चाडबाड नजिकिँदै गर्दा मनसुन भने सुध्रिएको छैन । दसैं नजिकिएको छ । सर्वसाधारणदेखि व्यापारीका लागि यो व्यापार गर्ने मौकाको पर्व हो । चाडपर्वमा मिठो खाने र राम्रो लगाउने योजना धेरैको हुन्छ । यही योजना पूरा गराउन व्यापारीहरु नजिकका बजार क्षेत्रमा सरसामान ढुवानी गर्न चाहन्छन् ।
सहरी क्षेत्र र गाउँ क्षेत्रबाट सामान ढुवानीको ओहोरदोहोर बढ्ने यो समयमा सडक भने वर्षाका कारण अवरुद्ध हुन थालेका छन् । अविरल वर्षाले पहिरो खस्ने, जमिन भासिने, बाढी आउनेजस्ता कारण सडक अवरुद्ध हुन थालेका हुन् । यतिमात्र हैन गाउँ जाने र गाउँबाट सहर आउने यात्रुको चाप पनि बढ्न थालेको छ । यसले गर्दा व्यवसायीले रात्रिसेवा पनि बढाउन थालेका छन् । तर गृह मन्त्रालयको पछिल्लो अपडेटअनुसार वर्षाका कारण देशका १३ स्थानमा सडक अवरुद्ध छन् । कोशी राजमार्ग, पासाङल्हामु राजमार्ग, कर्णाली राजमार्गअन्तर्गत जाजरकोटको छेडागाड र जाजरकोट–डोल्पा सडकखण्ड अहिले पहिरो झरेपछि बन्द छन् ।
कर्णाली राजमार्ग अवरुद्ध हुँदा स्याउ बोकेका २३ ट्रक बाटोमै रोकिएका छन् । यसले १३ करोड बराबरको १८४ मेट्रिक टन स्याउ कुहिने डर उब्जिएको छ । स्याउधनीहरुले चाँडो सडक खुलाउन सरकारसँग पहल गरिदिन माग गरिरहेका छन् । दसैंमा उपभोक्तासम्म नपुगे ठूलो क्षति बेहोर्ने निश्चित छ । तर जबरजस्ती बाटो खुल्दा राति पहिरोले धनजनकै क्षति हुने डर पनि उत्तिकै छ । धादिङ-मलेखु सडकखण्डको दारेगौंडाभिर बर्खा सुरु भएसँगै यस वर्ष पनि उच्च जोखिममा परेको छ । कालु पाण्डे मार्गअन्तर्गत धादिङको नीलकण्ठ नगरपालिका-८ ससाह नजिकै पर्ने दारेगौंडामा सडक पहिराले जोखिममा परेको हो ।
लगातारको वर्षाका कारण नुवाकोटको दुप्चेश्वर गाउँपालिका-३ सरमथलीमा पहिरोले एक विद्यालयसहित तीन घरमा क्षति पुगेको छ । पाँच घर उच्च जोखिममा छन् । पहिरोले सरमथलीस्थित भगवान आधारभूत विद्यालयको चारवटा कोठामा क्षति पु¥याएको छ । यता आइतबार रातिदेखिको अविरल वर्षाका कारण कञ्चनपुरमा ४५ घर डुबानमा परेका छन् । अविरल वर्षापछि महाकाली नदीको जलस्तर बढेको छ । जलस्तर बढेसँगै भारतीय पक्षले शारदा ब्यारेजमा चारपांग्रे र तीनपांग्रे सवारीसाधन आवागमन रोक लगाएको छ । सप्तकोशी नदीमा पानीको सतह लगातार बढ्दै गएपछि बाढीको जोखिम न्यूनीकरण गर्ने उद्देश्यले ३८ ढोका खोलिएका छन् ।
देशभर वर्षाको सम्भावना अझै रहने देखिन्छ । त्यसैले कुनै पनि स्थानमा सवारी गर्नुपूर्व पूर्वतयारी गरौं । जबरजस्ती नगरौं । अघिल्लो वर्ष पूर्वसावधानी नअपनाउँदा त्रिभुवन राजमार्ग र सिस्नेरी पहिरोमा ठूलो मानवीय क्षति पुगेको थियो । विगतका उदाहरणबाट सिक्दै रात्रि बस सञ्चालनमासमेत ध्यान दिऔं ।
