । हिंसात्मक बनेको प्रदर्शन नियन्त्रणबाहिर गयो । त्यसपछि प्रधानमन्त्रीबाट राजीनामा दिएर ओली ज्यान जोगाउन सेनाको शरणमा पुगे । उनको साथमा श्रीमती राधिका शाक्य पनि थिइन् । उनीहरू दुवै जना १० औँ दिनमा सेनाको ब्यारेकबाट निस्किएका हुन् । भनिन्छ, ओली–शाक्य दम्पती नेपाली सेनाको महाराजगञ्ज युद्ध भैरब ब्यारेकमा थिए । ब्यारेकबाट निस्किएपछि उनीहरूका लागि भक्तपुरको सूर्यविनायक नगरपालिकाको गुन्डुमा बसोबासको चाँजोपाँजो मिलाइएको छ, यो एमालेकै पोलिटब्युरो सदस्य महेश बस्नेतको गाउँ हो ।
बस्नेतका अनुसार दसौँ हजार कार्यकर्तामाझ ओली आज पार्टी कार्यालयमा सार्वजनिक हुँदैछन् । ओलीविरुद्ध भने कर्तव्य ज्यानसम्बन्धी कसुरमा यसअघि नै जाहेरी परेको छ । जाहेरीका आधारमा प्रहरीले पक्राउ गर्न सक्ने सम्भावना छ । यस्तो अवस्थामा ओलीलाई बस्नेतको अगुवाइमा पार्टी कार्यालयमा सार्वजनिक गर्न लागिएको हो ।
ओली ती नेता हुन्, जसले जेन–जी आन्दोलनको २७ घण्टामै घुँडा टेके । राजनीतिक इतिहासका जानकारहरूका अनुसार यति छोटो अवधिमा प्रधानमन्त्रीले घुँडा टेकेको नेपालको राजनीतिक इतिहासमा पहिलोपटक हो । ज्यान जोगाउन प्रधानमन्त्रीबाट राजीनामा दिएर सेनाको शरणमा पुग्ने पनि ओली नै पहिलो नेता हो ।
ओली गत वर्षको ३१ असारमा कांग्रेसको समर्थनमा प्रधानमन्त्री नियुक्त भएका थिए । प्रधानमन्त्री भएको १५औं महिनामा राजनीतिमा खासै चासो नराख्ने जेनजी पुस्ताले उनको सत्ता पल्टाइदियो । यो पुस्ताले १९ भदौमा ओली सरकारले सूचीकृत नभएका २६ वटा सामाजिक सञ्जाल सञ्चालनमा रोक लगाउन गरेको निर्णयलाई अप्रिय ठान्यो । त्यहीबेला उनीहरूले नेपोबेबी अभियान चलाए, जहाँ उनीहरूले नेताका छोराछोरीको विलासितापूर्ण जीवन जिउन मिल्नेगरिको आर्थिक स्रोत के हो भन्दै प्रश्न उठाए । भ्रष्टाचार अन्त्यको माग गरे । अन्ततः २३ भदौमा उनीहरू हजारौंको सङ्ख्यामा सडकमा आए । जबकि, ओली सरकारले उनीहरूको आन्दोलनलाई नजरअन्दाज ग¥यो । तर, त्यही आन्दोलनले ओलीलाई सत्ताच्युत मात्रै गरेन, राजनीतिको किरानामा पु¥याइदियो । दोस्रोपटक गैरदलीय सरकार बन्ने स्थिति आयो ।
यो स्थिति निम्तिनुमा ओलीकै अहंकार र दम्भले काम गरेको टिप्पणी गर्छन् । उनी जेन–जीलाई बेलैमा सुन्न तयार भएको भए देश खरानी नहुने बताइन्छ ।
