सोमबार जेन–जी पुस्ताको आन्दोलनमा सरकारले चरम दमन ग¥यो । सामाजिक सञ्जाल बन्दको नाममा सरकारले रचेको ‘बानेश्वर पर्व’मा १९ जनाको ज्यान गयो । यो दर्दनाक घटनाको मुख्य रचनाकार प्रधानमन्त्री केपी शर्मा ओली हुन् । सोमबार दिनभर ओली बालुवाटारमा बसे । जेन–जी पुस्तालाई गोलीबाट सडकमा रगताम्मे भई लडेको दृश्य हेरिरहे । अरु देशमा गोली चल्दा शान्तिशान्ति गर्ने प्रधानमन्त्री आँगनमा जेन–जीलाई प्रहरीले चरा खसालेझैं खसालेको देख्दा पनि रमाएर बसे । मन्त्रिपरिषद्को बैठकपछि ओलीले घटनाबाट आफू मर्माहत भएको भन्दै गोहीको आँशु झारेका छन् ।
छानबिन समिति गठन गर्ने गर्ने निर्णय गरेका छन् । यो घटनाबाट उम्कन गृहमन्त्री रमेश लेखकलाई राजीनामा दिन लगाएका छन् । गृहमन्त्री लेखक दिनभरजसो सुरक्षा निकायका प्रमुखहरुसँग छलफलमा बसे पनि उनले कुनै निर्णय दिन सकेनन् । बरु उनी सुरक्षा निकायका प्रमुखहरुसँग छलफलमा बस्दा काठमाडौंका प्रमुख जिल्ला अधिकारी छवि रिजालले गोली हान्न आदेश दिइसकेका थिए । सोमबार साँझ नै रिजालले जिल्ला प्रशासन कार्यालयको वेब पेजबाट आफ्नो फोटो हटाएका छन् भने सामाजिक सञ्जालमा रहेको पेज निस्क्रिय गरेका छन् ।
१९ जनाको ज्यान गएपछि आउने गृहमन्त्रीको निर्णय के काम ? जनताको जीउधनको सुरक्षाका लागि जनताबाट चुनिएर पुगेको पदको नेतृत्व गरिरहेको गृहमन्त्री यसको जिम्मेवार छन् । राजीनामा दिएर उनी उम्कन पाउँदैनन् । जेन–जी हत्याको अभियोगमा उनीसहित जिम्मेवार अधिकारीहरुलाई कारबाही गर्नैपर्छ ।यो घटनालाई थप उत्तेजक बनाउने सरकारको नेतृत्वमा बसेका प्रधानमन्त्री ओली नै हुन् । त्यसैले तत्काल उनले सत्ता छाड्नुपर्छ । सुशासनको नाममा सिन्को नभाँचेका प्रधानमन्त्री ओली सत्तामा बसिरहे थप अराजकता मच्चिने निश्चित छ । त्यसैले कि त संसद्मा पुगेका संख्याले ओलीको विकल्प दिन सक्नुपर्छ । नभए जेन–जी पुस्ताको सहभागिता सुनिश्चित हुनेगरी उनीहरुको माग र विश्वव्यापी मान्यता पाएको शासनपद्धति नेपालमा लागू गर्नुपर्छ ।
यसका लागि संसद् भंग, अन्तरिम सरकार गठनजस्ता विषयहरुमा सहमति गर्न सकिन्छ । तर यसअघि प्रधानमन्त्रीलाई यो घटनाको मुख्य मतियार भएकोले उनले राजीनामा दिनुपर्छ । त्यसपछि प्रधानमन्त्री, गृहमन्त्री, प्रहरी प्रमुखहरु, काठमाडौं जिल्ला प्रशासन कार्यालयका प्रमुखलाई पनि कारबाहीको दायरामा ल्याउनुपर्छ । जनतामाथिको चरम दनम सह्य हुन सक्दैन । युगले सम्झनेगरी सत्तामा दम्भ आर्जेर बसेका शासकमाथि कारबाहीको दण्ड चलाउनैपर्छ ।
