जेन-जीको आन्दोलनपछि प्रमुख दलहरु सत्ताविहीन भएका छन् । परम्परागत तवरले खाइपाइ आएको सत्ता गुमेपछि अहिले दलहरु झस्किएका छन् । सत्ता गुमाएसँगै दलहरु आन्तरिक तयारीमा जुटेको देखिन्छ । अन्तरिम सरकारलाई चुनावको जिम्मेवारी दिइएको छ । प्रतिनिधिसभा विघटनको विरोध गरे पनि दलहरुले चुनावमा जाने तयारी गरिसकेका छन् । चुनावमार्फत शक्ति फर्काउने दाबी नेताहरुले गरिरहेका छन् । यद्यपि, दलहरु सुशीला कार्की नेतृत्वको सरकारसँग सशंकित छन् । सरकार कुन हिसाबले अघि बढ्छ, सोहीअनुसार निर्णय गरेर अघि बढ्ने दाउमा दलहरु देखिन्छन् ।
यस्तो अवस्थामा प्रधानमन्त्री कार्कीले अहिले निजी क्षेत्र, कर्मचारीको मात्र हैन दलहरुलाई पनि विश्वासमा ल्याउनुपर्ने देखिन्छ । विशेषगरी ठूला तीन दल नेपाली कांग्रेस, नेकपा एमाले, नेकपा माओवादी केन्द्रका कार्यालयदेखि नेताका घर जलेका छन् । तोडफोड भएका छन् । कांग्रेस सभापति शेरबहादुर देउवा र उनकी पत्नी आरजु देउवामाथि कुटपिटसमेत भएको छ । यस्तो अवस्थामा दलहरु यो सरकारको कामलाई ‘पर्ख र हेर’को नीतिमा उभिएको देखिन्छ । ठूला दलका नीत शीर्ष नेताविरुद्ध उनीहरुको पार्टीविरुद्ध नै एकप्रकारको विरोध स्वर बुलन्द हुँदै आएको छ । सत्ता यी नै तीन नेताको वरिपरि घुम्दा जनता आक्रोशित बनेका थिए । यसैले पनि भदौ २३ गते जेन–जीले विद्रोह गरेको हो ।
जेन–जी विद्रोहमा प्रमुख दलका युवाहरुको पनि साथ थियो । यसैले यी दलका युवा नेताहरु नभड्किनेगरी कार्की नेतृत्वको सरकारले काम गर्नुपर्ने देखिन्छ । फागुन २१ गते चुनाव गर्नैपर्ने दबाब सरकारमाथि छ । यससँगै आगजनी र तोडफोडमा परेका प्रशासन केन्द्रहरुको मर्मत, पुनर्निर्माणमा सरकार लाग्नुपर्ने देखिन्छ । त्यसैगरी कर्मचारीतन्त्रको मनोबल बढाउनु, निजी क्षेत्रलाई सघाउनु सरकारको अर्को महत्वपूर्ण चुनौती हो । प्रदेश सरकार र स्थानीय तहको सत्तामा दलकै प्रतिनिधि छन् । यसैले पनि अबका दिनमा भ्रष्टाचार निर्मुल पार्न पनि दलका नेताहरुको साथ लिनुपर्ने देखिन्छ । यसमा विशेषगरी युवा नेताहरुलाई विश्वासमा लिएर अघि बढ्दा सरकारलाई झनै सहज हुने देखिन्छ ।
यसले विस्तारै चुनावी महोल सिर्जना पनि हुन्छ । तर सरकार जेन–जी आन्दोलनको बलमा उदाएको भन्दै दलहरुलाई बेवास्ता गर्ने बाटोमा हिँडेमा गम्भीर भूल हुने छ । यदि यस्तो भएमा पीडामा परेका दलहरुको आन्दोलनका सामना यो सरकारले गर्नुपर्ने हुन्छ । यसलाई कतिपय नेताहरुले प्रतिक्रान्तिको नाम दिने संकेत गरेका छन् । यसो गर्दा जेन-जीकै आन्दोलनका कारण विकासमा निकै पछि धकेलिएको देश पुनः पछाडि फर्कनुपर्ने हुनसक्छ । त्यसैले यो सरकारले आउँदो कार्यक्रमहरु प्रभावकारीरुपमा सम्पन्न गराउन दलहरुलाई विश्वासमा लिनु बुद्धिमतापूर्ण कार्य हुने छ ।
