एएफपी- अमेरिका–जापान–दक्षिण कोरियाको संयुक्त सैन्य अभ्यासप्रति उत्तर कोरियाले निन्दा गरेकाे छ । कोरियालेआगामी संयुक्त सैन्य अभ्यासलाई ‘शक्तिको लापरवाह प्रदर्शन’ भन्दै तीव्र आलोचना गरेकाे हाे।
उत्तर कोरियाली नेता किम जोङ उनकी शक्तिशाली बहिनी किम यो जोङले दक्षिण कोरिया, संयुक्त राज्य अमेरिका र जापानको आगामी संयुक्त सैन्य अभ्यासलाई ‘शक्तिको लापरवाह प्रदर्शन’ भन्दै तीव्र आलोचना गरेका छन् । उनले यस कदमले ‘खराब परिणाम’ निम्त्याउने चेतावनी दिनुभएको सरकारी सञ्चारमाध्यमले आइतबार जनाएको छ ।
आणविक हतियारयुक्त उत्तर कोरियाबाट हुने सम्भावित खतराहरूविरुद्ध तयारी बलियो बनाउन सहयोगीहरू सोमबारदेखि शुक्रबारसम्म दक्षिण कोरियाको जेजु टापुमा संयुक्त नौसेना, हवाई र मिसाइल रक्षा अभ्यास सञ्चालन गर्न तयारीमा छन् । दक्षिण कोरियामा करिब २८ हजार पाँच सय अमेरिकी सैनिक तैनाथ छन् । सियोल र वासिङ्टनले आफ्नो सैन्य सम्पत्तिलाई थप एकीकृत गर्ने उद्देश्यले टेबलटप अभ्यास समेत गर्ने योजना बनाएका छन् । किम यो जोङले यस अभ्यासलाई ‘खतरनाक विचार’ भन्दै राज्य समाचार संस्था केसिएनएमा प्रकाशित विज्ञप्तिमा भने,‘सहयोगीहरूले उत्तर कोरियाको वरिपरिको क्षेत्रमा गरेका वास्तविक कारबाहीमा आधारित शक्तिको लापरवाह प्रदर्शनले अनिवार्य रूपमा उनीहरूकै लागि नराम्रो परिणाम निम्त्याउनेछ ।’
प्योङयाङले लामो समयदेखि यस्ता त्रिपक्षीय वा द्विपक्षीय सैन्य अभ्यासलाई आक्रमणको पूर्वाभ्यास भन्दै अस्वीकार गर्दै आएको छ । कोरिया इन्स्टिच्युट फर नेसनल युनिफिकेसनका वरिष्ठ विश्लेषक होङ मिनका अनुसार उत्तर कोरियाले यसपटकको अभ्यासलाई ‘सीमित वा पूर्ण स्तरको आणविक आक्रमण र यसको प्रक्षेपण प्रणालीलाई बेअसर पार्ने प्रयासको परिदृश्य’ का रूपमा हेर्छ । उनले भने,‘उत्तरले सम्भवतः आणविक आधुनिकीकरण र परम्परागत सैन्य सुधारलाई अगाडि बढाउन यसलाई बहानाका रूपमा प्रयोग गरिरहेको छ ।’ किम यो जोङको वक्तव्य यसै हप्तामा उनका भाइ किम जोङ उनले हतियार अनुसन्धान सुविधाको निरीक्षण गरेको केही दिनपछि आएको हो । त्यहाँ उनले ‘आणविक शक्ति र परम्परागत सशस्त्र बलहरूको निर्माणलाई निरन्तर अघि बढाउने’ नीतिलाई दोहोर्याएका थिए ।
सन् २०१९ मा अमेरिकासँगको आणविक निशस्त्रीकरण शिखर सम्मेलन असफल भएपछि उत्तर कोरियाले बारम्बार आफ्नो आणविक हतियार कहिल्यै नत्याग्ने घोषणा गर्दै आफूलाई ‘अपरिवर्तनीय आणविक राष्ट्र’ का रूपमा प्रस्तुत गरेको छ । हालै युक्रेन युद्धमा रूसलाई सहयोगस्वरूप हजारौँ सैनिक पठाएपछि प्योङयाङले मस्कोबाट महत्त्वपूर्ण समर्थन प्राप्त गरिरहेको छ । गत वर्ष राष्ट्रपति भ्लादिमिर पुटिनको प्योङयाङ भ्रमणका क्रममा दुवै मुलुकबीच आपसी रक्षा सम्झौतामा समेत हस्ताक्षर भएको थियो ।
