रौतहट - रौतहट जिल्लाको गुजरा नगरपालिका–९ सिमराभवानीपुरबाट हराएका तीन वर्षीय बालक आर्यन राम मृत अवस्थामा फेला परेका छन् । शनिबार दिउँसो घरबाट खेल्न निस्किएका आर्यन त्यसपछि बेपत्ता भएका थिए ।
बेपत्ता भएपछि आमाले इलाका प्रहरी कार्यालय चन्द्रनिगाहपुरमा निवेदन दिएकी थिइन्। प्रहरी टोली र स्थानीयवासीले संयुक्त रूपमा खोजी कार्य थालेका थिए। खोजतलासको क्रममा आइतबार बिहान आर्यनको घरदेखि करिब ७ सय मिटर पश्चिममा रहेको इनारमा उनको शव फेला परेको इलाका प्रहरी कार्यालय चन्द्रनिगाहपुरकी डीएसपी रूपा लाबुङ्गले जानकारी दिइन् ।
घटनाको खबर पाएपछि प्रहरी निरीक्षक रुपेश कुमार झाको नेतृत्वमा टोली घटनास्थल पुगेको थियो । प्रारम्भिक अनुसन्धान जारी रहेको जनाउँदै प्रहरीले बालकको शव चन्द्रनिगाहपुरस्थित सरकारी अस्पतालमा राखिएको जानकारी दिएको छ ।
घटनाको प्रकृति र कारणबारे थप अनुसन्धान भइरहेको प्रहरीले जनाएको छ ।
